Pangutana

◼ Kinsa man ang mahimong gamiton sa pagbasa sa mga parapo sa Pagtuon sa Libro sa Kongregasyon ug sa Pagtuon sa Bantayanang Torre?

Ang bawtismadong mga igsoong lalaki mao ang gamiton kon anaa. Sila angayng pilion gikan sa takos nga mga ansiyano, ministeryal nga mga alagad, ug ubang bawtismadong mga igsoong lalaki sa kongregasyon. Kadtong natudlo kinahanglang larinong mobasa, uban ang tukmang kadasig, pagpasiugda sa diwa, ug pag-usab-usab sa tingog ingon sa gilaraw diha sa Giya sa Tunghaan sa Teokratikanhong Ministeryo, kapitulo 6. (Itandi ang Nehemias 8:8.) Sila usab kinahanglang sumbanan sa ilang panggawi.

Sanglit kay mas gamay man ang pagtuon sa libro, basin dili kanunay nga adunay takos, bawtismadong igsoong lalaki nga mabatonan aron mobasa. Nianang mga kahimtanga, ang tagdumala sa pagtuon mahimong mao ang magabasa sa mga parapo mismo, o mahimong hangyoon niya ang usa ka takos, bawtismadong igsoong babaye sa pagbasa. Kon ang usa ka igsoong babaye mao ang magabasa, dili na kinahanglang magpandong pa siya, tungod kay wala man siya magatudlo.

Sa Pagtuon sa Bantayanang Torre, kalagmitan gayod nga adunay takos nga mga igsoong lalaki nga mabatonan sa pagbasa. Ang tagdumala sa Pagtuon sa Bantayanang Torre angayng maghimog abanteng eskedyol sa mga magbabasa ug ibutang kana diha sa information board. Maoy responsabilidad sa tibuok lawas sa mga ansiyano ang pagpili niadtong igatudlo sa pagbasa sa Pagtuon sa Bantayanang Torre. Kon ang usa ka igsoong lalaki dili maayong mobasa, ang tagdumala sa Pagtuon sa Bantayanang Torre mao gayod ang manguna sa paghatag ug malulutong tambag ug pag-abag. Ang listahan sa mga magbabasa marebisar sa ngadtongadto segon sa gikinahanglan aron pagseguro nga mahuptan sa hataas nga sukod ang kalidad sa pagbasa. Kon ang usa ka igsoong lalaki gikuha sa listahan, angay siyang pahibaloon sa hinungdan kon ngano ug unsang mga hiyasa ang kinahanglan nilang pauswagon aron mahitakos pag-usab.

Bisan nagabasa alang sa usa ka gamayng grupo diha sa Pagtuon sa Libro sa Kongregasyon o sa tibuok kongregasyon diha sa Pagtuon sa Bantayanang Torre, ang usa nga natudlo kinahanglang ugdang nga magtuman sa iyang pribilehiyo.​—1 Tim. 4:13.