Pangutana
◼ Sa dihang mag-tour sa Bethel, unsay angayng huptan sa hunahuna maylabot sa panapot ug pamostura?
Sa paghisgot sa kahinungdanon sa hustong panapot ug pamostura, ang Organisado sa Pagtuman sa Atong Ministeryo nagkomento bahin sa panginahanglan sa pisikal nga kahinlo, kasarangang panapot, ug maayong pamostura sa dihang anaa sa ministeryo sa kanataran ug motambong sa Kristohanong mga tigom. Dayon, sa panid 131, parapo 2, kini nag-ingon: “Mao usab ang himoon sa dihang moduaw sa puy-anan sa Bethel sa Brooklyn o sa bisan haing sangang opisina sa Sosyedad. Hinumdomi, ang ngalang Bethel nagakahulogang ‘Balay sa Diyos,’ mao nga ang atong senina, pamostura ug pamatasan kinahanglang susama nianang gidahom kanato sa dihang motambong sa mga tigom alang sa pagsimba didto sa Kingdom Hall.”
Samtang ang kadaghanan sa mga igsoong nagaduaw sa Bethel nagsapot sa hustong paagi, namatikdan nga ang ubang mga igsoong lalaki ug babaye sa gihapon mahilig nga hilabihan ka kaswal sa ilang panapot sa dihang anaa sa palibot sa Bethel. Maylabot niini, sama sa tanang ubang bahin sa atong Kristohanong kinabuhi, buot natong huptan ang samang taas nga mga sukdanan nga naghimo kanatong bulag gikan sa daang kalibotan. Busa sa dihang moduaw sa Bethel, suknaa ang imong kaugalingon: ‘Kasarangan ba ang akong panapot ug pamostura? Nagabanaag ba gayod kini sa Diyos nga akong ginasimba? Ang uban ba mapandol tungod sa akong panagway? Nagpahiluna ba akog hustong panig-ingnan alang sa uban nga nagaduyog kanato sa pag-tour sa Bethel, hayan sa unang higayon?’
Namatikdan nga ang kadaghanan kanilang wala magsapot sa hustong paagi diha sa mga tour sa Bethel maoy mga estudyante sa Bibliya o interesadong mga tawo. Busa, sa dili pa dapiton sila ngadto sa Bethel, hinungdanon nga atong isaysay kanila sa abanteng panahon ang mga sukdanan sa Bethel sa panapot ug pamostura aron sila makaandam ug magsapot sa hustong paagi. Samtang kita tingali magpanuko sa pagbuhat niini, dayag nga kini mas mahigugmaon kay sa bation nila ang kaulaw tungod sa pag-adto sa Bethel nga dili haom ang panapot.
Hinaot kita, maingon man kanilang atong ginatun-an, pinaagig atong panapot ug pamostura kanunayng “madayandayanan ang pagtulon-an sa atong Manluluwas, ang Diyos, sa tanang butang.”—Tito 2:10.