Pagpayunir—Usa ka Pasundayag sa Gugma
1 Ang gugma kang Jehova ug sa atong isigkatawo maoy nagapalihok nato nga makig-ambit sa mas bug-os pa sa pagsangyaw nga buluhaton. Samtang ang atong gugma kang Jehova ug sa katawhan nagatubo, kita maaghat sa pagplano ug mas dako pang pakig-ambit sa ministeryo. Ang atong gugma molambo sa dihang mouswag ta sa “tukmang kahibalo” sa Pulong sa Diyos. (Filip. 1:9, 10) Sa dihang dugang pa kitang makakat-on sa kabubut-on ni Jehova, labaw pa kitang mopabili sa kadinalian sa mga panahon nga atong gikinabuhian. Kini makapasamot sa atong kabalaka sa uban. Daghan ang mipahayag sa ilang mahigugmaong kabalaka pinaagig pagsulod sa payunir nga pag-alagad.
2 Mahimo ba nimo ang gikinahanglang mga pagpasibo aron mahimong usa ka oksilyare o regular payunir? Tugotan ta, nga dili kitang tanan makapayunir. Apan ang matag usa kanato kinahanglang mag-analisar sa iyang mga kahimtang nga mainampoon. Ang pagsulod sa oksilyare o regular payunir nga buluhaton dili kalagmitan mahinabo kon ibutang sa pamasin. Ang positibong panikaysikay nga nagasumikad sa hustong pagkatukmod nga kasingkasing makaangkon sa panalangin ni Jehova. Dalha ang maong butang ngadto kang Jehova diha sa pag-ampo. Ipahayag kaniya ang tinguha sa imong kasingkasing. (1 Juan 5:14; 2 Tes. 3:1) Himoa ang matinud-anong pagtimbangtimbang sa imong mga kahimtang sa paglantaw kon diin mahimo mo ang mga pagpasibo aron maabot ang mga kinahanglanon.
3 Nakaplagan sa pipila ka Kristohanon nga sila adunay daghang gawasnong panahon nga makapayunir; busa, gikinahanglan ang ‘pagpahimulos sa kahigayonan’ gikan nianang wala kinahanglanang mga butang nga karon nagakuha sa atong panahon. (Efe. 5:15-17) Ang atong gugma sa Diyos ug sa katawhan kinahanglang magpahimo kanatong andam nga mosakripisyo sa atong pipila ka personal nga kailibgon ug kaharuhay aron ikapahayag ta ang atong gugma sa mas bug-os pa. (Mar. 12:33) Daghan sa mga butang nga atong nabatonan, ug tingali gibating normal, mahimong lantawon nga maluho sa ubang mga bahin sa kalibotan.
4 Unsa man ang mahimo sa mga ginikanan sa pagbulig sa ilang kabataan nga mamalandong niining nakatumong-Diyos nga paagi? Ang mga ginikanan kinahanglang magabutang sa teokratikanhong mga tumong sa ilang kabataan gikan sa sayong panuigon. Sa dihang sila nagakaduol sa graduwasyon sa tunghaan, sila ba nagahunahuna sa sekular nga mga tumong o espirituwal nga mga tumong? Buot tang tabangan ang atong kabatan-onan nga makasabot sa dumalayong mga kaayohan nga moabot gumikan sa pagsulod sa payunir nga pag-alagad sa sayong panuigon. Kini maoy pagtigom ug mga bahandi sa langit. (Mat. 6:19-21) Kini makapahimuot sa Diyos ug nagahatag ebidensiya sa atong pagkamaunongon ug debosyon ngadto kaniya. Ug kini nagaluwas sa mga kinabuhi sa uban.
5 Ang madayganong pakighisgot sa ubang mga payunir, sa imong magtatan-aw sa pag-alagad, o sa imong konduktor sa Pagtuon sa Libro motaganag mapuslanong mga sugyot kanimo. (Prov. 15:22; 16:3) Ang mga membro sa pamilya makadasig man usab ug makasuportar sa imong tinguha nga mahimong usa ka payunir.
6 Maoy kabubut-on sa Diyos nga ang ‘tanang matang sa mga tawo mamaluwas.’ (1 Tim. 2:4) Ikapakita ba nato nga mao usab kini ang atong kabubut-on? Makahimo ta kon kita andam nga mobutang pag-una sa mga intereses sa Gingharian. Mahimo usab nato kini pinaagig pagbaton ug pagsalig nga si Jehova motagana sa mga panginahanglan sa kinabuhi. (Mat. 6:31-33) Ang ekonomikanhong mga kahimtang mahimong mosamot pa, apan ang saad ni Jehova nga moatiman kanato dili gayod mausab.—Sal. 37:25.
7 Ang atong kaugalingong panlimbasog sa pagpakig-ambit sa pag-alagad sa ministeryo sumala sa itugot sa atong mga kahimtang maoy kapahayagan sa gugma. Alang sa pipila kini nagakahulogan sa pagkahimong usa ka regular payunir. Nganong dili buhaton ang imong tanang maarangan aron makasugod sa Septiyembre 1, 1992?