“Gidala Mo ni Jehova sa France Aron Makakat-on sa Kamatuoran”

SA BATA pa si Antoine Skalecki, kabayo ang kanunay niyang kauban. Mosulod sila sa medyo ngitngit nga mga tunel, nga maghakot ug karbon gikan sa minahan nga 500 metros sa ilalom sa yuta. Ang amahan ni Antoine nabaldado dihang nahugno ang usa ka tunel sa minahan, mao nga ang pamilya napugos sa pagpatrabaho kaniya sa minahan siyam ka oras kada adlaw. May higayon nga si Antoine hapit mamatay dihang may tunel nga nahugno.

Usa si Antoine sa daghang bata nga natawo sa France nga may Polish nga ginikanan, sa katuigan sa 1920 ug 1930. Nganong daghang taga-Poland ang milalin sa France? Dihang naindependente pag-usab ang Poland human sa Gubat sa Kalibotan I, nahimong problema ang sobrang populasyon. Sa laing bahin, ang France namatyag kapin sa usa ka milyong lalaki panahon sa gubat ug nagkinahanglag mga tigminag karbon. Busa, ang gobyerno sa France ug Poland naghimog kasabotan sa paglalin niadtong Septiyembre 1919. Pagka-1931, ang gidaghanon sa mga Polish didto sa France nakaabot ug 507,800, ug daghang Polish ang namuyo sa mga minahan sa norte.

Dala sa kugihang Polish nga mga lalin ang ilang kultura, lakip na ang ilang pagkarelihiyoso. “Ang akong apohan nga si Joseph may pagtahod nga maghisgot sa Balaang Kasulatan nga maoy gitudlo sa iyang amahan,” nahinumdom si Antoine, karon 90 anyos. Matag Dominggo, ang mga pamilya sa Polish nga mga minero magsul-ob sa ilang nindot nga besting pangsimba, sama sa ilang ginabuhat sa ilang nasod, nga gitamay sa dili relihiyosong mga French.

Sa Nord-Pas-de-Calais, daghang Polish nga molupyo ang nasangyawan sa mga Estudyante sa Bibliya, kinsa masibotong nagsangyaw sa maong dapit sukad sa 1904. Pagka-1915, ang The Watch Tower gisugdan pag-imprenta sa Polish nga pinulongan matag bulan, ug ang The Golden Age (karon Pagmata!) nabatonan sa maong pinulongan niadtong 1925. Daghang pamilya ang madinawaton sa Kasulatanhong mensahe sa maong mga magasin, ingon man sa librong The Harp of God sa Polish nga pinulongan.

Ang pamilya ni Antoine nakadungog bahin sa mga Estudyante sa Bibliya gikan sa iyang uyoan, kinsa mitambong sa unang tigom niini niadtong 1924. Niana pong tuiga, sa Bruay-en-Artois, ang mga Estudyante sa Bibliya naghimo sa ilang unang asembliya sa Polish nga pinulongan. Wala pay usa ka bulan ang milabay, sa mao gihapong lungsod, ang representante sa world headquarters, si Joseph F. Rutherford, nagpahigayon ug miting publiko diin 2,000 ang mitambong. Kadaghanan sa nanambong mga Polish. Tungod niini, si Brader Rutherford miingon kanila: “Gidala mo ni Jehova sa France aron makakat-on sa kamatuoran. Karon, kamo ug ang inyong mga anak kinahanglang motabang sa mga French! Kinahanglan pang himoon ang dakong buluhatong pagsangyaw, ug si Jehova magtaganag mga magmamantala alang niana.”

Ug gihimo gyod kana ni Jehova! Ang maong mga Polish nga Kristohanon madasigon sa pagsangyaw maingon nga sila kugihan diha sa mga minahan! Gani, ang pipila kanila namalik sa Poland aron ipaambit ang bililhong kamatuoran nga ilang nakat-onan. Si Teofil Piaskowski, Szczepan Kosiak, ug Jan Zabuda, maoy pipila niadtong mibiya sa France aron isangyaw ang maayong balita sa dakong bahin sa Poland.

Apan daghang magsasangyaw nga nagsultig Polish ang nagpabilin sa France ug nagpadayon sa pagsangyaw nga masiboton uban sa ilang French nga mga igsoon. Niadtong 1926 nga general assembly sa Sin-le-Noble, 1,000 ang nanambong sa Polish nga sesyon, uban sa 300 nga nanambong sa French. Ang 1929 Yearbook nagtaho: “Niadtong tuiga, 332 ka Polish nga igsoon ang nagpasimbolo sa ilang konsagrasyon [dedikasyon] pinaagig bawtismo.” Sa wala pa ang Gubat sa Kalibotan II, 32 sa 84 ka kongregasyon sa France ang nagsultig Polish.

Niadtong 1947, daghang Saksi ni Jehova ang midawat sa imbitasyon sa gobyerno sa Poland nga mobalik sa ilang nasod. Apan bisan pag nanguli na sila, ang bunga sa ilang paningkamot ug niadtong sa French nga mga igsoon makita sa 10 porsiyento nga pag-uswag sa mga magmamantala sa Gingharian nianang tuiga. Gisundan kini sa 20, 23, ug bisan 40 porsiyento nga pag-uswag gikan sa tuig 1948 ngadto sa 1950! Aron mabansay kining bag-ong mga magmamantala, ang branch sa France nagtudlo sa unang higayon ug mga circuit overseer niadtong 1948. Sa lima nga napili, upat ang Polish, ug si Antoine Skalecki usa kanila.

Daghang Saksi ni Jehova sa France ang nagdala gihapon sa Polish nga mga apelyido sa ilang katigulangan, kinsa nagkugi diha sa mga minahan ug sa buluhatong pagsangyaw. Karon usab, daghang lalin ang nakakat-on sa kamatuoran sa France. Mobalik man sa ilang yutang natawhan ang mga magmamantala o mopabilin sa ilang bag-ong pinuy-anan, sila masibotong nagsundog sa mga magmamantala sa Gingharian sama sa ilang Polish nga mga katigulangan.—Gikan sa among archives sa France.