“Mangadto Kita sa Balay ni Jehova”
1 Si David misanong nga masiboton sa imbitasyon: “Mangadto kita sa balay ni Jehova.” (Sal. 122:1) Ang “balay” ni Jehova nianang panahona mao ang dapit nga tigomanan alang niadtong buot mosimba sa matuod nga Diyos. Karon, ang tibuok-kalibotang Kristohanong kongregasyon mao ang “balay” sa Diyos, “usa ka haligi ug tukod sa kamatuoran.” (1 Tim. 3:15) Ang tanang tagana alang sa kaluwasan mabatonan pinaagi ning maong galamiton. Tungod sa maong katarongan, “nganha niini ang tanang kanasoran magaganayan” kon buot nilang mapahimuslan ang mga panalangin sa Gingharian sa Diyos.—Isa. 2:2.
2 Kining maong “balay” naglangkob ug kapin sa 94,000 ka kongregasyon diha sa 234 ka nasod. Bukas ang mga pultahan sa mga Kingdom Hall sa tibuok kalibotan, nga may kapin sa unom ka milyon nga masibotong mga magmamantala nga nagpaabot sa imbitasyon: “Umari ka! . . . Si bisan kinsa nga may tinguha paimna sa tubig sa kinabuhi nga walay bayad.” (Pin. 22:17) Karon kita nagkinabuhi sa makuyaw nga mga panahon, nga ang kataposan niining sistemaha kusog nga nagsingabot. Busa dinalian nga ang mga tawo maningkamot sa ‘pagduol sa Diyos’ pinaagi sa pagpakigsuod sa iyang organisasyon. (Sant. 4:8) Sa unsang paagi matabangan nato sila?
3 Kabiga ang Interes Ngadto sa Organisasyon: Sukad sa atong unang kontak sa interesadong mga tawo, kinahanglang kabigon nato ang ilang atensiyon ngadto sa organisasyon. Atong ikapatin-aw kanila nga ang tanan natong nakat-onan naggikan sa organisasyon, pinaagi sa ulipon nga matang nga naghatag ug “pagkaon sa hustong panahon.” (Mat. 24:45-47) Sukad sa sinugdan, ang mga bag-ohan kinahanglang makaamgo nga ang matuod nga pagsimba naglangkit ug labaw pa kay sa lokal nga kongregasyon; dunay organisado, teokratikanhon, tibuok-kalibotan nga kapunongan nga nagalihok ilalom sa pagtultol ni Jehova.
4 Pahibal-a ang interesadong mga tawo sa adres sa lokal nga Kingdom Hall maingon man ang mga oras sa tigom. Ipatin-aw ang kalainan sa atong mga tigom ug sa relihiyosong mga tigom nga ilang natambongan sa nangagi. Abiabihon ang tanan, walay mga koleksiyon o personal nga pagpanukot ug amot alang sa mga pondo. Bisan tuod ang tinudlong mga ministro mao ang modumala sa mga programa, ang tanan may kahigayonan sa pagkomento ug pagpakig-ambit sa mga bahin sa programa. Abiabihon ang mga pamilya; ang mga bata paapilon sa atong mga panaghisgot sa Bibliya. Ang Kingdom Hall maoy simple ug walay mga kandila, larawan, o mga imahen. Mahimo mong isaysay nga kadaghanan sa mga manambong maoy mga silingan ra.
5 Kabiga ang Interes sa mga Ginatun-an sa Bibliya sa Inanay nga Paagi: Dugang pa sa pagtudlo sa kamatuoran sa Bibliya, ang pagtuon sa Bibliya angayng magtukod usab sa estudyante ug pagpabili alang sa organisasyon ni Jehova ug tabangi siya sa pagsabot sa panginahanglan nga mahimong bahin niana. Sa unang siglo, ang mga tinun-an ni Jesus nagtigom sa sinserong mga tawo ngadto sa mga kongregasyon ilalom sa usa ka sentral nga nagamandong lawas. Kadtong nakig-uban napalig-on sa espirituwal, nga nagtabang kanila sa pag-antos sa kasakitan. (Heb. 10:24, 25; 1 Ped. 5:8-10) Sa atong adlaw, maoy katuyoan ni Jehova nga “tigomon pag-usab ang tanang butang diha kang Kristo.” (Efe. 1:9, 10) Ingong resulta, kita adunay tibuok-kalibotang “kapunongan sa mga igsoon.”—1 Ped. 2:17.
6 Paggahin ug pipila ka minuto matag semana uban sa imong ginatun-an sa Bibliya sa pag-asoy o paghubit nianang maylabot sa organisasyon ug kon sa unsang paagi kini nagalihok. Makaplagan nimong makatabang ang impormasyon diha sa brosyur nga Mga Saksi ni Jehova—Kinsa Sila? Unsay Ilang Gituohan? Kining brosyura naghisgot sa pangunang mga bahin sa organisasyon ug kon sa unsang paagi makabenepisyo sa estudyante. Kon posible, mahikay usab nimo alang sa mga estudyante nga tan-awon ang video nga Jehovah’s Witnesses—The Organization Behind the Name. Kon duol ka lang sa Bethel, mahikay nimong dad-on ang imong mga estudyante aron sa pag-tour, sa ingon matabangan sila sa pagkakita mismo kon sa unsang paagi nagalihok ang organisasyon. Ang uban nagmalamposon gayod pinaagi sa paghatag sa mga estudyante ug kopya sa 2003 Tinuig nga Basahon aron basahon, sanglit kini espesipikong nagdetalye sa kasaysayan sa buluhaton dinhi sa Pilipinas. Aduna pa kamiy daghang suplay sa maong Tinuig nga Basahon sa Bethel sa Cebuano, Iloko, Iningles, ug Tagalog, busa gidasig namo ang mga ansiyano sa pag-order ug pipila ka kopya aron magamit sa mga igsoon uban sa ilang mga ginatun-an sa Bibliya.
7 Ang pagkaila sa ubang mga Saksi makatabang usab sa pagpalapad sa ilang panghunahuna bahin sa organisasyon. Dapita ang ubang mga magmamantala sa pagduyog sa inyong pagtuon sa popanahon. Tingali makauban nimo ang usa ka ansiyano aron lang mailaila. Ang paghikay nga makauban ang magtatan-aw sa sirkito o ang iyang asawa sa maong pagtuon mahimong usa gayod ka panalangin.
8 Dasiga ang mga Bag-ohan sa Pagtambong sa mga Tigom: Ang mga bag-ohan angayng makaamgo sa kahinungdanon sa pagtambong sa mga tigom. Sulayi ang pagpukaw sa ilang interes. Ipunting ang mga artikulo nga pagakobrehan sa Pagtuon sa Bantayanang Torre. Hisgoti ang ulohan sa sunod nga pakigpulong publiko. Iasoy ang mga haylayt sa materyal nga pagakobrehan sa Teokratikanhong Tunghaan sa Ministeryo ug sa Pagtuon sa Libro sa Kongregasyon. Suginli sila kon sa unsang paagi ikaw nakabenepisyo pag-ayo gikan sa pagtambong sa mga tigom ug kon nganong gibati nimo nga kinahanglang motambong niana.
9 Sa dihang motambong ang estudyante sa Bibliya, ipabati kaniya nga giabiabi. Ipailaila siya ngadto sa uban, lakip na sa mga ansiyano. Kon motambong siya sa pakigpulong publiko, ipailaila siya sa mamumulong. Isuroy siya sa Kingdom Hall. Ipatin-aw ang katuyoan sa mga lamesa sa literatura ug magasin, mga kahon sa kontribusyon, librarya, ug tinuig nga teksto. Pahibaloa siya nga ang tigomanan dili lamang balay sa pagsimba kondili sentro usab sa kalihokan sa pagsangyaw.
10 Ipatin-aw kon sa unsang paagi dumalahon ang mga tigom. Ipasiugda nga ang Bibliya maoy panguna natong teksbok ug ang atong mga publikasyon maoy atong mga tabang sa pagtuon sa Bibliya. Ipatin-aw nga ang tanang musika ug mga liriko diha sa atong songbok gikomposo sa mga Saksi ni Jehova aron gamiton sa atong pagsimba. Tagda ang nagkalainlaing kagikan sa mga manambong. Paghatag ug positibong mga komento bahin sa espiritu sa pagkamahigalaon ug pagkamaabiabihon. Kining maong maluloton nga interes mahimong usa sa labing dakong hinungdan nga makadasig sa maong estudyante sa pagtambong pag-usab.
11 Kon Nganong Magpanuko ang Uban: Kasagaran, bisag unsa pay imong buhaton, ang uban magpanuko sa pagpakigsuod sa organisasyon. Ayaw dayon pagsurender. Sabta ang ilang mga pagbati. Tingali wala sila maanad sa pagtambong ug relihiyosong mga serbisyo gawas sa espesyal nga mga okasyon. Hayan pit-oson sila sa mga membro sa pamilya o suod nga mga higala. Basin mahadlok sila sa ilang mga silingan. Gawas pa, mahimong puliki sila sa ilang materyal nga mga panginahanglan o mabalda sa sosyal nga mga pangagpas. Kinahanglang tabangan mo sila aron ilang mabatonan ang hustong panglantaw ug aron “matino ang mas hinungdanong mga butang.”—Filip. 1:10.
12 Paghatag ug Kasulatanhong mga katarongan sa paglahutay. Ipasiugda nga kitang tanan nanginahanglan sa pagdasig ug espirituwal nga pagpalig-on nga atong madawat gikan sa atong panag-ubanay. (Roma 1:11, 12) Gipatin-aw ni Jesus nga ang pagsupak sa pamilya dili balidong rason sa pagsibog. (Mat. 10:34-39) Ang personal nga mga pangagpas ug mga kabaldahan kinahanglang kontrolahon; kay kon dili kini mahimong lit-ag. (Luc. 21:34-36) Kadtong takos sa panalangin ni Jehova kinahanglang magmabug-os kalag, dili gayod taphaw. (Col. 3:23, 24) Ang pagsilsil sa pagpabili alang sa maong mga prinsipyo sa Bibliya mahimong magbukas sa dalan alang kanila sa pag-uswag sa espirituwal.
13 Abli ang mga Pultahan: Ang balay sa matuod nga pagsimba ni Jehova maoy tinuboy ibabaw sa tanang uban pa. Ang imbitasyon gipalanog sa 234 ka nasod sa tibuok kalibotan: “Umari kamo, . . . manungas kita ngadto sa bukid ni Jehova, . . . ug siya magatudlo kanato bahin sa iyang mga dalan, ug kita magalakaw sa iyang mga alagianan.” (Isa. 2:3) Ang positibong sanong sa mga bag-ohan mahimong makaluwas sa ilang kinabuhi. Ang pagkabig sa ilang interes ngadto sa organisasyon ni Jehova maoy usa sa labing maayong mga paagi nga atong mahimo sa pagtabang kanila.