Kahadloki si Jehova sa Tibuok Adlaw
1 “Ang pagkahadlok kang Jehova mao ang sinugdanan sa kaalam.” (Sal. 111:10) Mopukaw kini kanato sa paghimog maayong mga buhat ug motabang kanato sa pagpahilayo sa daotan. (Prov. 16:6) Kini nga kahadlok maoy halalom nga pagtahod alang sa atong Maglalalang, nga mopalihok kanato nga likayan ang di-pagpahimuot ug pagsupak kaniya. Kini maoy butang nga kinahanglan natong ugmaron ug ipasundayag sa tibuok adlaw.—Prov. 8:13.
2 Sa matag adlaw, ang espiritu sa kalibotan ni Satanas nagpit-os pag-ayo kanato aron mopahiuyon sa daotang mga paagi niini. (Efe. 6:11, 12) Ang atong di-hingpit nga unod maoy makasasala ug kinaiyanhong mokiling ngadto sa daotan. (Gal. 5:17) Busa, aron makasunod sa mga sugo ni Jehova, magmalipayon, ug maangkon ang kinabuhi, kita kinahanglang mahadlok kaniya sa tibuok adlaw.—Deut. 10:12, 13.
3 Sa Hebreohanon 10:24, 25, kita gitambagan sa pagtigom aron magdinasigay sa usag usa nga “labi pa gayod nga ingon” sulod niining mga panahon nga atong gikinabuhian. Ang regular nga pagtambong sa tigom hinungdanon kon buot natong maluwas niining kataposang mga adlaw. Ang atong kahadlok nga di-makapahimuot sa Diyos mopalihok kanato sa pagtambong sa mga tigom ug pabilhan pag-ayo ang katuyoan niini. Kadtong nahadlok sa Diyos nagatamod sa pagpakig-ambit diha sa Kristohanong mga tigom ingong sagradong pribilehiyo.
4 Ang pagsunod sa sugo nga isangyaw ang maayong balita sa Gingharian maoy laing paagi nga atong ikapakita ang atong kahadlok sa Diyos. (Mat. 28:19, 20; Buh. 10:42) Ang pangunang tumong sa atong buluhatong pagsangyaw mao ang pagtabang sa uban nga maugmad ang kahadlok kang Jehova ug magpasakop sa iyang kabubut-on. Atong mapalampos kini pinaagi sa mga pagbalikduaw, nga maningkamot sa pagsugod ug mga pagtuon sa Bibliya sa balay, ug dayon sa pagtudlo sa uban sa tanang sugo sa Diyos. Sa ingon kita nagpasundayag sa atong kahadlok kang Jehova ug sa atong gugma sa silingan.—Mat. 22:37-39.
5 Kadtong wala mahadlok sa Diyos napakyas sa pag-ugmad ug mapabilhong tinamdan sa espirituwal nga mga butang, ug sila minunot sa makamatay nga hangin sa kalibotan, o tinamdan sa hunahuna. (Efe. 2:2) Hinaot nga ang atong lig-ong gimbut-an mao ang ‘paghatag sa Diyos ug sagradong pag-alagad uban ang diyosnong kahadlok ug kalisang.’ (Heb. 12:28) Sa ingon atong anihon ang mga panalangin niadtong nahadlok kang Jehova sa tibuok adlaw.