‘Magpabilin sa Akong Pulong’
“Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.”—JUAN 8:31, 32.
Ang Kahulogan Niini: Ang “pulong” ni Jesus mao ang iyang mga pagtulon-an, nga naggikan sa kahitas-an. “Ang Amahan nga nagpadala kanako naghatag kanakog sugo kon unsay akong isugilon ug isulti,” matod ni Jesus. (Juan 12:49) Sa pag-ampo niya sa iyang langitnong Amahan, si Jehova nga Diyos, si Jesus miingon: “Ang imong pulong maoy kamatuoran.” Kanunay niyang gikutlo ang Pulong sa Diyos sa pagsuportar sa iyang pagtulon-an. (Juan 17:17; Mateo 4:4, 7, 10) Busa, ang tinuod nga Kristohanon ‘magpabilin sa iyang pulong,’ o modawat sa Pulong sa Diyos, ang Bibliya, ingong “kamatuoran” ug bugtong awtoridad sa ilang pagtulon-an ug binuhatan.
Ang Gihimo sa Unang-Siglong Kristohanon: Ang Kristohanong si apostol Pablo, ang kinadaghanag nasulat nga basahon sa Bibliya, nagtahod usab sa Pulong sa Diyos sama kang Jesus. Siya misulat: “Ang tibuok Kasulatan inspirado sa Diyos ug mapuslanon.” (2 Timoteo 3:16) Ang mga lalaki nga gisangonan sa pagtudlo sa isigka-Kristohanon kinahanglang “hugot nga mangupot sa segurado ug kasaligang Pulong sa Diyos.” (Tito 1:7, 9, The Amplified Bible) Ang unang mga Kristohanon gitambagan nga isalikway ang “pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”—Colosas 2:8.
Kinsa Karon ang Nagsunod sa Ilang Sumbanan? Ang Dogmatic Constitution on Divine Revelation sa Vatican, nga gidawat niadtong 1965 ug gikutlo sa Catechism of the Catholic Church, nag-ingon: “Dili kay sa Sagradong Kasulatan ra gibase sa Iglesya [Katolika] ang tanan nga gipadayag niini. Busa ang sagradong tradisyon ug Sagradong Kasulatan pagadawaton ug pagabalaanon sa samang debosyon ug pagtahod.” Ang usa ka artikulo sa Maclean’s nga magasin mikutlo sa usa ka klerigo sa Toronto, Canada, kinsa miingon: “Nganong kinahanglan man tang magpagiya sa usa ka ‘rebolusyonaryong’ hunahuna sa milabayng duha ka libo ka tuig? Kita may maayong mga ideya nga kanunay lang mawad-ag bili kay kinahanglan kining ilangkit kang Jesus ug sa Kasulatan.”
Bahin sa mga Saksi ni Jehova, ang New Catholic Encyclopedia nag-ingon: “Ilang giisip ang Bibliya ingong bugtong tinubdan sa ilang pagtulon-an ug lagda sa panggawi.” Niining bag-o pa, usa ka lalaki sa Canada ang misagbat sa dihang ang usa sa mga Saksi ni Jehova nagpaila sa kaugalingon. “Nakaila ko kon kinsa ka,” matod niya, nga nagtudlo sa Bibliya niini, “tungod sa inyong ilhanan.”