Ang Pagsangyaw Nagpalahi Kanato
1 Daghang tawo mosukna, “Unsay nagpalahi sa mga Saksi ni Jehova gikan sa ubang mga relihiyon?” Unsaon nimo pagtubag? Mahimo nimong ipatin-aw ang pipila sa atong pinasukad-sa-Bibliya nga mga pagtulon-an. Apan gihunahuna ba usab nimo ang pagpunting kon unsa ka dako nga ang atong publikong ministeryo nagpalahi kanato gikan sa ubang mga relihiyon?—Mat. 24:14; 28:19, 20.
2 Karong adlawa, dili daghang relihiyosong mga tawo ang mibating natukmod nga ipaambit ang ilang mga tinuohan sa uban. Sila tingali maghunahuna nga igo na ang pagsugot sa mga balaod ni Cesar, sa pagkinabuhing desente sa moral nga paagi, o sa paghimog mabinationg mga buhat alang sa uban. Bisan pa niana, sila mibati nga walay obligasyon sa pagtabang sa uban nga mahibalo kon unsay gisulti sa Bibliya bahin sa pagbaton ug kaluwasan. Sa unsang paagi kita lahi?
3 Ang atong masibotong ministeryo nagpakitang lahi kaayo sa mga kalihokan sa ubang mga relihiyon. Sa kapin sa 100 ka tuig, ang modernong-adlaw nga mga Saksi makugihong nagsangyaw sa maayong balita ngadto sa mga kinatumyan sa yuta, sa pagsundog sa unang mga Kristohanon. Ang atong tumong sa pagbuhat sa ingon maoy sa pagtabang sa daghang tawo kutob sa maarangan nga ipahiuyon ang ilang mga kinabuhi sa kabubut-on sa Diyos.—1 Tim. 2:4; 2 Ped. 3:9.
4 Unsay Imong Reputasyon? Ikaw ba nailhan ingong masibotong magwawali sa Pulong sa Diyos? (Buh. 17:2, 3; 18:25) Tungod sa imong kalihokan sa pagsangyaw, dali bang makita sa imong mga silingan ang kalainan tali sa ilang relihiyon ug sa imoha? Ikaw ba nailhan ingong tawo nga maikagong ipaambit ang iyang paglaom sa uban? Ikaw ba adunay regular nga rutina sa pagpakig-ambit diha sa ministeryo? Hinumdomi nga atong gipalahi ang atong kaugalingon dili lamang pinaagig atong ngalan kondili pinaagi usab sa atong pagbuhat kon unsay gilarawanan sa maong ngalan—pagsangyaw bahin kang Jehova.—Isa. 43:10.
5 Ang gugma alang sa Diyos ug sa silingan magtukmod kanato sa pagpakig-ambit sa kalihokang pagsangyaw. (Mat. 22:37-39) Mao nga kita, sama ni Jesus ug sa mga apostol, buot mopahimulos sa matag higayon nga ipaambit ang mensahe sa Gingharian sa uban. Hinaot nga kita mopadayon sa pagsangyaw nga masiboton sa maayong balita ngadto kanilang mahinangop nga maminaw. Ang pagbuhat sa ingon motabang sa matinud-anon-ug-kasingkasing nga mga tawo nga ‘makita ang kalainan tali . . . sa usa nga nagaalagad sa Diyos ug sa usa nga wala mag-alagad kaniya.’—Mal. 3:18.