Unsay Kaayohan Kon Mailhan Nimo Ang Diyos?

Sa nag-unang mga artikulo, nakat-onan nato ang tubag sa pangutanang, Kinsa ang Diyos? Nakat-onan nato sa Bibliya nga ang iyang ngalan maoy Jehova, ug gugma ang iyang pangunang hiyas. Nakat-onan sab nato ang iyang mga nahimo ug himoon pa para sa kaayohan sa mga tawo. Bisag daghan pa tag mahibaloan bahin sa Diyos, makapangutana tingali ka kon unsay kaayohan niini kanimo.

Si Jehova nagsaad nga “kon imo siyang pangitaon, iyang itugot nga makaplagan nimo siya.” (1 Cronicas 28:9) Hunahunaa ang bililhong regalo nga nagpaabot nimo samtang magtuon ka bahin sa Diyos ug mailhan siya—“ang suod nga panaghigalaay uban kang Jehova”! (Salmo 25:14) Unsay kaayohan kon mahimo nimong higala ang Diyos?

Tinuod nga kalipay. Si Jehova gitawag nga “malipayong Diyos.” (1 Timoteo 1:11) Kon masuod ka sa Diyos ug sundogon nimo ang iyang mga paagi, mobati kag tinuod nga kalipay nga makahatag ug kaayohan sa imong emosyon, panghunahuna, ug panglawas. (Salmo 33:12) Magmalipayon sab ka pinaagi sa paglikay sa makadaot nga paagi sa pagkinabuhi, pag-ugmad ug maayong mga batasan, ug pagbaton ug maayong relasyon sa uban. Makaingon gyod ka nga tinuod ang giingon sa salmista: “Maayo alang kanako ang pagduol sa Diyos.”—Salmo 73:28.

Personal nga pagtagad. Si Jehova misaad sa iyang mga alagad: “Tambagan ka nako samtang nagatan-aw ko kanimo.” (Salmo 32:8) Nagpasabot kana nga hatagan ni Jehova ug personal nga pagtagad ang iyang mga alagad ug iyang atimanon sila sumala sa panginahanglan sa matag indibiduwal. (Salmo 139:1, 2) Dihang duna na kay maayong relasyon uban kang Jehova, imong makita nga siya andam kanunay sa pagtabang nimo.

Nindot nga kaugmaon. Gawas sa pagtabang kanimo nga makabaton ug malipayon ug makapatagbawng kinabuhi karon, gipaposible sab ni Jehova nga Diyos nga makabaton kag nindot nga kaugmaon. (Isaias 48:17, 18) Ang Bibliya nag-ingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos, ug sa imong gipadala, si Jesu-Kristo.” (Juan 17:3) Niining lisod nga mga panahon, ang paglaom nga gihatag sa Diyos maoy samag angkla nga makatabang nato nga magpabiling “segurado ug lig-on.”—Hebreohanon 6:19.

Kini maoy pipila lang sa daghang importanteng rason nga mas ilhon pa ang Diyos ug magbaton ug personal nga relasyon kaniya. Gidasig ka namo nga makig-estorya sa usa sa mga Saksi ni Jehova o ablihan ang jw.org/ceb para sa dugang impormasyon nga makatabang nimo.