NAHIBALO KA BA?
Giunsa paggamit kaniadto ang galingan nga demano?
Ang galingan nga demano gigamit aron ang lugas mahimong harina para sa tinapay. Kini adlaw-adlawng gigamit sa mga babaye o mga sulugoon sa halos tanang panimalay. Kaniadto ang tingog sa galingan madungog kada adlaw.—Exodo 11:5; Jeremias 25:10.
Gipakita sa nakubkoban nga mga butang sa karaang Ehipto kon giunsa kini paggamit. Ang lugas ibutang ibabaw sa pinahigda nga bato nga medyo lupyak, nga pormag montura sa kabayo. Ang maggaling moluhod atubangan niini ug ang mas gamay nga bato ibag-idbag-id niya sa medyo lupyak nga bato para mapino ang lugas. Sumala sa usa ka reperensiya, ang batong pangbag-id sagad motimbang ug dos ngadto sa kuwatro kilos. Kon gamitong hinagiban, kini makamatay.—Maghuhukom 9:50-54.
Ang paggaling ug lugas importante kaayo para mabuhi ang pamilya maong gidili sa balaod sa Bibliya nga himoong garantiya ang galingan. “Walay usa nga magsakmit sa galingang demano o sa ibabaw nga batong pangligis niini ingong garantiya, tungod kay kalag ang iyang gisakmit ingong garantiya,” nag-ingon ang Deuteronomio 24:6.
Unsay gitumong sa ekspresyong “anaa sa sabakan”?
Ang Bibliya nag-ingon nga si Jesus “anaa sa sabakan sa Amahan.” (Juan 1:18) Kini nagpasabot sa kasuod ug pabor nga nabatonan ni Jesus sa Diyos. Gitumong niini ang kostumbre sa mga Hudiyo kaniadto sa dihang mangaon.
Sa adlaw ni Jesus, ang mga Hudiyo maghirag sa mga lingkoranan palibot sa lamesa. Ang ulo sa matag usa duol sa lamesa samtang itukod niya ang iyang walang siko sa unlan. Niini nga posisyon, malihok niya ang iyang tuong bukton. Sanglit ang tanang mangaon maghirag sa ilang wala, diin sila sunodsunod nga magtapad, “ang ulo sa usa duol sa dughan sa iyang tapad,” matod sa usa ka reperensiya, “busa gikaingong siya ‘anaa sa sabakan’ sa iyang gisundan.”
Dakong kadungganan o pribilehiyo ang paglingkod nga maghirag duol sa sabakan [o, dughan] sa ulo sa pamilya o sa nangimbitar sa kombira. Busa, sa kataposang Paskuwa ni Jesus, si apostol Juan, “ang tinun-an nga gihigugma ni Jesus,” mao ang naa sa iyang sabakan. Tungod niana, si Juan ‘makasandig sa dughan ni Jesus’ aron mangutana.—Juan 13:23-25; 21:20.