Ang mga Suskrisyon Kunhoran

Ang sangang buhatan malipay sa pagpahibalo kaninyo nga ang Nagamandong Lawas miuyon sa pagkunhod sa mga suskrisyon nga gidumala sa mga sangang buhatan sa tibuok kalibotan. Sumala sa gipatin-aw sa among sulat ngadto sa tanang kongregasyon sa Enero 1, 2002, sukad karon ang sangang buhatan magdumala na lang ug limitadong gidaghanon sa mga suskrisyon, tungod sa dakong galastohan sa pagpadalag indibiduwal nga mga kopya sa mga magasin. Ang mga bag-ong suskrisyon magpadayon hangtod kini matapos.

Ang tanang igsoon, maingon man ang interesadong mga tawo nga nakontak sa lokal nga kongregasyon, angayng magdawat na karon sa ilang personal nga mga kopya pinaagi sa suplay nga magasin sa kongregasyon ug dili na pinaagig suskrisyon. Tungod niini, ang tanang kongregasyon angayng magtino nga aduna silay igong mga magasin nga madawat aron ang tanang gusto niana makakuhag mga magasin. Sa kabahin sa publiko, gidasig namo ang mga magmamantala sa pagtala niadtong buot makadawat sa atong magasin nga regular ug dayon mao nay mohatod niana. Magpaarang kini kanila sa paghupot ug padayong personal nga kontak niining mga tawhana, nga mahimong moresulta sa dugang nga mga pagtuon sa Bibliya.

Sa pipila ka talagsang mga kaso, ang ubang interesadong mga tawo nagpuyo sa layo kaayong mga lugar nga lisod aboton, o adunay post ­of­fice box diin didto ihatod ang koreyo. Alang sa maong mga indibiduwal ang sangang buhatan magpadayon sa pagpadalag personal nga mga suskrisyon. Diyutay lang kaayo kini, mao nga makadaginot kaayog dako sa galastohan sa pagpadala diha sa koreyo ug sa mga tawong gamiton sa opisina sa pagdumala sa kanhing kahikayan sa suskrisyon.