Mga Pahibalo
◼ Tanyag nga literatura sa Enero: Daandaang mga libro maoy itanyag, ilabina ang Nahiusa sa Pagsimba sa Bugtong Matuod nga Diyos sa ₱25.00. Ang gamay nga edisyon sa Mabuhing Walay Kataposan nga libro mahimong itanyag usab sa ₱20.00 kon aduna. Pebrero: Ang Sekreto sa Kalipay sa Pamilya sa ₱25.00. Marso: Ang Kahibalo nga libro sa ₱25.00. Abril ug Mayo: Usa ka tuig nga suskrisyon sa Ang Bantayanang Torre sa ₱120.00. MATIKDI: Ang mga kongregasyon nga wala pa makaorder sa nahisgotan-sa-ibabaw nga kampanya sa mga basahon kinahanglang maghimo na niana sa ilang sunod nga binulang Literature Order Form (S-AB-14).
◼ Ang mga kongregasyon kinahanglang maghimog mga kahikayan sa pagsaulog sa Memoryal niining tuiga sa Huwebes, Abril 1, 1999, human sa pagsalop sa adlaw. Bisag ang pakigpulong masugdan ug sayosayo, ang pagpasa sa mga emblema sa Memoryal kinahanglang dili magsugod hangtod human sa pagsalop sa adlaw. Bisan tilinguhaon nga ang matag kongregasyon maghimo sa kaugalingong pagsaulog sa Memoryal, kini tingali dili kanunayng posible. Diin ang pipila ka kongregasyon normal nga nagagamit sa samang Kingdom Hall, tingali usa o kapin pang kongregasyon ang makagamit ug laing pasilidad sa maong gabii.
◼ Ang espesyal nga pakigpulong publiko alang sa 1999 nga panahon sa Memoryal igahatag sa Dominggo, Abril 18. Kini nag-ulohag “Tinuod nga Panaghigalaay Uban sa Diyos ug sa Silingan.” Ang laraw itagana sa mga mamumulong sa hustong panahon. Kadtong mga kongregasyon nga dunay duaw sa magtatan-aw sa sirkito, sirkitong asembliya, o adlawng espesyal nga asembliya nianang hinapos sa semana maghimo sa espesyal nga pakigpulong sa pagkasunod semana. Walay kongregasyon ang maghimo sa espesyal nga pakigpulong antes ang Abril 18, 1999.
◼ Sanglit ang Abril ug Mayo maoy espesyal nga mga bulan sa magasin ug daghan ang makig-ambit sa buluhatong oksilyare nga pagpayunir sa maong panahon, ang magtatan-aw sa pag-alagad ug ang igsoong lalaki nga natudlo sa mga magasin angayng magtagad na karon sa pag-order ug ekstrang mga magasin nga magamit sa kongregasyon. Palihog ipadala ang inyong mga order aron modangat kini sa sangang buhatan nga dili maulahi sa Pebrero 1, 1999. Magseguro kini nga inyong madawat ang ekstrang mga magasin sa samang panahon sa inyong regular nga order.
◼ Eskedyul sa Pagtuon sa Libro sa Kongregasyon: Ang tanang Cebuano, Hiligaynon, Iloko, ug Tagalog nga mga kongregasyon magtuon pag-usab sa librong Ang Labing Bantogang Tawo nga Nabuhi Sukad sa mga pagtuon sa libro sa kongregasyon sugod sa semana sa Marso 22-28, 1999. Sugod sa maong semana, ang tanang Bicol, Pangasinan, ug Samar-Leyte nga mga kongregasyon magtuon sa Kahibalo nga libro.
◼ Sulat Ngadto sa Tungang Sidlakan: Gumikan sa mga suliran sa seguridad sa Muslim nga mga nasod, gihangyo nga ang bisan unsang sulat gikan sa mga kongregasyon maylabot sa Publisher Record nga mga kard, ubp., ipadala deretso sa buhatan sa Britanya o sa buhatan sa Pilipinas aron iporward ngadto sa Britanya. Ang tanang sulat kinahanglang sa Ingles kon ipadala deretso sa Britanya ug ang kongregasyon nga modawat sa sulat kinahanglang dayag nga makita. Ang buhatan sa Britanya mopadala dayon sa materyal ngadto sa natungdang kongregasyon, ug magpasibo sa bisan unsang pagkasulat nga hayan magpameligro sa mga igsoon didto. Kini nga kahikayan mapadapat sa Bahrain, Kuwait, Oman, Qatar, Saudi Arabia, ug sa United Arab Emirates.
◼ Ang Sosyedad aduna na karon sa enterong set sa Kingdom Melodies on Compact Discs, Num. 1 ngadto sa 8. Ang matag usa niining walo ka compact disc mahimong orderon sa amot nga ₱100.00, o ang enterong set mahimong orderon sa ₱800.00.