‘Magmasiboton sa Maayong mga Buhat’ sa Abril!
1 Sa bulan sa Abril, ang atong tumong mao nga ang tanang magmamantala makapakigbahin sa ministeryo. Makapadasig gayod kon ang tanang magmamantala niining nasora makapakig-ambit sa buluhatong pagsangyaw sa dili pa matapos ang Abril. Tungod kay ang Memoryal sa kamatayon ni Kristo lab-as pa sa hunahuna, buot gayod natong ipakita ang atong pagpabili sa pagkamaayo sa Diyos pinaagi sa pagtanyag ug direktang “halad sa pagdayeg” diha sa ministeryo sa kanataran.—Heb. 13:15.
2 Sa nahibiling bahin sa Abril, ang makugihong paningkamot angayng himoon aron maila ang mga panginahanglan sa matag membro sa kongregasyon aron ang tanan masibotong makaambit sa pagsangyaw sa dili pa matapos ang bulan. (Roma 15:1) Ang mga magtatan-aw sa pagtuon sa libro angayng bug-os mahibalo sa mga kahimtang sa mga sakop sa ilang mga grupo ug mohatag ug praktikal nga tabang kon gikinahanglan. Duna bay nagkinahanglan ug sakyanan? Kinsay makataganag sakyanan? Ang pipila ba maulawon? Ang mas eksperyensiyadong mga magmamantala mahimo bang mokuyog kaniya sa pagsangyaw? Komosta kadtong masakiton o maluyahon na? Makahimo ba sila sa pagsangyaw pinaagig telepono, pagsulat, o ubang mabungahong kalihokan?
3 Ang pipila nga nahimong dili-aktibo basin madasig pinaagi sa ilang pagpatalinghog sa pakigpulong sa Memoryal sa Abril 12. Busa maayo nga sa linain paningkamotan ang pagduol sa mga dili-aktibo nga mitambong sa Memoryal ug sugyotan nga duawon sila ug dumalahon tingali ang usa ka pagtuon sa Bibliya uban nila. Human sa Memoryal, tingali madasig sila nga maaktibo na usab ug makig-ambit sa ministeryo.
4 Bansaya ang mga Bata sa Pagpakigbahin: Daghang anak sa mga Saksi ni Jehova nagauban sa ilang mga ginikanan sa balay-balay nga pagsangyaw sulod sa daghang katuigan, bisan pag sila dili pa di-bawtismadong mga magmamantala. Panahon na ba karon nga sila makasugod ingong magmamantala? Sila ba natukmod gikan sa kasingkasing ug andam nang makahimog mapuslanong pagpakigbahin sa balay-balay nga pagsangyaw? Makatabang sa mga ulo sa pamilya ang pagrepaso sa sub-ulohang “Pagtabang sa mga Batan-on” diha sa panid 81 sa librong Organisado sa dihang ilang tinoon kon kuwalipikado na ang ilang mga anak nga mahimong mga magmamantala ug unya sundon ang paagi nga gilaraw dinha.
5 Kuwalipikadong mga Gitun-an sa Bibliya Magbuhat sa Buluhaton nga Gibuhat ni Jesus: Si Jesus wala lang magtudlo ug mga doktrina. Iyang gikuyogan ang iyang mga gitun-an diha sa ministeryo ug gitudloan sila kon unsaon pagsangyaw. (Luc. 8:1; 10:1-11) Unsa ang kahimtang karon? Kapig usa ka gatos ka libong pagtuon sa Bibliya ang ginadumala sa Pilipinas. Sa walay duhaduha, pinaagi sa nahiangayng pagdasig daghan sa maong mga gitun-an makahimo sa sunod nga lakang diha sa ilang pagbansay ug sila makuwalipikado na nga mag-alagad ingong di-bawtismadong mga magmamantala sa Abril.
6 Kon ikaw nagadumalag usa ka pagtuon sa Bibliya, palandonga kining mga pangutanaha: Nagauswag ba ang gitun-an, nga nahiuyon sa iyang edad ug abilidad? Nagsugod na ba siya sa pagpakig-ambit sa iyang pagtuo sa di-pormal nga paagi sa uban? Nagasul-ob na ba siya sa “bag-ong pagkatawo”? (Col. 3:10) Nakakab-ot na ba siya sa mga kuwalipikasyon alang sa di-bawtismadong mga magmamantala, nga gipahayag sa mga panid 79-81 sa librong Organisado? Kon nagtuo ka nga siya kuwalipikado na, nganong dili kana hisgotan uban niya? Ang pipila ka gitun-an naghulat lang nga direktang dapiton nga makig-ambit sila sa pagsangyaw. Hinuon, kon ang gitun-an gusto nang mosangyaw, kinahanglan unang hikayon sa naandang paagi sa nagadumalang magtatan-aw ang usa ka panaghisgot uban sa duha sa mga ansiyano. Sa laing bahin, basin adunay butang nga nakapugong sa gitun-an. Tingali ang usa sa mga ansiyano makauban kanimo sa pagtuon sa Bibliya ug pasultihon ang gitun-an kon unsay iyang mga pagbati bahin sa kamatuoran. Human sa pagpatalinghog sa isulti sa gitun-an, ang ansiyano basin makahatag ug praktikal nga mga sugyot, uban ang Kasulatanhong tabang.
7 ‘Palita ang Panahon’ Aron Makaoksilyare Payunir: Kada tuig sa panahon sa Memoryal, ang pagkamapasalamaton alang sa halad lukat nagtukmod sa kaliboan sa ‘pagpalit’ sa panahon aron makaoksilyare payunir. (Efe. 5:15-17) Bisan pag gikinahanglan ang pipila ka pagsakripisyo, talagsaon ang mga balos. Gipahimuslan sa daghang batan-on ang tingbakasyon sa tunghaan sa pag-oksilyare payunir. Ang mga hingkod nga adunay bug-os-panahong trabaho nagagamit sa bug-os sa mga gabii ug hinapos sa semana diha sa mao mismong kalihokan. Sanglit ang Abril karong tuiga adunay lima ka Sabado ug lima ka Dominggo, walay duhaduha nga daghan ang makahimo niini. Kon wala ka makapalista ingong payunir sa Abril, nganong dili magplano sa pagpayunir sa Mayo aron mapadayon nimo ang paghaling sa interes nga nakaplagan sa Abril?
8 Makaoksilyare payunir ka man o dili, pangitag mga paagi aron mapauswag ang imong pag-alagad sa kanataran sa bulan sa Abril. Pagbutang ug personal nga tumong sa imong kaugalingon, usa ka tumong nga nagkinahanglag paningkamot sa pagkab-ot apan arang makab-ot. Panalanginan ni Jehova ang imong tinguha nga ‘maggasto ug bug-os nga magasto’ diha sa pag-alagad kaniya, sumala sa imong personal nga mga kahimtang.—2 Cor. 12:15.
9 Mga Tigom Alang sa Pagsangyaw sa Kanataran: Ang mga tigom alang sa pagsangyaw sa kanataran angayng hikayon kada adlaw kon mahimo sa bulan sa Abril. Ang pagsangyaw sa gabii angay usab nga hikayon. Ang kadaghanang magmamantala mosangyaw sa kanataran sa mga hinapos sa semana, busa ang mga kongregasyon angayng mag-eskedyul ug mga tigom alang sa pagsangyaw sa kanataran sa ma-Sabado, sa buntag ug sa hapon.
10 Mga Ansiyano—Gikinahanglan ang Maayong Pagplano: Kon posible, maayong makobrehan ang tibuok teritoryo sa kongregasyon sa mga bulan sa Abril ug Mayo. Angayng hatagan ug espesyal nga pagtagad ang pagkobre sa komersiyal nga teritoryo nga giasayn sa kongregasyon. Kadtong mokobre niana angayng maandam pag-ayo ug hapsayg pamesti. Dili kinahanglan ang komplikadong presentasyon. Sa dihang moduol sa usa ka negosyante, makaingon ka nga ikaw sagad dili makahibalag ug mga negosyante diha sa balay, mao nga ikaw nagaduaw diha sa iyang opisina o tindahan aron sa pagtanyag sa usa ka artikulo nga seguradong makapaikag kaniya. Unya makapahayag ka sa mubo ug tino nga punto diha sa magasin. Ang pagsangyaw sa kadalanan uban ang mga magasin angay usab nga hustong pagkaorganisar sulod sa teritoryo sa kongregasyon. Mahimong adunay ubang mga dapit diha sa inyong teritoryo nga makobrehan sa bulan sa Abril, sama sa mga erport, mga ospital, mga parkinganan, mga parke, ug mga balay sa tigulang. Ang lawas sa mga ansiyano magtino kon unsang nahiangayng mga kahikayan ang mahimo aron masangyawan ang maong mga teritoryo sa inyong kongregasyon.
11 Si Jehova maoy usa ka magbubuhat nga dili kapoyon. (Juan 5:17) Iyang gilalang ang mga langit ug ang yuta ingon man ang mga tanom ug mga hayop; apan siya nagpadayon sa pagbuhat hangtod nga iyang gilalang ang iyang kinalabwang nalalang sa yuta—ang tawo. Ang kamatuoran nga kita adunay kinabuhi maoy direktang resulta sa kaandam sa Diyos sa pagbuhat. Ingong “mga tigsundog sa Diyos,” angay kitang matukmod sa atong gugma kaniya aron ‘magmasiboton sa maayong mga buhat.’ (Efe. 5:1; Tito 2:14) Sanglit si Jehova takos nga modawat sa atong kinamaayohang paningkamot ug sanglit ang tinguha sa pagbaton ug mga resulta maoy kinaiyahan niadtong masiboton, angay kitang maikag sa pagbuhat ug dekalidad nga pag-alagad. Siyempre, pabilhan ni Jehova ang bisan unsang pagsakripisyo nga atong himoon alang kaniya, ug ang atong buluhaton dili gayod makawang. (1 Cor. 15:58) Busa, uban sa mapasalamatong mga kasingkasing, magkugi kita sa masibotong kalihokan sa bulan sa Abril, nga magmasaligon sa pag-uyon ug pagpanalangin ni Jehova ug sa dagayang kalamposan!