Tagda ang Kahibulongang mga Buhat sa Diyos
1 Sulod sa tulo ka maanindot nga mga adlaw, nagtigom kita sa “Mga Magtutuman sa Pulong sa Diyos” nga Distritong Kombensiyon. Wala nato tagda ang adlaw-adlawng mga kabalaka sa kinabuhi ug gisentro ang pagtagad sa kahibulongang mga buhat ni Jehova. Sa unsang paagi kita nakabatog kaayohan gikan sa mga butang nga gitudlo kanato?—Juan 13:17.
2 Mga Pamilya nga Nagsugot sa Pulong sa Diyos: Ang simposyum nga “Magmasinugtanon sa Pulong sa Diyos” mitabang kanato aron susihon ang espirituwal nga mga kahimtang sa atong mga pamilya. Ang mga bata may gugma nga makakat-on. Busa, gidasig ang diyosnong mga ginikanan sa paghimo sa pagtuon sa Bibliya sa pamilya nga pundasyon aron tukoron ang malig-ong panimalay sa espirituwal. Daghang ulo sa pamilya ang nakighisgot sa ilang gagmayng mga anak sa bag-ong brosyur nga Ikaw Mahimong Higala sa Diyos! Motabang kini kanila sa pag-ugmad sa malipayon ug malig-ong relasyon uban kang Jehova. Mga ginikanan, tudloi ang inyong mga anak kon sa unsang paagi tagdon ang mga pagbati sa Diyos. Magmapadayganon sa inyo mismong gugma alang kaniya ug sa iyang mga buhat. (Sal. 103:2) Duyog nga maghago sa pagpahimutang ug pagkab-ot sa espirituwal nga mga tumong ug sa bug-os nga pagkalangkit sa pag-alagad kang Jehova.
3 Ang Pulong sa Diyos Naglamdag sa Atong Dalan: Pagkamakapalipay ang pagdawat sa kompletong New World Translation sa Tagalog ug sa pagkadungog nga sa dili madugay mabatonan usab kini sa Cebuano ug Iloko! Gikalipay usab nato ang pagkadawat sa bag-ong librong Tagna ni Isaias—Kahayag Alang sa Tibuok Katawhan I. Asa ka na man sa pagbasa niining unang tomo? Ang basahon ni Isaias nagtagna sa mga paghukom alang sa di-diyosnong mga nasod maingon man sa masanagong mga panalangin sa Gingharian alang sa katawhan sa Diyos. (Isa. 34:2; 35:10) Nagpalig-on usab kini sa pagtuo ug pagsalig kang Jehova ug sa iyang paagi sa pagbuhat sa mga butang.—Isa. 12:2-5.
4 Sa pagbasa sa Tagna ni Isaias I, sa unang bahin imong mamatikdan kon sa unsang paagi namentinar ni Isaias ang iyang integridad kang Jehova samtang ang pagkadaotan naglibot kaniya. Sa dihang gidapit nga mahimong mensahero sa Diyos, si Isaias mitubag: “Ania ako! Ipadala ako.” (Isa. 6:8) Ang pagpamalandong sa iyang mahinangpong espiritu magdasig kanimo sa pagpadayon sa pagsangyaw sa maayong balita, nga makig-ambit sa bug-os sa “pagpamatuod ngadto sa tanang kanasoran.”—Mat. 24:14.
5 Ang atong pagkamatinagdanon sa mga buhat ni Jehova mopadako sa iyang kahalangdon. Busa mahala ang pribilehiyo sa pagkahimong mga magtutuman sa pulong sa Diyos!