Pagbalik Uban ang Tumong sa Pagsugod ug Pagtuon sa Bibliya
1 Human sa unang pagkaplag sa usa ka interesadong tawo, gikinahanglan tang huptang buhi ang interes. Ang paghimog mga balikduaw mahimong motultol nga diretso sa mga pagtuon sa Bibliya. Tagda kining mosunod nga mga sugyot sa paghimog epektibong mga balikduaw.
Sa kataposan sa unang duaw, ikapahimutang mo ang sukaranan sa usa ka balikduaw pinaagig pagsukna:
◼ “Kanus-a man taposon sa Diyos ang pag-antos?” Sa imong pagbalik makaingon ka: “Sa miaging higayon nga dinhi ko, ang pangutana gipatungha kon kanus-a taposon sa Diyos ang pag-antos. Sa librong Creation nga akong nabilin nimo adunay tin-awng tubag sa panid 223. [Basahang mga parapo 20, 21.] Unya ania dinhi sa mga panid 224 ug 225 ang mga ebidensiya nga kita nagakinabuhi na karon sa panahon sa dihang ang Diyos molihok sa pagtapos sa tanang pag-antos.” Itanyag ang usa ka pagtuon sa Bibliya.
2 Pag-ila Niadtong Nagasunod Gayod sa Bibliya: Aron ang Diyos maanaa sa usa ka relihiyon, kinahanglan nga kini nagapatunghag tukmang mga bunga.
Sa pagsugod sa usa ka balikduaw, ikaw makasukna:
◼ “Sa unsang paagi ang relihiyon kinahanglang makaapektar sa panggawi sa usa ka tawo? Kon unsay giingon ni Jesus sa Mateo 7:17-20 nagahatag kanato ug mga paggiya nga gidahom nga mosunod ang matuod nga relihiyon. [Basaha.] Samtang minilyon ang nagaangkon nga nagatuo sa Diyos, daghan ang milimod kaniya pinaagi sa ilang mga buhat. Unsang matanga sa mga buhat ang nagapaila niadtong nagakinabuhi nga nahiuyon sa Bibliya? Ang librong Creation, sa mga panid 229 ngadto sa 231, nagahatag ug tulo ka yano nagapailang timaan.” Buksi ang libro ug sa mubo hisgoti ang tulo ka punto nga gibase sa Isaias 2:2-4, Juan 13:35, ug Mateo 24:14. Unya isugyot nga mobalik ka sa sunod semana aron tagdon kini sa mas detalyado pa.
3 Unsay anaa sa umaabot alang niadtong nagapangita sa matuod nga Diyos? Ang panaghisgot niining pangutanaha diha mismo sa librong Creation mahimong motultol sa usa ka pagtuon sa Bibliya.
Sa pagsugod sa panaghisgot, ikaw makaingon:
◼ “Uban sa ekonomikanhong mga kahimtang nga naglungtad karon, daghang mga tawo ang nabalaka bahin sa umaabot. Tugoti ako sa pagpaambit kanimo sa saad sa Diyos sa Isaias 65:21,22, 25. [Basaha.] Ang librong Creation nagatubag sa pipila ka makaiikag niini nga pangutana, sugod sa parapo 10 sa panid 238.” Ipasundayag ang kahikayan sa pagtuon sa Bibliya, nga nagagamit sa mga parapo 10-12. “Sa sunod semana buot nakong tagdon ang dugang pa niining mga saara sa Bibliya, sugod sa parapo 13.”
4 Ang paghimog mga balikduaw sa tumong nga makasugod ug pagtuon sa Bibliya nagakahulogan sa walay kataposang kinabuhi niadtong atong giwalihan.