Nganong Gisugo sa Diyos si Abraham sa Paghalad sa Iyang Anak?

▪ Sumala sa basahong Genesis sa Bibliya, gisugo ni Jehova nga Diyos si Abraham sa paghalad sa iyang anak nga si Isaac. (Genesis 22:2) Ang pipila ka magbabasa sa Bibliya naglisod pagsabot niana. “Sa dihang nadunggan nako ning estoryaha sa bata pa ko, nasuko ko,” miingon ang usa ka propesor nga si Carol. “Unsang matanga sa Diyos ang mosugog ingon niana?” Bisag natural kanang pagbatia, maayong hinumdoman ang duha ka punto.

Una, tagda kon unsay wala buhata ni Jehova. Wala niya tugoti si Abraham nga idayon ang paghalad, bisag andam unta kining mohimo niana, ni ang Diyos nagsugo pag-usab niana kang bisan kinsa. Buot ni Jehova nga ang tanan niyang magsisimba, lakip ang mga bata, padayong mabuhi—nga magtagamtam ug malungtaron ug malipayong kinabuhi.

Ikaduha, gipakita sa Bibliya nga si Jehova may linaing rason sa pagsugo kang Abraham nga ihalad si Isaac. Ang Diyos nahibalo nga kasiglohan sa ulahi, Iyang tugotan ang Iyang kaugalingong Anak,a si Jesus, nga mamatay alang nato. (Mateo 20:28) Buot ni Jehova nga masayod ta kon unsa ka dako kini nga sakripisyo alang niya. Ang iyang sugo kang Abraham maoy dakong pasundayag nianang umaabot nga halad. Sa unsang paagi?

Tagda ang giingon ni Jehova kang Abraham: “Kuhaa, palihog, ang imong anak nga lalaki, ang imong bugtong anak nga imong gihigugma pag-ayo, si Isaac, ug . . . itanyag siya ingong usa ka halad-nga-sinunog.” (Genesis 22:2) Matikdi nga gitawag ni Jehova si Isaac ingong anak nga “imong gihigugma pag-ayo.” Nahibalo si Jehova kon unsa ka bililhon kang Abraham si Isaac. Nasayod sab ang Diyos kon unsay Iyang pagbati ngadto sa iyang Anak, si Jesus. Kay gihigugma pag-ayo ni Jehova si Jesus, kaduha siya misulti gikan sa langit nga direktang nagtawag kaniyang “akong Anak, ang hinigugma.”—Marcos 1:11; 9:7.

Matikdi usab nga si Jehova migamit sa pulong nga “palihog.” Ang usa ka eskolar sa Bibliya nag-ingon nga ang paggamit sa Diyos niini nagpakita nga “giila sa GINOO ang kadako sa sakripisyo nga iyang gipangayo.” Atong mahanduraw nga ang maong hangyo nakapasubo gayod kang Abraham; sa samang paagi, halos dili nato mahanduraw ang kasakit nga gibati ni Jehova samtang iyang nakita ang iyang pinalanggang Anak nga nag-antos ug namatay. Sa walay duhaduha, kini ang labing sakit nga gibati o bation pa ni Jehova.

Sa pagkatinuod, bisag dili tingali ta makaangay sa gipabuhat ni Jehova kang Abraham, maayong hinumdoman nga wala tugoti ni Jehova ang matinumanong patriarka nga idayon ang halad. Wala niya ipahinabo nga si Abraham makaagom sa grabeng kasakit nga bation sa usa ka ginikanan. Sa pagkatinuod, dili buot sa Diyos nga mamatay si Isaac. Apan, si Jehova wala “magpalingkawas sa iyang kaugalingong Anak kondili nagtugyan kaniya alang kanatong tanan.” (Roma 8:32) Nganong gitugotan ni Jehova ang iyang kaugalingon nga makaagom niana? Gibuhat niya kana aron “kita makabaton ug kinabuhi.” (1 Juan 4:9) Usa kini ka dakong pahinumdom sa gugma sa Diyos kanato! Dili ba kita matukmod sa paghigugma usab kaniya?b

[Mga footnote]