Ang Asoy Bahin Kang Noe ug sa Lunop—Tinuod, Dili Tumotumo
NANGANDOY ka ba ug usa ka mas maayong kalibotan—usa ka kalibotan diin ang mga tawo may pakigdait sa usag usa? usa ka kalibotan nga walay gubat, krimen, ug pagdaogdaog? Kon mao, madasig ka sa usa ka asoy sa kasaysayan nga tingali pamilyar na kaayo kanimo. Kana mao ang asoy bahin kang Noe, usa ka matarong nga tawo nga nagtukod ug arka nga nagluwas kaniya ug sa iyang pamilya latas sa tibuok-yutang lunop diin nalaglag ang mga daotan.
Pipila lang ka sugilanon ang mas kaylap pa kay niini. Ang asoy bahin kang Noe mabasa diha sa Bibliya, sa Genesis kapitulo 6 hangtod sa 9, ug kini gihisgotan usab diha sa Koran ug sa mga sugilanon sa katigulangan sa tibuok yuta. Nahitabo ba gayod ang Lunop, o usa lamang kini ka pasumbingay aron dasigon ang mga tawo sa pagbuhat ug matarong? Dugay nang gilantugian sa mga teologo ug mga siyentipiko kanang pangutanaha. Apan ang Pulong sa Diyos, ang Bibliya, tatawng nag-ingon nga ang maong asoy tinuod, dili tumotumo. Tagda kini:
Ang asoy sa Genesis nagtug-an kanato sa eksaktong tuig, bulan, ug adlaw sa pagsugod sa Lunop, kon kanus-a ug diin mipondo ang arka, ug kon kanus-a mihubas ang tubig. Tukma usab ang mga detalye bahin sa arka—ang plano, sukod, ug ang materyales nga gigamit sa pagtukod niana. Apan diha sa mga tumotumo, sagad nga dili tin-aw ang mga detalye.
Duha ka talaan sa kagikan diha sa Bibliya ang nagpamatuod nga si Noe naglungtad gayod. (1 Cronicas 1:4; Lucas 3:36) Si Esdras ug Lucas maampingong nagdukiduki bahin nianang maong mga talaan sa kagikan. Gisubay ni Lucas ang kagikan ni Jesu-Kristo ngadto kang Noe.
Ang mga manalagna nga si Isaias ug Ezequiel ug ang mga apostoles nga si Pablo ug Pedro naghisgot bahin kang Noe ug sa Lunop.—Isaias 54:9; Ezequiel 14:14, 20; Hebreohanon 11:7; 1 Pedro 3:19, 20; 2 Pedro 2:5.
Si Jesu-Kristo naghisgot usab bahin sa Lunop, nga nag-ingon: “Maingon sa nahitabo sa mga adlaw ni Noe, mao man usab unya sa mga adlaw sa Anak sa tawo: sila nanagpangaon, sila nanag-inom, ang mga lalaki nanagminyo, ang mga babaye gipanghatag sa kaminyoon, hangtod niadtong adlawa nga si Noe misulod sa arka, ug ang lunop miabot ug naglaglag kanilang tanan.” (Lucas 17:26, 27) Kon wala pa mahitabo ang Lunop, walay kapuslanan ang paghisgot ni Jesus bahin sa “mga adlaw sa Anak sa tawo.”
Si apostol Pedro nagtagna nga moabot ang “mga mabiaybiayon” nga dili manumbaling sa giingon sa Bibliya. Siya misulat: ‘Sumala sa ilang gitinguha, sila wala makamatikod [o, wala magtagad] niining butanga, nga ang kalibotan sa panahon [ni Noe] nakaagom sa kalaglagan sa dihang kini gilunopan sa tubig.’ Sundogon ba usab nato ang ilang kawalay-pagtagad? Dili gayod! Si Pedro nagpadayon sa pag-ingon: “Ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.”—2 Pedro 3:3-7.
Sa makausa pa, laglagon sa Diyos ang mga daotan, ug aduna usab unyay maluwas. Pinaagi sa pagsundog sa ehemplo ni Noe, mahimong mahilakip kita sa mga matarong nga maluwas ug makapuyo sa mas maayong kalibotan.