Mag-oksilyare Payunir Ka ba sa Nobyembre o Disyembre?

¹ Si Jesus nagdasig sa iyang mga sumusunod sa pagtugyan sa ilang kaugalingon diha sa ministeryo, ug siya nagpasalig kanila nga ang pagbuhat niini maghatag kanilag kalipay ug daghang espirituwal nga mga panalangin. (Mat. 10:8b; Buh. 20:35) Sa miaging Nobyembre 2,307 ka indibiduwal sa Pilipinas nagpahimulos sa mga panalangin sa napauswag nga kalihokan ingong mga oksilyare payunir, samtang sa miaging Disyembre 4,307 ang nakig-ambit niining buluhatona. Makapalista ka ba ingong oksilyare payunir sa Nobyembre o Disyembre o tingali nianang duha ka bulan?​—Sal. 34:8.

² Sulod niining mga bulana ang panahon maoy sagad labawng paborable human sa panahong ting-ulan ug ilabina sa Disyembre adunay mga piyesta opisyal gikan sa eskuwelahan nga mas makapasayon sa pag-oksilyare payunir. Bisan pag ang distritong mga kombensiyon himoon hinaposan sa Disyembre, apan may tulo pa ka semana sa bulan nga magamit alang sa pag-oksilyare payunir.

³ Nganong dili maghimog positibong mga plano karon sa pag-oksilyare payunir sa Nobyembre o Disyembre? Aron magmalamposon, gikinahanglan ang maampingong pagplano. Pakigsulti sa uban nga nagpayunir bisan pag aduna silay sekular nga mga trabaho ug pamilyahanong mga kaakohan. Makabenepisyo ka sa ilang kasinatian. Duol usab kang Jehova diha sa pag-ampo, nga nagapangayo sa iyang tabang.​—Isa. 40:29-31; Sant. 1:5.

⁴ Diin posible alang sa pipila ka ansiyano ug ministeryal nga alagad sa pag-oksilyare payunir, makapadasig unya sa uban kon himoon ang pagpahibalo sa ilang pagkatudlo una pa matapos ang Oktubre. Sagad madasig ang mga igsoon sa pagpalista kon ilang masayran nga adunay mga igsoong lalaki nga magapanguna ug dili sila mag-inusara sa ilang buluhatong pagpayunir.

⁵ Walay duhaduha bahin niana, daghan ang mga kalipay niadtong magahikay nga makaalagad ingong mga oksilyare payunir. Makapahimulos ka ba niining pribilehiyoa sa Nobyembre ug Disyembre? Kon ikaw maningkamot sa pagpalapad sa imong pribilehiyo sa pagpakig-ambit sa maayong balita sa uban, si Jehova magabubo gayod kanimo sa usa ka dagayang panalangin.​—Mal. 3:10.