Makuyaw ang Panahon Karon

ANG Bibliya nagtagna nga ang mga tawo makasinati ug “makuyaw nga mga panahong lisod sagubangon.” Kini nagtawag nianang yugtoa ingong “kataposang mga adlaw.” (2 Timoteo 3:1-5; 2 Pedro 3:3-7) Mao usab kanang yugtoa sa panahon nga gihisgotan ni Jesu-Kristo sa dihang iyang gitubag ang pangutana sa iyang mga tinun-an mahitungod sa “kataposan sa sistema sa mga butang.” (Mateo 24:3) Kita ba nagkinabuhi na sa kataposang mga adlaw? Itandi ang gitagna sa Bibliya sa giingon sa di pa dugayng mga taho nga gikutlo sa ubos, ug tan-awa kon unsay imong ikasulti.

Ang gitagna sa Bibliya: gubat—Lucas 21:10; Pinadayag 6:4.

Ang giingon sa di pa dugayng mga taho: “Tulo ka pilo nga mas daghan ang nangamatay sa gubat sa ika-20ng siglo kon itandi sa mga nangamatay sa gubat sukad sa pagkatawo ni Jesus hangtod sa ika-19ng siglo.”—Worldwatch Institute.

Ang gitagna sa Bibliya: kanihit sa pagkaon ug sakit—Lucas 21:11; Pinadayag 6:5-8.

Ang giingon sa di pa dugayng mga taho: Niadtong 2004, gibanabana nga 863 ka milyon ang nag-antos sa malnutrisyon, nga labaw ug 7 ka milyon kay sa 2003.—United Nations Food and Agriculture Organization.

Mga usa ka bilyon ang nagpuyo sa mga eskuwater; 2.6 ka bilyon ang walay tarong nga sistema sa paglabay sa hugaw; 1.1 ka bilyon ang walay tubig nga mainom.—Worldwatch Institute.

Mga 500 ka milyon ang gimalarya; 40 ka milyon ang adunay HIV-AIDS; ang tesis (TB) mikalas ug 1.6 ka milyon niadtong 2005.—World Health Organization.

Ang gitagna sa Bibliya: pagdaot sa yuta—Pinadayag 11:18.

Ang giingon sa di pa dugayng mga taho: “Tungod sa pag-abuso sa tawo sa yuta, lagmit mapuo ang lainlaing matang sa hayop ug tanom.” “Halos dos-tersiya sa mga kaayohan nga gitagana sa kinaiyahan nagakaut-ot.”—Millennium Ecosystem Assessment.

“Tungod sa gihimo sa tawo, ang mga gas nga makapasamot sa greenhouse effect nakapainit pag-ayo sa klima ug lagmit makadaot sa planeta.”—NASA, Goddard Institute for Space Studies.

Ang gitagna sa Bibliya: ang maayong balita sa Gingharian sa Diyos igawali sa tibuok yuta—Mateo 24:14; Pinadayag 14:6, 7.

Ang giingon sa di pa dugayng mga taho: Niadtong 2007, ang kinatas-ang gidaghanon sa mga Saksi ni Jehova miabot ug 6,957,854. Sila migugol ug kapin sa 1.4 ka bilyong oras sa pagsangyaw sa maayong balita sa Gingharian sa Diyos diha sa 236 ka kayutaan.—2008 Tinuig nga Basahon sa mga Saksi ni Jehova.

Ingon sa nahisgotan na, ang Bibliya nagtagna nga bisan pag gibahaan kita sa dili maayong balita, adunay katarongan nga molaom. Si Jesus naghisgot bahin sa “maayong balita” sa Gingharian sa Diyos. Unsa ang Gingharian sa Diyos? Nganong naghatag kini sa tawo ug katarongang molaom nga adunay masanag nga umaabot? Unsang kaayohan ang itagana sa Gingharian sa Diyos kanimo?

[Blurb sa panid 5]

Gitagna sa Bibliya ang mga kahimtang nga nagakahitabo karon