Mga Kinahanglanon Alang sa Bag-ohan Ingon man sa Batid nga Ministro
1 Ang salmista misukna: “O Jehova, kinsa man ang mahimong dinapit sa imong tabernakulo? Kinsa man ang magapuyo sa imong balaang bukid?” Si David mitubag: “Siya nga nagalakaw nga walay-ikasaway ug nagabuhat sa pagkamatarong ug nagasulti sa kamatuoran.” (Sal. 15:1, 2) Kanang mga kinahanglanona wala mausab. Ang tanan karong adlawa nga moadto aron sa pagsimba diha sa Kristohanong kongregasyon kinahanglang mobiya sa imoral nga mga buhat ug paghuboghubog. Walay dapit taliwala sa katawhan ni Jehova alang niadtong mga palaaway, may mabangis nga mga pamuot, o nagasulting malimbongon. Bisan bag-ong mga ministro o mga batid na, kinahanglang magmatinumanon ta sa paghupot sa hataas nga mga suntoan nga gilaraw sa Pulong sa Diyos.—Gal. 5:19-21.
2 Daghang bag-ohan ang nagapakig-uban sa organisasyon ni Jehova. Sila nag-usab sa ilang panghunahuna aron ikapahiuyon ang ilang paagi sa kinabuhi ngadto sa mga kinahanglanon sa Diyos. Ang usa ka batang lalaki sa Habagatang Amerika nagtubo nga walay ginikananhong paggiya ug nakaugmad ug grabeng mga suliran sa personalidad. Sa panahon nga siya 18 na, siya nagiyan sa mga droga ug nakagugol nag panahon sa prisohan tungod sa pangawat aron masuportahan ang maong bisyo. Pinaagig pagtuon sa Bibliya, siya mihunong sa pagpakig-uban sa kanhing mga kaubanan, nakakaplag ug bag-ong mga higala taliwala sa mga Saksi ni Jehova, ug sa ulahi nagpahinungod sa iyang kinabuhi ngadto sa Diyos.
3 Sa susama, kinahanglang determinado ta nga magpahimuot sa Diyos sa tanan natong panggawi, “sa matuod nga pagkamatarong ug pagkamaunongon.” (Efe. 4:24) Kita may obligasyon sa “paghukas sa daang pagkatawo uban sa mga buhat niini” ug sa “pagsul-ob sa [atong kaugalingon] uban sa bag-ong pagkatawo, nga pinaagi sa tukmang kahibalo ginabag-o” kon kita buot nga magpabilin diha sa samag-bukid nga organisasyon sa Diyos.—Col. 3:9, 10.
4 Pulong sa Diyos, Usa ka Gamhanang Impluwensiya: Ang personalidad ni Jehova ingon sa gipadayag kanato pinaagi sa Bibliya kusganong makaapektar sa atong panghunahuna ug atong mga aksiyon sa positibong paagi. (Roma 12:2) Ang iyang Pulong may gahom sa pag-usab sa mga hunahuna ug magasusi sa mga kasingkasing. (Heb. 4:12) Ang Bibliya nagatudlo kanato nga ang kabubut-on ni Jehova nagakinahanglan nga magapanguna kita sa matarong sa moral nga kinabuhi, magbaton ug bug-os nga pakigbahin sa publikong ministeryo, ug dili magabiya sa Kristohanong mga tigom.
5 Niining masulayong mga panahon ang nagauswag nga pagpit-os makaimpluwensiya sa usa ka Kristohanon sa paglapas sa mga balaod sa Diyos. Kon ang personal nga pagtuon, pagtuon sa pamilya, mga tigom sa kongregasyon, o ang ministeryo ginapasagdan, bisan ang usa nga kanhi malig-ong Kristohanon mahimong maanod gikan sa pagtuo, hayan mahulog ngadto sa sayop nga panggawi. Maoy hinungdan nga si Pablo misulat kang Timoteo: “Tagda kanunay ang imong kaugalingon ug ang imong pagpanudlo” ug, “Pamalandonga kanunay ang akong ginasulti.”—1 Tim. 4:16; 2 Tim. 2:7.
6 Kitang tanan, kinahanglang pabiling tin-aw nga magapunting sa mga kinahanglanon sa Diyos, bug-os nga magmatimbang sa ministeryo, ug huptang malig-on ang atong paglaom kon luwason man ang atong kinabuhi. (1 Ped. 1:13-16) Ang adlaw-adlaw nga pagsunod sa matarong nga mga kinahanglanon sa Diyos bug-os gayod nga mahinungdanon.
7 Magmadeterminado nga motubo sa pagtuo ug sa pagpauswag sa pagkamabungahon diha sa ministeryo sa kanataran. (Roma 1:12) Hupti ang imong mga panghunahuna diha sa hustong mga butang pinaagig pagkamakanunayon sa personal nga pagtuon, pagtuon sa pamilya, ug pagtambong sa tigom. (Filip. 4:8) Ang imong mga panlimbasog sa pagpahimuot sa Diyos pinaagig pagkinabuhi diha sa iyang mga kinahanglanon dili gayod kay dili mamatikdan.—Col. 3:23, 24.