Padayong Ipunting ang Imong Hunahuna sa mga Butang sa Itaas
1 Sa pagkomento bahin sa kaliwatan karon ug sa panglantaw niini sa kaugmaon, usa ka artikulo sa The New York Times sa Disyembre 31, 1994, miingon: “Ang katawhan nahadlok sa kaugmaon. Sila nangahadlok bahin sa mga trabaho, bahin sa sakit, bahin sa ekonomiya, bahin sa mga kahimtang sa kalibotan.” Bisan asa kita molantaw, aduna ing pagbati sa walay kasegurohan maylabot sa kinabuhi. Samtang kita ingong mga Saksi ni Jehova nagaatubang sa parehong mga problema sama kanila, ang atong pagtuo ug pagsalig sa seguradong mga saad sa Pulong sa Diyos magpaarang kanato sa pagbaton ug laing panglantaw sa kinabuhi ug sa kaugmaon.—Isa. 65:13, 14, 17.
2 Ang atong pagkamasaligon ug panglantaw sa seguradong paglaom nagapahinabo sa daghang mabuot-kasingkasing nga katawhan sa pagpaminaw sa mensahe nga atong ginahatod kanila. Daghang indibiduwal kinsa nangaguol ug nangaluya nakakaplag nga makapahupay ang pakigsulti kanato. Tungod kay ilang nagustohan ang ilang napatalinghogan, ang pipila miuyon sa pagtuon sa Bibliya uban kanato. May mga panahon, hinuon, ang mga tawo buot nga mosaysay sa ilang personal nga mga problema. Samtang ang pipila ka panahon hayan magugol sa pagpatalinghog sa personal nga mga kabalaka sa usa, kinahanglang dili nato sayloan ang atong tumong, nga mao ang pagtudlo kanila sa positibong mga kamatuoran sa Pulong sa Diyos.
3 Buot gayod nato nga mahimong maluloton ngadto kanilang nabug-atan. Si Jesus nagtagana sa sulondan sa dihang siya misulti ingon sa natala sa Mateo 11:28: “Umari kanako, kamong tanan nga nagabudlay ug nabug-atan.” Buot natong palig-onon ang katawhan sa samang paagi. Matikdi, hinuon, sa kataposan sa bersikulo 28, si Jesus miingon: “Ako magapalagsik kaninyo.” Kana ang ato gayong tumong. Atong mahimo kana pinaagig pagpaambit sa makapahupay nga mga saad gikan sa Pulong sa Diyos. Ang pagkahimong maayong tigpatalinghog nagapakita sa atong personal nga interes ug hinungdanon sa pagtuman sa atong buluhatong pagwali, nga tabangan ang uban sa pagkaamgo nga ang Gingharian mao lamang ang bugtong seguradong sulbad alang sa tanang problema sa katawhan.—Mat. 24:14.
4 Ang atong buluhaton dili mao ang ila sa propesyonal nga mga eksperto sa pag-atiman sa panglawas. Hinunoa, sa gisaysay ni Pablo sa 1 Timoteo 4:6, ang atoa mao ang usa ka ministeryo sa “maayong pagtulon-an,” ang mga pagtulon-an nga makaplagan diha sa Pulong sa Diyos. Sila nga adunay personal o emosyonal nga mga problema hayan kinahanglag mapalig-on sa pagsalig kang Jehova. Tudloi silang huptan ang ilang “mga hunahuna sa mga butang sa itaas”—mga butang nga nalambigit sa paglaom sa gingharian. (Col. 3:2) Sa dihang ang mga tawo maghupot sa ilang pagtagad nga nakapunting sa Pulong sa Diyos, sila mahimong malig-on ingong resulta sa kusganong impluwensiyang ipahinabo niana sa ilang kinabuhi.—Heb. 4:12.
5 Busa ang atong tumong mao ang pagtabang sa mga tawo nga ipunting ang ilang hunahuna sa mga butang nga ‘matarong, putli, hiligugmaon, ug ginaingong maayo.’ (Filip. 4:8) Kon ilang ipunting ang ilang pagtagad sa paglaom sa Gingharian, sila usab makasinati sa kalipay nga moabot pinaagig kahibalo nga si Jehova sa kataposan magasulbad sa tanan nilang suliran pinaagi sa iyang Gingharian.—Sal. 145:16.