Ang Labing Malipayong mga Tawo sa Yuta
1 “Malipayon ang katawhan kansang Diyos mao si Jehova!” (Sal. 144:15) Kanang mga pulonga naghubit sa mga Saksi ni Jehova ingong ang labing malipayong mga tawo sa yuta. Wala nay mas molabaw nga kalipay kay nianang naggikan sa pag-alagad sa bugtong matuod ug buhi nga Diyos, si Jehova. Sanglit siya maoy usa ka “malipayong Diyos,” kadtong mosimba kaniya magbanaag sa iyang kalipay. (1 Tim. 1:11) Unsa ang pipila ka bahin sa atong pagsimba nga makapalipay kanato pag-ayo?
2 Mga Katarongan sa Pagkalipay: Si Jesus nagpasalig kanato nga ang kalipay maggikan sa pagkahimong “mahunahunaon sa [atong] espirituwal nga panginahanglan.” (Mat. 5:3) Ang mapinadayonong pagtuon sa Bibliya ug pagtambong sa tanan natong Kristohanong mga tigom magatagbaw sa maong panginahanglan. Ang pagkakat-on sa kamatuoran sa Pulong sa Diyos nagpagawas kanato gikan sa relihiyosong kabakakan ug kasaypanan. (Juan 8:32) Ang Kasulatan nagtudlo usab kanato sa kinamaayohang paagi sa pagkinabuhi. (Isa. 48:17) Tungod niana, atong natagamtam ang maayong Kristohanong panag-ubanay sulod sa atong malipayong kapunongan sa mga igsoon.—1 Tes. 2:19, 20; 1 Ped. 2:17.
3 Makakuha kitag dakong katagbawan gikan sa pagsunod sa hataas nga mga sukdanan sa Diyos sa moral, tungod kay nahibalo kita nga kini magapanalipod kanato ug makapalipay kang Jehova. (Prov. 27:11) Usa ka tigbalita sa mantalaan nag-ingon: “Bisan pa sa tanan nilang estriktong mga sukdanan, ang mga Saksi ni Jehova dili gayod makitang masulub-on. Malipayon hinuon. Ang mga batan-on maingon man ang mga tigulang [sa ilang taliwala] nagpakitag panagway nga hilabihan ka malipayon ug timbang kaayo.” Sa unsang paagi atong matabangan ang uban nga makaambit sa atong malipayong dalan sa kinabuhi?
4 Tabangi ang Uban sa Pagkaplag sa Kalipay: Ang kalibotan napuno sa kasub-anan, ug ang mga tawo sa katibuk-an adunay dulom nga panglantaw sa umaabot. Apan, kita adunay masanag nga panglantaw, sa pagkahibalo nga may adlaw ra nga ang tanang kasub-anan mahimong butang na lang unya sa kagahapon. (Pin. 21:3, 4) Busa, masiboton kitang makig-ambit diha sa ministeryo, nga nagapangita sa mga matinud-anog-kasingkasing aron atong kapaambitan sa atong paglaom ug sa atong pagtuo bahin kang Jehova.—Ezeq. 9:4.
5 Usa ka payunir nga igsoong babaye miingon: “Walay laing mas makapatagbaw kay sa pagtabang sa mga tawo nga makahibalo bahin kang Jehova ug sa iyang kamatuoran.” Buhaton nato ang kutob sa atong maarangan sa pagdasig ug mas daghan pa sa pagdawat ug mga pagtuon sa Bibliya sa balay. Ang pag-alagad kang Jehova ug paghatag sa atong kaugalingon sa pagtabang sa uban nga moalagad kaniya magpatunghag kinadak-ang kalipay.—Buh. 20:35.