Pagtanyag sa Labing Bantogang Tawo nga Nabuhi Sukad
1 Sa Disyembre ato na usab nga itanyag ang Labing Bantogang Tawo nga libro sa katawhan sa atong teritoryo. Daghang tawo ang nagahunahuna bahin kang Jesus niining panahona sa tuig ug busa hayan malipay sa pagbasa sa asoy sa iyang kinabuhi ibabaw sa yuta. Unsay atong ikasulti sa pagpukaw sa interes?
2 Ania ang usa ka presentasyon nga hayan makapukaw ug interes niining bulana sa Disyembre:
◼ “Kadaghanang tawo natudloan nga si Jesus natawo sa Disyembre 25 ug nga tulo ka maalamong tawo ang mibisita kaniya niadtong panahona. Kana ba ang imong gituohan? [Tugoting motubag.] Dinhi niining libroha sa kapitulo 5 imong makita ang usa ka ilustrasyon sa iyang pagkahimugso. [Ipakita ang ilustrasyon ug basaha ang kataposang parapo.] Mahitungod sa tulo ka maalamong tawo, hayan mainteres ka niining ilustrasyona sa kapitulo 7. Imo bang namatikdan ang bisan unsang kalainan sa duha ka ilustrasyon? [Ipakita ang hulagway sa tuong bahin sa panid ug ipunting nga si Jesus niining panahona mas dako na.] Kining libroha nagahatag ug tukmang pagbatbat sa kinabuhi ug ministeryo ni Jesus. Aron imong mapahimuslan kini, ako malipay nga itanyag kining libroha kanimo sa gamay nga amot.”
3 Tungod kay anaa sa hunahuna ang pipila ka makapasubong di pa dugayng panghitabo nga nabalita, hayan makaingon ka:
◼ “Lagmit imo nang nadunggan ang bahin sa [hisgoti ang panghitabo]. Ikaw ba natingala gayod kon nganong nagakahitabo kining mga butanga karong adlawa? [Tugoting motubag.] Ang Bibliya nagrekord sa tubag ni Jesus sa maong pangutana, ug dinhi sa kapitulo 111 niining libroha gisaysay nga kining maong mga hitabo maoy ilhanan sa kataposang mga adlaw. [Ipakita ang ilustrasyon sa unang panid ug unya basaha ang kataposang parapo sa ikaduhang panid, o basaha ang Mateo 24:7, 8 gikan sa imong Bibliya.] Kini ba magpahimo natong mahadlokon? Dili, tungod kay kini nagakahulogan nga hapit nang laglagon sa Diyos ang tanang pagkadaotan ug ipahinabo ang bag-ong kalibotan. [Basahang 2 Pedro 3:13.] Sa amot nga ₱60.00 mahimong makabaton ka ug usa ka kopya aron imong mabasa kana sa imong kaugalingon.”
4 Kon imong matagboan ang usa ka ginikanan, hayan imong mapunting ang pamilya:
◼ “Kadaghanan sa mga ginikanan mouyon nga adunay daghang problema sa paningkamot nga mamentinar ang usa ka malipayong pamilyahanong kinabuhi. Unsa ang imong naobserbahan nga maoy seryosong mga babag niini? [Tugoting motubag.] Kadaghanan nato mobuhat sa labaw natong maarangan, apan kasagaran atong ginapabilhan ang tabang nga makabulig natong makab-ot ang mas maayong mga resulta. Ang Bibliya nagahatag ug ekselenteng tambag. [Basaha ang mga bahin sa Colosas 3:12, 18-21.] Kining libroha, Ang Labing Bantogang Tawo nga Nabuhi Sukad, sa kapitulo 95, nagapakita nga si Jesus naghatag ug maayong mga pagtulon-an sa kaminyoon ug sa pag-atiman sa mga kabataan. [Ablihi ang libro ug ipakita ang hulagway.] Segurado akong malipay ka sa pagbasa ning libroha sa pagkat-on ug dugang sa praktikal nga mga pagtulon-an ni Jesus.”
5 Kon kita maayong pagkaandam, mahimo natong magamit kining libroha sa ‘pag-abli sa mga Kasulatan’ ngadto sa uban diha sa paagi nga magdala kanilag dakong kalipay!—Luc. 24:32.