Si Abraham—Tawong Mapainubsanon

Si Abraham naglingkod sulod sa iyang tolda nga napanalipdan batok sa naglagiting nga kainit sa adlaw. Samtang naglantaw sa unahan, iyang nakita ang tulo ka lalaki nga nagsingabot.a Sa walay pagpanuko, siya midagan sa pagsugat sa mga bisita, nga nagdapit kanila nga mopahulay usa aron sila maabiabi. Gitanyagan niya silag “usa ka buok nga tinapay,” apan nag-andam siyag daghang pagkaon nga may bag-ong luto nga tinapay, mantekilya, gatas, ug karne. Sa pagdalit niini sa iyang mga bisita, gipakita ni Abraham dili lang ang talagsaong pagkamaabiabihon kondili, ingon sa atong makita, ang tinuod usab nga pagkamapainubsanon.—Genesis 18:1-8.

UNSA ANG PAGKAMAPAINUBSANON? Kini ang kaatbang sa garbo o pagkamapahitas-on. Giisip sa tawong mapainubsanon nga ang uban mas labaw niya. (Filipos 2:3) Siya mamati sa mga sugyot sa uban, ug andam mohimog ubos nga mga trabaho alang kanila.

GIUNSA PAGPAKITA NI ABRAHAM ANG PAGKAMAPAINUBSANON? Si Abraham andam moalagad sa uban. Ingon sa nahisgotan na, sa dihang nakita ni Abraham ang tulo ka bisita, giatiman dayon niya sila. Ang iyang asawa, si Sara, nagdali pag-andam ug pagkaon. Apan, matikdi kon kinsay mas daghag gihimo: si Abraham midagan aron sugaton ang mga bisita, siya mitanyag kanilag makaon, siya nagpilig hayop nga ihawon, ug iyang gidalit ang tanan sa mga bisita. Inay isalig sa iyang mga sulugoon, kining mapainubsanong lalaki maoy nangunay sa paghimo niining ubos nga trabaho. Wala niya isipa ang pagsilbi sa uban nga makapaubos sa iyang dignidad.

Si Abraham namati sa mga sugyot niadtong ubos sa iyang pagdumala. Pipila lang ka panaghisgot nila ni Abraham ug Sara ang narekord sa Bibliya. Apan, kaduha nato mabasa nga gipaminawan ni Abraham ang opinyon ni Sara ug gisunod kana. (Genesis 16:2; 21:8-14) Sa usa niini, ang sugyot ni Sara ‘wala gayod makapahimuot kang Abraham’ sa sinugdan. Apan sa dihang nakigsulti si Jehova kang Abraham, ug giingnan siya nga maayo ang sugyot ni Sara, mapainubsanon kanang gidawat ug gisunod ni Abraham.

UNSAY MGA LEKSIYON NIINI KANATO? Kon kita tinuod nga mapainubsanon, andam kitang moalagad sa uban. Malipay kita sa pagbuhat sa atong maarangan alang sa ilang kaayohan.

Mapakita usab nato ang pagkamapainubsanon sa atong paagi sa pagsanong sa sugyot sa uban. Inay isalikway ang ilang opinyon tungod lang kay dili kita ang nakahunahuna niana, mas maayong dawaton nato ang ilang sugyot. (Proverbio 15:22) Ang maong tinamdan makahatag ug kaayohan niadtong dunay awtoridad. “Akong nakita nga kon ang usa maayong modumala sa iyang mga tawo, kini sila dili mahadlok sa pagsulti sa ilang opinyon,” miingon ang usa ka eksperyensiyadong superbisor nga si John. Siya midugang: “Gikinahanglan ang pagkamapainubsanon aron imong madawat nga posibleng mas maayo ang opinyon niadtong ilalom sa imong pagdumala. Apan sa makausa pa, walay usa—bisan ang tagdumala—ang makaingon nga siya ray dunay maayong opinyon.”

Kon atong sundogon si Abraham pinaagi sa pagpamati sa mga sugyot sa uban ug sa pagbuhat ug ubos nga mga trabaho alang kanila, atong maangkon ang pag-uyon ni Jehova. Kay sa pagkatinuod “ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.”—1 Pedro 5:5.

[Footnote]