Ordinaryo ra ba nga Basahon?

“Ang tibuok Kasulatan inspirado sa Diyos ug mapuslanon . . . , aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—2 TIMOTEO 3:16, 17.

DILI tanan ang mouyon sa maong pamulong bahin sa Bibliya. Komosta sa imong bahin? Hain sa mosunod ang imong panglantaw sa Bibliya?

• Usa ka maayong basahon

• Usa sa daghang balaang sinulat

• Usa ka basahon sa mga sugilambong nga kakuhaag leksiyon

• Pulong sa Diyos

Ang laing pangutana nga nalangkit niana mao kini: Hinungdanon ba kon unsay imong gituohan? Tagda ang giingon mismo sa Bibliya: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Busa ang Bibliya nag-angkon nga kini gisulat aron sa pagtudlo ug paghupay kanato, ug sa paghatag kanatog paglaom.

Apan kon ang Bibliya maoy usa lang ka maayong basahon o usa lang sa daghang balaang sinulat, mosalig ka ba niana sa pagtudlo kanimo ug paggiya sa imong pamilya, ilabina kon ang mensahe niana lahi sa imong gituohan nga maoy husto? Kon ang Bibliya maoy koleksiyon sa mga sugilambong, ikaw ba mahupayan ug makalaom sa mga saad niana?

Sa laing bahin, minilyon nga nagtuon sa Bibliya ang kombinsido nga kini maoy talagsaong Pulong sa Diyos. Ngano? Unsay nakapalahi sa Bibliya sa ubang basahon? Gidapit ka namo sa pagsusi sa lima ka talagsaong bahin sa Bibliya nga gihubit sa sunod nga mga artikulo.