Lakaw Pinaagig Pagtuo
1 Minilyong katawhan nagahimo sa materyal nga mga kabtangan nga maoy sentro sa ilang mga kinabuhi, binuang nga misalig sa malimbongong gahom sa mga bahandi. (Mat. 13:22) Giagda kitang kab-oton ang mas maalamong dalan, nga maningkamot sa espirituwal nga mga bahandi. (Mat. 6:19, 20) Nagapasabot kini sa ‘paglakaw pinaagig pagtuo.’—2 Cor. 5:7.
2 Ang pulong “pagtuo” sa Grego nagapasabot sa kahulogang pagpiyal, pagsalig, lig-ong pangdani. Ang paglakaw pinaagig pagtuo nagakahulogan sa pag-atubang sa lisod nga mga kahimtang uban ang pagsalig sa Diyos, nga nagasalig sa iyang katakos sa pagtultol sa atong mga lakang. Gipahiluna ni Jesus ang hingpit nga sumbanan; padayon niyang gipunting kon unsay tinuod nga hinungdanon. (Heb. 12:2) Sa susama, kinahanglan natong padayong ipunting ang atong mga kasingkasing sa di-makita, espirituwal nga mga butang.—2 Cor. 4:18.
3 Angay usab kitang madani pag-ayo nga si Jehova ang nagamando sa iyang makitang organisasyon ubos sa pagtultol sa “kasaligan ug mabuot nga ulipon.” (Mat. 24:45-47) Atong ginapasundayag ang atong pagtuo sa dihang kita ‘magmasinugtanon kanilang nagapanguna’ sa kongregasyon. (Heb. 13:17) Ang mapainubsanong pakigtambayayong sa teokratikanhong kahikayan nagapakita sa atong pagsalig kang Jehova. (1 Ped. 5:6) Angay natong ihatag ang kinasingkasing nga pagpaluyo sa buluhaton nga gihatag sa organisasyon nga buhaton. Magpasuod kini kanato sa atong mga igsoon diha sa kusganong bugkos sa gugma ug panaghiusa.—1 Cor. 1:10.
4 Kon Unsaon sa Pagpalig-on sa Pagtuo: Dili nato tugotang magaurong ang atong pagtuo. Angay kitang makigbisog sa pagpalig-on niana. Ang pagkamakanunayon sa pagtuon, pag-ampo, ug pagtambong sa tigom makatabang kanato sa pagpalig-on sa atong pagtuo aron nga, uban sa tabang ni Jehova, makabarog kini sa bisan unsang pagsulay. (Efe. 6:16) Nakatukod ka ba ug maayong rutina sa pagbasa sa Bibliya matag adlaw ug pagpangandam sa mga tigom? Sagad ka bang nagapamalandong kon unsay imong nakat-onan, ug nagaduol ka ba kang Jehova sa pag-ampo? Nabatasan ba nimong motambong sa tanang tigom ug mopakig-ambit niana?—Heb. 10:23-25.
5 Ang lig-ong pagtuo mapamatud-an sa maayong mga buhat. (Sant. 2:26) Nangita ka bag mga kahigayonan nga ipaambit ang maayong balita? Mapasibo ba nimo ang imong mga kahimtang aron makabuhat pa ug dugang sa ministeryo? Gipadapat ba nimo ang mga sugyot nga atong nadawat sa pagpauswag sa kalidad ug kaepektibo sa atong ministeryo?
6 Si Jesus mipasidaan bahin sa sobrang pagkalangkit sa matag adlaw nga mga kalihokan sa kinabuhi ug pagtugot sa materyalistikanhon o hinakog nga mga interes nga makapahanap sa atong espirituwal nga panglantaw. (Luc. 21:34-36) Angay kitang estriktong magbantay kon sa unsang paagi kita magalakaw aron malikayan ang pagkadaot sa atong pagtuo. (Efe. 5:15; 1 Tim. 1:19) Kitang tanan nagalaom nga sa kataposan kita makapahayag nga atong ‘nabugno na ang maayong bugno, nakadagan na hangtod sa pagkatapos, ug nakasunod na sa pagtuo.’—2 Tim. 4:7.