Lig-ong Pasalig Gikan sa Kinagamyang Letra sa Hebreohanon

Makasalig ba gyod ta nga ang tanang saad sa Diyos matuman? Si Jesus kombinsido niana, ug ang iyang mga gitudlo nakatabang sa mga namati kaniya nga makabatog pagtuo. Tagda ang ilustrasyon ni Jesus sa iyang Wali sa Bukid, nga narekord sa Mateo 5:18: “Sa pagkatinuod ako magaingon kaninyo nga mas dali pang mahanaw ang langit ug ang yuta kay sa usa ka kinagamyang letra o sa usa ka tipik [kudlit] sa letra nga mahanaw sa bisan unsa nga paagi gikan sa Balaod ug dili matuman ang tanang butang.”

Ang kinagamyang letra sa Hebreohanong alpabeto maoy י (yod), nga mao ang unang letra sa Tetragrammaton, ang balaang ngalan sa Diyos, si Jehova.a Gawas pa sa mga pulong ug mga letra sa Balaod sa Diyos, para sa mga eskriba ug Pariseo ang matag kudlit sa letra sa Balaod importante kaayo.

Si Jesus miingon nga mas dako pag posibilidad nga mahanaw ang langit ug yuta kay sa mahanaw ang kinagamyang detalye sa Balaod. Pero gipasaligan kita sa Kasulatan nga ang literal nga langit ug yuta magpabilin hangtod sa hangtod. (Salmo 78:69) Busa kining nindot nga mga pahayag nagpakita nga matuman gayod bisan ang kinagamyang detalye sa Balaod.

Importante ba kang Jehova nga Diyos ang gagmayng mga detalye? Oo. Tagda kini: Ang karaang mga Israelitas gisugo nga dili balion ang mga bukog sa karnero nga gamiton sa Paskuwa. (Exodo 12:46) Tingali gamay ra kadto nga detalye. Nakasabot ba sila kon nganong dili nila angayng balion ang mga bukog? Lagmit wala. Pero nahibalo si Jehova nga kini nga detalye matagnaon sa pagkaagi nga walay bisan usa ka bukog sa Mesiyas ang nabali sa gipatay siya diha sa sakitanang estaka.​—Salmo 34:20; Juan 19:31-33, 36.

Unsay atong makat-onan gikan sa mga pulong ni Jesus? Kita usab bug-os nga makasalig nga ang tanang saad ni Jehova nga Diyos matuman, bisan sa kinagamyang mga detalye. Pagkadako niini nga pasalig gikan sa kinagamyang letra sa Hebreohanon!