Pagkamaayo nga Kanunay nga Makatambong!
1 Sulod sa mga dekada sa Sidlakang Uropa, daghan sa atong minahal nga mga igsoon gidid-an sa pagtigom sa publiko. Handurawa ang ilang kalipay sa dihang ang mga pagdili gihanaw ug sila makatigom na nga gawasnon!
2 Bahin sa iyang duaw sa usa sa maong kongregasyon, usa ka magtatan-aw sa sirkito misulat: “Sa gabii sa Martes, sa pagsugod gayod sa akong duaw, ang sistema sa pagpainit nadaot. Sa gawas, ang temperatura nagpabilin sa pagyelo, ug sa sulod, kadto mga 5 grado Celsius lamang. Ang mga igsoon naglingkod nga nagsul-ob sa ilang mga kapote, mga torong, mga guwantes, mga kalo, ug mga botas. Walay usang makasunod sa pagbasa sa Bibliya, tungod kay imposible ang pagpakli sa mga panid. Nagbarog sa plataporma sa akong gisul-ob, ako mituskig, ug matag panahon nga ako misulti, akong makita ang alisngaw sa akong gininhawa. Apan ang nakapahingangha kanako mao nga wala akoy nadunggang bisan usa ka pulong sa reklamo. Ang tanang igsoon miingon nga pagkamaayo ug pagkaanindot nga makatambong!” Kadtong mga igsoona wala gani maghunahuna nga pakyason ang maong tigom!
3 Ingon ba Niana ang Atong Gibati? Ato bang gimahal ang kahigayonan sa pagtambong gayod sa atong senemanang mga tigom? O kita ba wala ing pagpabili sa mga tigom sa dihang ang mga kahimtang maayo? Ang makanunayong pagtambong sa mga tigom tingali dili sayon, ug adunay mga panahon tingali nga kita may hustong rason sa dili pagtambong. Apan, ayaw gayod kalimot nga sa atong taliwala anaa silang bisan pa sa pagkatigulang, grabeng mga suliran sa panglawas, pisikal nga mga kakulian, hagong mga eskedyul sa trabaho, ug ubang seryosong mga responsabilidad nakasabot sa kabililhon sa mga tigom ug halos kanunay nga makatambong. Pagkamaayong mga panig-ingnan alang kanato nga sundogon!—Itandi ang Lucas 2:37.
4 Atong himoon kining kinaiya nga paluyohan ang matuod nga pagsimba pinaagig pagtambong sa atong tanang Kristohanong tigom, gikan sa gamayng grupo sa pagtuon sa libro ngadto sa usa ka dakong kombensiyon. Nganong kinahanglang motambong ta niining mga tigoma sa seryoso gayong paagi? Tungod kay kini maoy balaang sugo nga kita magtigom. Apan adunay ubang hinungdanong mga rason. Kitang tanan nagkinahanglan sa mga kaayohan sa balaang instruksiyon ug sa tabang sa balaang espiritu, nga madawat diha sa mga tigom. (Mat. 18:20) Kita mapalig-on pinaagig pagbayloay ug pagdasig sa dihang makig-uban sa atong mga igsoon.—Heb. 10:24, 25.
5 Didto sa pagkausab sa hitsura, si Pedro miingon, “Maestro, maayo nga ania kami dinhi.” (Luc. 9:33) Kinahanglang sama niana ang atong pagbati maylabot sa atong tanang Kristohanong tigom. Sa pagkatinuod, pagkamaayo nga kanunay nga makatambong!