Mga Saksi ni Jehova—Matuod nga mga Tig-ebanghelyo
1 Gitugyan ni Jesu-Kristo ang kaakohan sa pag-ebanghelyo diha sa iyang tanang tinun-an, nga tinong nagtultol kanila sa pagsangyaw sa maayong balita sa Gingharian. (Mat. 24:14; Buh. 10:42) Gipahiluna sa iyang unang mga tinun-an ang sumbanan niini samtang sila mipahayag bahin sa Gingharian nga walay hunong—dili lamang diha sa mga dapit sa pagsimba apan bisan diin nga ilang gikahibalag ang mga tawo diha sa publiko ug sa pamalaybalay. (Buh. 5:42; 20:20) Ingong mga Saksi ni Jehova karong adlawa, atong gipamatud-an ang atong kaugalingon nga matuod Kristohanong mga tig-ebanghelyo, nga nagasangyaw sa mensahe sa Gingharian sa 232 ka kayutaan ug nagbawtismo sa kapin sa usa ka milyon ka bag-ong mga tinun-an sulod lamang sa miaging tulo ka tuig! Nganong malamposon kaayo ang atong buluhaton sa pag-ebanghelyo?
2 Nagabasig Kanato ang Maayong Balita: Ang mga tig-ebanghelyo maoy mga magsasangyaw, o mga mensahero, sa maayong balita. Sanglit ingon niana, kita adunay makapadasig nga pribilehiyo sa pagpahibalo sa Gingharian ni Jehova—ang bugtong tinuod nga maayong balita nga ikatanyag sa masulub-ong katawhan. Kita masiboton bahin sa abanteng kahibalo nga atong naangkon maylabot sa bag-ong mga langit nga sa pagkamatarong magmando sa bag-ong yuta nga langkoban sa matinumanong katawhan sa umaabot nga Paraiso. (2 Ped. 3:13, 17) Kita lamang ang misagop niining paglaoma, ug kita maikagon sa pagpaambit niana ngadto sa uban.
3 Ang Matuob nga Gugma Nagapasibot Kanato: Ang pag-ebanghelyo maoy nagaluwas-kinabuhing buluhaton. (Roma 1:16) Mao kanay hinungdan kon nganong kita makasinatig dakong kalipay sa pagpakaylap sa mensahe sa Gingharian. Ingong matuod nga mga tig-ebanghelyo, kita nahigugma sa mga tawo, ug kana nagapalihok kanato sa pagpaambit sa maayong balita ngadto kanila—sa atong mga pamilya, mga silingan, mga kaila, ug sa daghang uban pa kutob sa maarangan. Ang pagbuhat niining buluhatona nga bug-os kalag maoy usa sa labing maayong mga kapahayagan nga atong mahimo maylabot sa atong matuod nga gugma alang sa uban.—1 Tes. 2:8.
4 Ang Espiritu sa Diyos Nagapaluyo Kanato: Ang Pulong sa Diyos nagapasalig kanato nga kon atong buhaton ang atong buluhaton sa pagtanom ug pagbisibis sa binhi sa Gingharian, si Jehova maoy ‘magapatubo niini.’ Ingon gayod niana ang atong makita nga nagakahitabo sa atong organisasyon karon. (1 Cor. 3:5-7) Ang espiritu sa Diyos mao ang nagapaluyo kanato sa atong kalihokan sa pag-ebanghelyo ug nagahatag kanatog dakong kalamposan.—Joel 2:28, 29.
5 Tungod sa pagdasig diha sa 2 Timoteo 4:5 nga “himoa ang buluhaton sa usa ka tig-ebanghelyo,” hinaot nga ang atong gugma sa tanang tawo magpasibot kanato sa pagpaambit sa makapadasig nga maayong balita sa Gingharian sa matag higayon, masaligon nga si Jehova padayong magapanalangin sa atong buluhaton.