Pagbantay Batok sa Sayop nga Kalulot
1 Ang katawhan ni Jehova nailhan tungod sa ilang mahinatagong espiritu. Sagad kini gipakita diha sa materyal nga paagi sa dihang atong sundogon ang Samaritano sa sambingay ni Jesus. (Luc. 10:29-37) Bisan pa niana, ang pipila nga dili angayan sa hinabang mahimong mosulay sa pagpahimulos sa atong kalulot. Busa, ang atong gugma sa uban kinahanglang mabalanse uban ang “tukmang kahibalo ug bug-os mailahong pagpanabot.”—Filip. 1:9.
2 Sulod sa Kongregasyon: Pananglitan, ang usa mahimong moingon nga siya walay trabaho o mohatag ug ubang mga katarongan sa paghangyog tabang. Usahay kining mga tawhana dili buot nga magtrabaho apan yano lamang nga magtinguha sa uban sa pagtagana kanila sa mga kinahanglanon sa kinabuhi. Nianang mga tawhana si apostol Pablo nagsugo: “Kon adunay dili buot motrabaho, ayaw usab siya pakan-a.”—2 Tes. 3:10.
3 “Ang panahon ug dili makitang panghitabo” mahitabo kanatong tanan, busa kon anaa kita sa panginahanglan sa materyal, nga nakulangan sa “atong tinapay alang niini nga adlaw,” dili kita angayng mobati ug sobrang kabalaka, tungod kay si Jehova nagatagana alang niadtong nahigugma kaniya. (Eccl. 9:11; Mat. 6:11, 31, 32) Inay sa atong pagpangayo ug salapi sa atong mga igsoon sa kongregasyon, maoy labing maayo sa pagpakigsulti sa usa sa mga ansiyano. Siya, sa baylo, sa konpidensiyal nga paagi makigsulti sa lawas sa mga ansiyano. Kining mga ansiyano mahimong nahibalo sa mga programa sa kagamhanan sa pagtaganag pag-abag ug makaarang sa pagtabang sa nanginahanglan aron makapahimulos gikan nianang mga programaha. Sa bisan unsang hitabo, ang lawas sa mga ansiyano makatimbangtimbang sa kahimtang sa matag usa nga nagahangyog tabang ug magtagad kon sa unsang paagi ang kongregasyon sa labing maayo makatabang.
4 Nagapanawng mga Mangingilad (Impostor): Ang Sosyedad padayong nagadawat ug mga taho nga ang pipila sa mga kongregasyon natikasan ug salapi ug materyal nga mga butang pinaagig nagapanawng mga mangingilad (impostor). Kini dili angayng makapatingala kanato, tungod kay ang Kasulatan nagapasidaan nga “ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.” (2 Tim. 3:13) Sagad kining maong mga mangingilad o impostor moingon nga sila natanggong ug nagakinahanglag salapi para sa pamilete ug pagkaon sa pagbiyahe balik sa puy-anan. Bisan pag maorag sinsero sila, sa kadaghanang kaso sila dili mga Saksi ni Jehova apan nagakapaaron-ingnon lamang nga mao.
5 Kon ang usa ka dumuloong mohangyog tabang, maoy maalamon ang pagkonsulta sa mga ansiyano, kinsa makatino kon kining tawhana atong igsoon ba. Ang usa ka tawag sa telepono mahimo ngadto sa kongregasyon sa usa aron ang kahimtang sa maong tawo matino. Ang tiunay nga mga igsoon nga nakakaplag sa ilang kaugalingon nga anaa sa panginahanglan makasabot nga ang maong pagpakisayod maoy alang sa pagpanalipod sa tanan nga nalangkit. Sa laing bahin, ang mga mangingilad (impostor) maladlad pinaagi niining matanga sa pagsusi. Dili kinahanglang magbaton ug sobrang pagkamatahapon sa tanan nga dili nato kaila, apan kinahanglang magbantay gayod kita batok sa mga mangingilad (impostor).
6 Ang maalamong Haring Solomon nagtambag: “Ayaw pag ihikaw ang kaayohan gikan kanila diin kini gikinahanglan, sa diha nga kini anaa sa gahom sa imong kamot ang pagbuhat niini.” (Prov. 3:27) Pinaagi sa atong maalamong pagpanabot, kita makapadayon nga maluloy-on samtang magabantay batok sa sayop nga kalulot.