Karon na ang Panahon
1 Usa ka tuig human ang kongregasyon sa Corinto nakahukom sa pagtaganag hinabang sa nanginahanglang mga igsoon sa Jerusalem, wala gihapon nila makompleto kining proyektoha. Busa giagda sila ni Pablo: “Ipadayon ug humana kana; magmasiboton sa pagtapos sa plano sanglit inyong gisagop kana.”—2 Cor. 8:11, The New English Bible.
2 Sa nagkalainlaing mga panahon, kitang tanan nakapahilunag mga tumong alang sa atong kaugalingon. Kita tingali nakahukom sa pagpauswag sa atong ministeryo sa kanataran, sa pagsinati pag-ayo sa atong mga igsoon, sa pagkuwalipikar sa usa ka pribilehiyo sa pag-alagad, o sa pagbuntog sa pipila ka kahuyangan. Bisan tuod nagsugod kita nga may maayong mga intensiyon, wala tingali kita mopadayon sa pagkab-ot sa atong tumong. Mahimo ba nga kinahanglang ipadapat ta sa atong kaugalingon ang tambag nga “ipadayon ug humana” ang atong nasugdan?
3 Pagkab-ot sa Atong mga Tumong: Sa dihang atong gipahiluna ang atong mga tumong alang sa tuig sa pag-alagad, kinahanglang andamon ta ang atong hunahuna sa pagpalampos niini sa walay paglanganlangan. Kinahanglanon ang personal nga organisasyon. Hinungdanon ang paggahin ug panahon nga gikinahanglan sa pagpalampos sa atong giplano ug tinoon nga gamiton ang panahon alang sa maong katuyoan. Maayong magtakda ug tinong panahon sa pagbuhat niana ug dayon disiplinahon ang kaugalingon aron sa pagtino nga kini mahimo sa maong panahon.
4 Tungod sa daghan kaayong kabaldahan sa atong mga kinabuhi, ang atong mga tumong daling mahanap. Ang tinuyong paningkamot gikinahanglan sa paghinumdom niana. Ang paghupot niana sa atong mga pag-ampo makatabang. Ang pagnota niana diha sa atong kalendaryo magpahinumdom kanato sa pagsusi sa atong pag-uswag. Kinahanglang modesider ang usa ka tawo aron ‘buhaton ang sumala sa iyang gikahukom diha sa iyang kasingkasing.’—2 Cor. 9:7.
5 Ang bulan sa Oktubre maoy maayong kahigayonan sa pagsentro sa atong mga tumong. Daghan ang mag-oksilyare payunir ning bulana. Atong itanyag ang mga suskrisyon sa Ang Bantayanang Torre ug Pagmata! Makapahiluna ba kitag pipila ka makataronganong mga tumong aron kab-oton ning bulana? Komosta ang bahin sa pagsulay sa pagpauswag sa atong pagpahilunag mga magasin? Ang paghukom sa paghimog dugang mga balikduaw ug sa pagsugod ug usa ka bag-ong pagtuon sa Bibliya mahimong makataronganong mga tumong alang sa daghan.
6 Dili maalamon nga unyaunyaon kon unsay hinungdanon, sanglit kini nga “kalibotan nagataliwan.” (1 Juan 2:17) Daghang panalangin diha sa pag-alagad kang Jehova ang atong mabatonan karon. Anaa ra kanato ang pagpahimulos niana.