Ang Labing Hinungdanong Adlaw sa 1992
1 Ang labing hinungdanong petsa sa imong kalendaryo niining tuiga maoy Biyernes, Abril 17. Human sa pagsalop sa adlaw nianang adlawa, atong saulogon ang Memoryal sa kamatayon ni Kristo. (1 Cor. 11:20, 24) Nganong ang petsa sa kamatayon ni Jesus naghimo sa usa ka adlaw alang sa espesyal nga paghinumdom?
2 Ang Memoryal—Kahulogan Niini: Ang kamatayon ni Jesus maoy usa ka hitabo nga may unibersohanong kahinungdanon. Sa dihang misulat sa gianak-espiritung Kristohanong kongregasyon, si apostol Pablo miingon: “Sa masubsob nga kamo magakaon niining tinapay ug magainom niining kopa, kamo padayong nagamantala sa kamatayon sa Ginoo, hangtod sa iyang pag-abot.” (1 Cor. 11:26) Busa ang Memoryal sa espesyal nagapatagad sa kahinungdanon sa kamatayon ni Jesu-Kristo diha sa pagpatuman sa katuyoan ni Jehova. Kini nagapatugbaw sa kahulogan sa haladnong kamatayon ni Jesus ug sa paagi nga ang iyang kamatayon nagaapektar niadtong kinsa mahimong iyang mga isigkamanununod sa langitnong Gingharian.—Juan 14:2, 3; Heb. 9:15.
3 Pinaagig paghupot ug integridad hangtod sa iyang kamatayon, nabalaan ni Jesus ang ngalan sa iyang Amahan ug nakapasundayag nga ang usa ka hingpit nga tawo makapamatuod nga matinumanon ubos sa tanang matang sa pagsulay nga mahimong ipahinabo ni Satanas batok kaniya. Ang iyang kamatayon nagtagana usab sa gikinahanglang hingpit tawhanong halad sa paglukat sa kaliwat ni Adan ug nagpaposible alang sa mas daghan pa nga mobatog pagtuo nga mabuhi sa walay kataposan sa paraisong yuta. Tungod sa tanan nga mapalampos pinaagig kamatayon ni Jesus, maoy labing haom alang kaniya sa pagsugo sa iyang mga tinun-an sa paghandom sa iyang kamatayon.—rs p. 257-8 (p. 266-7 sa Ingles).
4 Kon Unsaon Ta Pagpakitag Pagpabili: Ang kalibotan daghag kasaulogan sulod sa tuig, ug dako ang gihimo sa pagpasiugda niana. Sa laing bahin, ang Panihapon sa Ginoo mao lamang ang kasaulogan nga ang debotadong mga sumosunod sa mga tunob ni Jesus gisugo sa pagtuman. Dili kaduhaduhaan, kini maoy pinakadakong kasaulogan sa tanang tinuod nga mga Kristohanon. Dili ba ang lalom nga kahulogan sa Panihapon sa Ginoo makapalihok kanato nga ipunting ang pagtagad diha niana sa Abril?
5 Tingali makagugol tag pipila ka minutos kada semana sa Abril aron makighisgot uban sa atong mga estudyante sa Bibliya sa mga kasulatan nga nagapatugbaw sa kahulogan sa kamatayon ni Kristo ug ikapakita kanila ang pasukaranan sa Memoryal. Madasig usab nato sila nga mosunod pag-ayo sa pagbasa sa Bibliya bahin sa Memoryal sa Abril 12 ngadto sa 17. Kini makaabag sa pagpalalom sa ilang pagpabili sa Panihapon sa Ginoo.
6 Tungod sa kahinungdanon sa pagsaulog sa Memoryal, buhaton nato ang tanan natong maarangan sa pagbulig sa uban nga makatambong. Ang mapuslanong mga pahinumdom alang sa mga ansiyano gihatag sa panid 7 niining Atong Ministeryo sa Gingharian.
7 Hinaot nga atong atubangon kining labing hinungdanong adlaw sa 1992 uban ang tin-aw nga pagsabot ug lalom nga pagpabili sa tibuok nga kahulogan sa kamatayon ni Jesus alang sa katawhan. Oo, hinaot nga kitang tanan presente sa Abril 17 sa dihang sa makausa pa ang matuod nga mga magsisimba ni Jehova matinumanong motuman sa sugo ni Jesus sa “padayong pagmantala sa kamatayon sa Ginoo, hangtod sa iyang pag-abot.”