Ginapadapat Mo ba ang Imong Nakat-onan sa 2001 nga Serye sa Sirkitong Asembliya?
1 Dili pa dugay nakahuman kita sa serye sa sirkitong asembliya para sa 2001, nga may tema, “Higugmaa ang Diyos—Dili ang mga Butang sa Kalibotan,” pinasukad sa 1 Juan 2:15-17. Imo bang mahinumdoman ang pangunang mga puntos sa maong programa? Giunsa nimo pagpadapat ang tambag sa personal nga paagi o ingong pamilya? Ang mosunod maoy pagsubli sa pipila sa mga bahin sa programa ug kon sa unsang paagi kini makahatag ug kaayohan kanato.
2 “Gugma sa Diyos Magpalihok Kanato Diha sa Atong Ministeryo”: Kini nga pakigpulong sa Sabado sa buntag nagpakita nga, bisan tuod ang gugma sa silingan ug kahadlok sa Diyos maoy nagapalihok nga mga hinungdan diha sa atong ministeryo, ang gugma kang Jehova mao ang labing kusganong tigpalihok. Ang gugma kang Jehova nagatabang kanato sa pagbuntog sa negatibong mga pagbati, sama sa kamaulawon, kahadlok sa mga tawo, o bisan unsang babag sa atong pagsangyaw uban ang kaisog. (Buh. 4:29, 31) Ang maong gugma magpalihok kanato sa pag-oksilyare payunir o pagregular payunir kon atong maarangan, ug magtukmod kanato sa pagpamatuod sa impormal nga paagi sa tanan natong mahibalag. Hinungdanon nga atong palamboon ang atong gugma kang Jehova aron dili gayod kini makunhoran.—Pin. 2:4.
3 “Mga Nahigugma Kang Jehova, Dumti Ninyo ang Daotan”: Kini nga pakigpulong sa Sabado sa hapon, pinasukad sa Salmo 97:10, nagpakita nga tungod sa napanunod nga pagkadi-hingpit ug pagpit-os sa kalibotan ni Satanas, sagad mas daling higugmaon ang daotan kay sa dumtan kana ug higugmaon ang maayo. Apan, ang atong relasyon sa Diyos nagdepende sa atong pagdumot kon unsay iyang gidumtan. (Prov. 6:16-19) Kita nagkinahanglan dili lamang sa pagdumot kon unsay tatawng daotan kondili usab sa malinglahong mga sayop, sama sa pagpatuyang sa alkohol, di-mahigugmaong pakiglabot sa atong kapikas sa kaminyoon o mga anak, di-ligdong nga panapot, ug di-maayong kalingawan.
4 “Tinguhaa ang Nagalabaw nga Paagi sa Gugma”: Kini nga pakigpulong, pinasukad sa 1 Corinto 12:31 hangtod sa 13:8, nagpasiugda nga, kon walay gugma, ang tanang ubang mga gasa ug mga katakos nga ato tingaling nabatonan dili magpulos. Kini ilabinang tinuod sa pagmentinar sa pakigdait ug panaghiusa diha sa mga kongregasyon. Busa kita gipahinumdoman nga mapainubsanong agwantahon ang mga di-pagkahingpit sa uban, likayan ang pagkamahunahunaon-sa-kaugalingon ug kompetisyon, ug dili pagpakaylap sa makadaot nga tabi. Ang gugma magpalihok kanato nga magpabiling maunongon sa organisasyon sa Diyos ug kini magpaila kanato ingong mga tinun-an ni Kristo.—Juan 13:34, 35.
5 “Mga Butang nga Anaa sa Kalibotan—Unsaon Nato Kini Paglantaw?”: Kini nga simposyum sa Dominggo sa buntag naghisgot sa tulo ka puntos sa 1 Juan 2:15-17: (1) “Ang tinguha sa unod,” nga mahimong hinungdan sa atong paggugol ug daghang panahon sa lulinghayaw ug kalingawan. Sama sa magtiayon diha sa pasundayag, atong sublion ang atong paggamit sa panahon ug tan-awon kon ang atong mga kinabuhi mahimo bang payanohon aron unahon ang intereses sa Gingharian. (2) “Ang tinguha sa mga mata” daling makapahisalaag kanato, sama gayod sa pagkahisalaag ni Eva. Ang mga mata magpasamot sa pangandoy sa kasingkasing. Kinahanglan kitang magbantay batok sa pagtinguha sa materyal nga mga butang sa ingon mangutang kita aron mabatonan kana. (3) “Ang mapagawalong pagpasundayag sa mga kahinguhaan sa kinabuhi sa usa.” Kini mahimong ikapakita pinaagig pagpasiatab sa mga sapot nga may iladong mga tiketa o pagpangandoy sa maluhong mga butang. Busa maayong susihon ang atong kaugalingon aron makita kon ato bang giuna ang pag-alagad sa Diyos.
6 “Ang Pagkadi-Bahin sa Kalibotan Magpanalipod Kanato”: Ang 2 Corinto 6:14-17 nagpakita kon sa unsang paagi ang pipila ka pagtulon-an ug mga kostumbre maghimo kanatong di-dalawaton sa Diyos. Kini nga pakigpulong sa Dominggo nagpakita nga ang atong pagkadi-bahin sa kalibotan maghimo sa atong mga kinabuhi nga yano ug walay mga komplikasyon. Ang atong neyutral nga posisyon magpanalipod sa panaghiusa sa organisasyon. Ang pagkapuliki diha sa buluhatong pagsangyaw ug pagtudlo maoy panalipod usab kanato. Kita mapanalipdan gikan sa pisikal nga mga sakit nga mahimong mosangpot gumikan sa imoralidad, paggamit ug droga, ug tabako. Kita mapanalipdan usab gikan sa apostatang panghunahuna, nga makahilo kanato sa espirituwal nga paagi.—Deut. 29:18.
7 “Diyosnong mga Saad Alang Kanilang Nahigugma sa Diyos”: Kining kataposang pakigpulong nagpakita nga ang gisaad nga mga panalangin ni Jehova makadugang ug kangaya sa atong ginabuhat kada adlaw. Pinaagi sa pagpugas nga madagayaon kita magaani sa madagayaong mga panalangin pinaagig mga eksperyensiya ug napauswag nga kalipay. (2 Cor. 9:6) Kon kita mahinatagon ug mopaluyo sa tibuok-kalibotang buluhaton sa Sosyedad ug niadtong nanginahanglan, si Jehova moganti kanato uban ang mga panalangin.—Mal. 3:10.
8 Naglaom kita nga kini nga pagsubli mopalihok sa tanan nga mahimong dili mga tigpaminaw lamang, kondili mga magtutuman usab, sa atong napatalinghogan didto sa sirkitong asembliya.—Sant. 1:22.