Ang Memoryal—Usa Ka Hitabo nga Hinungdanon Kaayo!
1 Sa Dominggo, Marso 23, human sa pagsalop sa adlaw, atong saulogon ang Memoryal sa kamatayon ni Kristo. (Luc. 22:19) Usa gayod kini ka hitabo nga hinungdanon kaayo! Pinaagig paghupot sa iyang integridad kang Jehova hangtod sa kamatayon, gipamatud-an ni Jesus nga posible alang sa usa ka tawo ang pagmentinar ug hingpit nga diyosnong debosyon bisan ubos sa grabeng pagpig-ot, nga sa ingon nagabayaw sa pagkahusto sa pagkasoberano ni Jehova. (Heb. 5:8) Dugang pa, ang kamatayon ni Kristo nagtagana sa hingpit tawhanong halad nga gikinahanglan sa paglukat sa katawhan, nga nakapaposible alang niadtong kinsa maghupot sa pagtuo nga mabuhi sa walay kataposan! (Juan 3:16) Pinaagig pagtambong sa Memoryal, ikapasundayag nato ang atong kinasingkasing nga pagpabili sa gugma ni Jehova ug sa halad ni Jesus alang kanato.
2 Ang tanan gidasig sa pagsunod sa programa sa pagbasa sa Bibliya nga gieskedyul sa Marso 18-23, ingon sa gipakita sa 1997 Calendar of Jehovah’s Witnesses. Usab, ang panaghisgot sa pamilya sa mga kapitulo 112-16 sa libro nga Ang Labing Bantogang Tawo nga Nabuhi Sukad motabang kanato sa pagsentro sa atong pagtagad sa labing importanteng semana sa tawhanong kasaysayan.
3 Makadugang ka ba sa panahon nga imong gugolon sa ministeryo sa kanataran sa panahon sa Memoryal? Haom alang sa kongregasyon sa paghikay ug napalapad nga mga kalihokan sa pag-alagad sa kanataran sulod sa mga adlaw una pa o human sa Memoryal. Daghang magmamantala ang mopahimulos sa bug-os sa lima ka hinapos sa semana sa Marso diha sa pag-alagad ingong mga oksilyare payunir. Nganong dili mahimong usa kanila? Kitang tanan makaambit sa bug-os sa pagpasiugda sa importansiya sa pagtambong sa Memoryal. Sanglit matunong kini sa Dominggo, mas sayon alang sa daghan ang pagtambong. Tinoa nga madapit ang tanang estudyante sa Bibliya ug ubang mga interesado nga makaduyog kanato. Ipaambit kanila kon unsay giingon sa panid 127, parapo 18, sa Kahibalo nga libro maylabot sa usa ka adlaw sa tuig nga ginamatikdan pag-ayo.
4 Ang mga ansiyano kinahanglang magplano nga abante sa pagtino nga ang Kingdom Hall hapsay ug hinlo. Kinahanglang himoon ang mga kahikayan sa usa aron mabatonan ang mga emblema. Ang pagpasa sa mga emblema kinahanglang organisado kaayo. Ang makatabang nga mga sugyot kon unsaon nga kita makapasundayag ug pagtahod alang sa Panihapon sa Ginoo gihatag sa Ang Bantayanang Torre sa Agosto 15, 1985, panid 19 (Pebrero 15, 1985 sa Ingles).
5 Paabota kining labing dakong hitabo sa 1997 uban ang lalom nga pagpabili sa bug-os nga kahulogan sa kamatayon ni Jesus alang kanato. Tambong sa gabii sa Marso 23, sa dihang ang tinuod nga mga Kristohanon bisan diin matinumanong magsaulog sa Memoryal.