Sundoga ang Ilang Pagtuo
1 Ang apostol nga si Pablo naghubad sa pagtuo ingong “ang may katinoan nga pagdahom sa mga butang nga gilaoman, ang tataw nga pagpanghimatuod sa mga katinuoran bisan tuod wala makita.” Siya midugang nga “kon walay pagtuo imposible sa pagpahimuot [sa Diyos] pag-ayo.” (Heb. 11:1, 6) Si Pablo nag-awhag nato sa pagpasundayag ug pagtuo, manag-awas niana, tinguhaon kana.—2 Cor. 4:13; Col. 2:7; 2 Tim. 2:22.
2 Adunay daghang talagsaong mga panig-ingnan sa pagtuo nga gitala sa Bibliya. Sa Hebreohanon 11, si Pablo mihatag ug taas nga talaan sa mga saksi nga nagpasundayag ug di-mabungkag nga pagtuo. Lakip niining talaana mao si Abel, kinsa maoy unang gimartir tungod sa iyang pagtuo. Si Noe gitala tungod kay pinaagi sa iyang pagtuo siya nagpakitag diyosnong kahadlok sa pagluwas sa iyang panimalay. Si Abraham gidayeg tungod sa iyang pagtuo ug pagkamasinundanon. Si Moises gidayeg tungod kay pinaagi sa iyang pagtuo siya padayong malig-on nga daw nakita ang Usa kinsa di-makita. Pagkamapasalamaton gayod nato nga atong mapalig-on ang atong pagtuo pinaagi sa pagrepaso sa ilang “balaang mga buhat sa panggawi ug mga buhat sa diyosnong pagkamahinalaron”!—2 Ped. 3:11.
3 Sa unang siglo, giduso ni Jesus ang pangutana: “Sa dihang ang Anak sa tawo moabot, makaplagan ba gayod niya ang pagtuo dinhi sa yuta?” (Luc. 18:8) Buweno, aduna ba kitay buhing mga panig-ingnan sa pagtuo sa atong taliwala karong adlawa? Makaplagan ba nato ang mga lalaki ug mga babayeng nagapakitag di-matarog nga pagtuo kang Jehova ingon nga kana tinuod sa katawhan sa Diyos sa kapanahonan sa Bibliya?
4 Modernong-Adlawng mga Sulondan sa Pagtuo: Ang talagsaong mga sulondan sa pagtuo anaa ra sa atong palibot! Ang pagtuo sa mga magtatan-aw nga nagapanguna taliwala kanato maoy takos sundogon. (Heb. 13:7) Apan dili sila lamang ang sumbanan sa pagtuo. Nakigduyog sa matag kongregasyon mao ang mga maunongon kinsa adunay taas nga rekord sa matinumanong pag-alagad kang Jehova, nga sagad gipasundayag ubos sa lisod kaayong mga kahimtang.
5 Ato gayong dayegon ang atong matinumanong mga igsoong babaye kinsa, sa katuigan, milahutay sa pagsupak gikan sa masupakong mga bana. Kinahanglang atubangon sa nag-inusarang mga ginikanan ang hagit sa pag-atiman sa mga anak. Anaa ang edaran nga mga balong babaye sa atong taliwala nga wala gayod masipyat sa kalihokan sa kongregasyon bisan tuod sila tingali wala ing mga membro sa pamilya nga motabang kanila. (Itandi ang Lucas 2:37.) Matingala kita sa pagtuo kanilang nagalahutay sa dugay nang mga problema sa panglawas. Daghan ang padayong nagaalagad nga maunongon bisan tuod sila adunay mga limitasyon nga nagpapugong kanilang matudlo sa dugang mga pribilehiyo sa pag-alagad. Adunay batan-ong mga Saksi kinsa maisogong nagpasundayag sa pagtuo bisan pa sa pagsupak diha sa eskuylahan. Ang atong diyosnong debosyon magamalig-on pa samtang atong panid-an ang kasaligang mga payunir kinsa nagaantos sa matag tuig atubangan sa di-maihap nga mga gumonhap.
6 Kining mga sumbanana sa mga matinumanon nagahatag kanatog paghupay ug kadasig. (1 Tes. 3:7, 8) Maayo alang kanato nga sundogon ang ilang pagtuo tungod kay “kadtong nagabuhat sa kamatuoran maoy kalipay kang [Jehova].”—Prov. 12:22.