TUBAG SA MGA PANGUTANA BAHIN SA BIBLIYA
Posible ba ang kinabuhing dayon?
Unsang tagana ang makapahigawas kanato sa kamatayon?
Ang unang tawo, si Adan, nabuhig daghang siglo. Apan siya natigulang ug namatay. Sukad niadto, gisulayan sa tawo ang daghang paagi aron dili matigulang. Pero, wala pay tawo nga nakalikay sa kamatayon. Ngano? Si Adan natigulang ug namatay kay siya nakasala dihang misupak siya sa Diyos. Kita matigulang kay napanunod nato ang sala ni Adan ug ang silot nga kamatayon.—Basaha ang Genesis 5:5; Roma 5:12.
Aron mabuhi sa dayon, kinahanglang may molukat kanato. (Job 33:24, 25) Ang lukat mao ang bili nga ibayad aron mapahigawas ang usa, ug sa atong bahin, kita kinahanglang ipahigawas sa kamatayon. (Exodo 21:29, 30) Si Jesus ang nagbayad sa bili dihang namatay siya alang kanato.—Basaha ang Juan 3:16.
Sa unsang paagi maangkon nato ang kinabuhing dayon?
Dili tanan ang mapahigawas sa sakit ug pagkatigulang. Ngani, kadtong mosupak sa Diyos, sama ni Adan, mawad-an sa ilang kinabuhi. Kadto lamang napasaylo sa ilang mga sala ang mabuhi sa dayon.—Basaha ang Isaias 33:24; 35:3-6.
Aron mapasaylo, kinahanglang duna tay buhaton. Kinahanglang mahibalo kita bahin sa Diyos pinaagi sa pagtuon sa iyang Pulong, ang Bibliya. Kini nagtudlo kanato kon unsaon pagkinabuhing malipayon ug kon unsaon pag-angkon ang pag-uyon sa Diyos ug ang kinabuhing dayon.—Basaha ang Juan 17:3; Buhat 3:19.