“Palihog Dawata Kining Akong Gamay nga Gasa”

KINING mga pulonga mabasa diha sa sulat nga nadawat sa sangang buhatan sa mga Saksi ni Jehova sa Rusya. Gipataban ang maong sulat sa usa ka karton nga punog mga medyas nga delana.

Ang gasa gipadala sa 67-anyos nga si Alla, usa sa mga Saksi ni Jehova nga nakig-uban sa usa ka kongregasyon sa Halayong Silangan sa Rusya. Si Alla nag-alagad kang Jehova sulod na sa napulo ka tuig, nga masibotong nagsangyaw sa maayong balita sa Gingharian. Ugaling, siya kalit lang naestrok mao nga paralisado na ang bahin sa iyang lawas. Apan kay gidasig sa gugma, gisundog ni Alla ang gibuhat sa usa ka Kristohanon sa unang siglo nga si Dorcas, kinsa naghimog mga besti alang sa iyang mga isigkamagtutuo.—Buhat 9:36, 39.

Si Alla misulat: “Dili nako malihok ang akong mga bitiis, apan malihok ko gihapon ang akong mga kamot. Busa ako mosangyaw pinaagig pagsulat.” Siya midugang: “Kay magamit ko pa man ang akong mga kamot, nakahukom ako sa paggansilyo ug pipila ka medyas nga delana. Buot kong ihatag kini sa mga igsoon nga magtukod ug mga Kingdom Hall sa bugnawng mga lugar, sama sa Halayong Silangan sa Rusya ug sa Siberia.”

Mahitungod sa iyang tinuod nga mga sumusunod, si Jesu-Kristo nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ang gugma nga gipasundayag ni Alla maoy usa ka ilhanan sa matuod nga mga tinun-an ni Jesus.