Repaso sa Teokratikanhong Tunghaan sa Ministeryo
Sirado-basahong pagsubli sa materyal nga nakobrehan diha sa mga asaynment sa Teokratikanhong Tunghaan sa Ministeryo para sa mga semana sa Enero 7 hangtod sa Abril 22, 2002. Gamita ang usa ka separadong papel sa pagsulat sa mga tubag sa mga pangutana sa daghan nga imong maarangan diha sa gitagal nga panahon.
[Matikdi: Sulod sa panahon sa sinulat nga pagsubli, ang Bibliya lamang ang mahimong gamiton sa pagtubag sa bisan unsang pangutana. Ang mga reperensiya nga nagasunod sa mga pangutana maoy alang sa imong personal nga panukiduki. Ang mga numero sa panid ug parapo mahimong dili makita diha sa tanang reperensiya sa Ang Bantayanang Torre.]
Tubaga ang matag usa sa mosunod nga mga pahayag nga Matuod o Bakak:
1. Sa Ecclesiastes 2:2, ang punto nga gipasiugda ni Solomon mao nga ang pagkatawa ug pagmaya kinahanglang likayan. [Senemanang pagbasa sa Bibliya; tan-awa ang w87 9/15 p. 24 par. 5.] Bakak. Si Solomon yanong naghisgot nga ang pagpangitag tinuod nga kalipay pinaagi sa hudyaka maoy “binuang” tungod kay kini dili makataronganon; sa susama, ang “pagmaya” mismo dili makasulbad sa mga problema sa kinabuhi.
2. Inay usa ka basahon nga dulom ug panglantaw, ang Ecclesiastes napuno sa daghang bililhon nga mga kamatuoran bahin sa langitnong kaalam ug nagpakita nga ang mga kalihokan nga mosangpot sa kadaot mao kadtong wala manumbaling sa Diyos. [si p. 114 par. 15] Matuod.
3. Sa Isaias 1:7, ang manalagna nagtumong sa pagkaawaaw sa Juda panahon sa paghari ni Ahaz. [Senemanang pagbasa sa Bibliya; tan-awa ang ip-1 p. 17 par. 16.] Bakak. Sa paglitok niini nga pamulong, lagmit nga si Isaias nagagamit sa usa ka pamaagi nga makaplagan sa laing bahin sa Bibliya—nga mao ang pagbatbat sa usa ka hitabo sa umaabot nga samag nahitabo na, sa ingon nagpasiugda sa tinong pagkatuman sa usa ka tagna.
4. Ang ‘pagbarog atubangan sa trono ug atubangan sa Kordero,’ sumala sa gihisgotan sa Pinadayag 7:9, nagpaila sa usa ka langitnong lokasyon. [rs p. 237-8 par. 6] Bakak. Ang ekspresyong “atubangan sa trono” sa literal nagkahulogang “makita sa trono”; nagpaila kini nga ang “dakong panon” anaa sa usa ka inuyonang kahimtang; wala kini magpaila sa usa ka langitnong lokasyon.
5. Ang madagayaong ‘pagpasidungog kang Jehova’ pinaagi sa atong mga kahinguhaan—atong panahon, mga katakos, kusog, ug materyal nga mga kabtangan—magpahinabog dagayang mga panalangin gikan kang Jehova. (Prov. 3:9, 10) [w00 1/15 p. 25 par. 1] Matuod.
6. Ang modernong-adlaw nga ‘katingad-ang buhat ug talagsaong buhat’ nga gitagna sa Isaias 28:21 nagtumong sa kalaglagan sa mga nasod sa Armagedon. [Senemanang pagbasa sa Bibliya; tan-awa ang ip-1 p. 295 par. 16; p. 301 par. 28.] Bakak. Kini nagtumong sa pagkalaglag sa Kakristiyanohan, nga nag-angkong nagaalagad sa Diyos.
7. Sama sa gipakita sa Mateo 24:38, 39, ang pagpatuyang sa pagkaon ug pag-inom, lakip sa ubang mga kalihokan sa tawo, maoy hinungdan nga ang mga tawo sa adlaw ni Noe gibanlas sa Lunop. [w00 2/15 p. 6 par. 6] Bakak. Walay sayop nianang mga kalihokan nga gihisgotan sa teksto; ang mga tawo nagsentro lamang sa ilang pagkinabuhi niining “normal” nga mga butang ug ‘wala magtagad’ sa pasidaan ni Noe.
8. Si Jehova kanunayng mohatag sa mga hangyo sa iyang mapaubsanong mga alagad nga di-mahakogong nag-alagad kaniya. [w00 3/1 p. 4 par. 3] Bakak. Bisan tuod maminaw si Jehova nga Diyos sa mga pag-ampo niadtong mapaubsanong nagtinguha nga moalagad kaniya, dili niya kanunayng ihatag ang ilang mga hangyo; tungod kay siya adunay layog-abot nga panglantaw sa mga butang, kanunay siyang molihok kon unsay labing maayo alang kanato, nga uyon sa iyang gipahayag nga katuyoan.
9. Ang “mga nasod” nga gitumong sa Isaias 60:3 mao ang tagsatagsa ka politikal nga mga nasod nga nadani sa hinatag-Diyos nga kahayag. [Senemanang pagbasa sa Bibliya; tan-awa ang w00 1/1 p. 12 par. 4.] Bakak. Kini nagtumong sa “usa ka dakong panon” sa katawhan gikan sa tanang kanasoran nga dunay yutan-ong paglaom ug kinsa miduol kang Jehova aron magpatudlo. (Pin. 7:9)
10. Si Jehova “nagbalaan” kang Jeremias sa wala pa siya matawo sa pagkaagi nga Iyang gitinong daan ang walay-kataposang dulnganan ni Jeremias. (Jer. 1:5) [Senemanang pagbasa sa Bibliya; tan-awa ang w88 4/1 p. 10 par. 2.] Bakak. Si Jehova “nagbalaan” kang Jeremias sa pagkaagi nga Iyang gitino nga si Jeremias pagapilion alang sa usa ka linaing buluhaton ingong usa ka manalagna.
Tubaga ang mosunod nga mga pangutana:
11. Sa Ecclesiastes 11:1, unsay kahulogan sa ‘paglabay sa tinapay’? [Senemanang pagbasa sa Bibliya; tan-awa ang w87 9/15 p. 25 par. 11.] Ang tinapay mao ang pangunang kalan-on nga gikinahanglan sa pagsustento sa kinabuhi; ang paglabay niini ngadto “sa katubigan” maoy pagpaambit sa usa ka bililhong butang; apan, ‘ang usa makakaplag niini pag-usab,’ kay sa paagi nga wala damha, ang mahinatagon pagabalosan. (Lucas 6:38) (Unod igo na)
12. Sa Isaias 6:8, kinsay gilakip ni Jehova sa dihang siya miingong “kanamo”? [Senemanang pagbasa sa Bibliya; tan-awa ang ip-1 p. 93-4 par. 13.] Ang “kanamo” nagtumong kang Jehova ug sa iyang bugtong Anak, kinsa sa ulahi nahimong ang tawong si Jesu-Kristo; nagpaila kana nga ang bugtong Anak nakita sa panan-awon tapad ni Jehova diha sa langitnong mga hukmanan. (Juan 1:14; 12:41)
13. Ingong katumanan sa Isaias 9:2, sa unsang paagi ang ‘usa ka dakong kahayag’ misidlak sa Galilea? [Senemanang pagbasa sa Bibliya; tan-awa ang ip-1 p. 126 par. 17.] Ang buluhaton ni Jesus samtang dinhi sa yuta ug ang mga panalangin nga misangpot sa iyang pagsakripisyo haom nga gipaila ingong ‘usa ka dakong kahayag’; sa dihang mitungha ang Mesiyas, ang mga mata sa daghang mapaubsanong mga tawo nabuksan sa kahibulongang paagi. (Juan 1:9, 12) (Unod igo na)
14. Unsang modernong-adlaw nga kaamgiran ang makuha maylabot sa pagkapukan sa Babilonya sa 539 W.K.P. ug sa iyang bug-os nga pagkaawaaw? (Isa. 13:19, 20; 14:22, 23) [Senemanang pagbasa sa Bibliya; tan-awa ang ip-1 p. 188 mga par. 30-1.] Sa 1919, ang Dakong Babilonya nakasinatig pagkapukan, nga wala nay gahom ibabaw sa katawhan sa Diyos; sa dili madugay ang tibuok-kalibotang imperyo sa bakak nga relihiyon pagalaglagon sa bug-os.
15. Sa unsang paagi “ang matinumanon ug maalamong ulipon” milihok ingong “magbalantay” nga gihubit sa Isaias 21:6? (Mat. 24:45) [Senemanang pagbasa sa Bibliya; tan-awa ang ip-1 p. 221-2 par. 11.] “Ang matinumanon ug maalamong ulipon” nagpadayon sa pagbantay, nga nagasulti kon unsay makita niini mahitungod sa pagkaduol sa adlaw sa paghukom sa Diyos.
16. Unsang maalamong tambag alang sa usa ka batan-ong lalaki nga nangitag usa ka kapikas sa kaminyoon ang makita diha sa Proverbio 31:10? [w00 2/1 p. 31 par. 1] Tungod kay ang pagpangita ug “asawa nga takos” nagkinahanglag paningkamot, sama sa pagpangitag bililhong mga korales, ang usa ka batan-ong lalaki dili angayng magdalidali ug magmapilion aron mapabilhag maayo ang iyang bililhong kaplag.
17. Sa Isaias 43:9, unsang hagit ang giluwatan batok sa mga diyos sa mga nasod? [Senemanang pagbasa sa Bibliya; tan-awa ang w88 2/1 p. 16 par. 3.] Gihagit ni Jehova ang mga diyos sa mga nasod sa pagpamatuod nga sila maoy mga diyos pinaagi sa tukmang pagpanagna ug pinaagi sa pagpatunghag mga saksi nga makahatag ug ebidensiya nga sila kasaligan ug takos simbahon.
18. Sa unsang paagi ang mga tiil niadtong nagmantala sa maayong balita sa Gingharian sa Diyos ‘matahom’? (Isa. 52:7) [Senemanang pagbasa sa Bibliya; tan-awa ang w97 4/15 p. 27 par. 6.] Sanglit gumikan sa mga tiil ang usa ka tawo makalakaw sa dihang siya mogawas sa pagsangyaw sa uban, ang maong mga tiil sa pagkatinuod naghawas sa tawo kansang mensahe sa maayong balita naghimo kaniyang matahom sa iyang mga mamiminaw.
19. Unsay kinahanglan natong buhaton aron mapugngan ang atong kasingkasing sa paglimbong kanato? (Jer. 17:9) [w00 3/1 p. 30 par. 4] Kita kinahanglang magmatinud-anon sa atong kaugalingon, nga dili pakamatarongon ang atong kaugalingon sa dihang kita makasala; dugang pa, kita angayng andam modawat sa pagputli ug pagsulay ni Jehova, bisan pag nagkahulogan kinig pag-angkon sa hugawng mga kinaiya nga kinahanglang buntogon. (Sal. 26:2)
20. Unsay kinahanglang buhaton niadtong ‘nagalakaw diha sa dalan ni Jehova’? (Jer. 7:23) [Senemanang pagbasa sa Bibliya; tan-awa ang w99 8/15 p. 29 par. 6.] Sila kinahanglang determinado nga mohatag kang Jehova ug eksklusibong debosyon, uban ang hugot nga pagtuo sa iyang mga saad ug walay-pagtipas nga pagkamasinugtanon sa iyang mga balaod ug hataas nga mga sukdanan. (Sal. 11:7)
Itagana ang (mga) pulong o prase nga gikinahanglan sa pagkompleto sa matag usa sa mosunod nga mga pahayag:
21. “Ang kasingkasing sa maalamon anaa sa iyang tuong kamot” sa diwa nga ang “tuong kamot” kasagarang nagpasabot sa usa ka ․․․․․․․․; busa, kini nagpaila nga ang iyang ․․․․․․․․ nagtukmod kaniya sa pagsubay sa usa ka maayo, paborable nga dalan. (Eccl. 10:2; Mat. 25:33) [Senemanang pagbasa sa Bibliya; tan-awa ang w87 9/15 p. 25 par. 8.]
22. Lakip sa mapuslanong mga leksiyon nga gitudlo diha sa Awit ni Solomon mao ang ․․․․․․․․, ․․․․․․․․, ug ․․․․․․․․ sa diyosnong mga prinsipyo. [si p. 117 par. 16]
23. Ang maglalaglag sa mga siyudad sa Juda nga gihubit sa Isaias 33:1 mao ang ․․․․․․․․, nga nakaagom ug kapildihan sa 632 W.K.P., nga nagbilin ug dakong inagaw alang sa mga molupyo sa ․․․․․․․․, nga ‘magatigom niini sama sa mga uk-ok.’ (Isa. 33:4) [Senemanang pagbasa sa Bibliya; tan-awa ang ip-1 p. 343 par. 4; p. 345 par. 6.]
24. Ang pagtandi sa Isaias 54:1 uban sa Galacia 4:26, 27 nagbutyag nga ang “babayeng apuli” naglarawan sa “ ․․․․․․․․”; ug ang “babaye nga may banang tag-iya,” ang ․․․․․․․․. [Senemanang pagbasa sa Bibliya; tan-awa ang w95 8/1 p. 11 par. 8.]
25. Sa dihang makasugamak kita ug pagtamay ug pagsalikway diha sa atong publikong ministeryo, angay natong hinumdoman nga ang maong pagsupak sa pagkatinuod gitumong, dili batok ․․․․․․․․, kondili batok kang ․․․․․․․․, ang Tinubdan sa atong mensahe. (2 Cor. 4:1, 7) [w00 1/15 p. 21 par. 2]
Pilia ang hustong tubag sa matag usa sa mosunod nga mga pahayag:
26. Sa dihang nagsulat mahitungod sa iyang panan-awon sa langitnong himaya ni Jesus, si Pablo nagtumong sa iyang kaugalingon ingong usa nga “natawong ahat,” nga nagkahulogan nga (siya bag-ong gipakatawo sa espiritu; siya nakadawat ug sayong pagkatudlo ingong apostol ngadto sa kanasoran; siya maorag gihatagan ug pasidungog nga matawo, o mabanhaw, ngadto sa espirituhanong kinabuhi nga abante). (1 Cor. 9:1; 15:8) [w00 1/15 p. 29 par. 6]
27. Ang titulong “Amahang Walay Kataposan” nagtumong sa gahom ug awtoridad sa Mesiyanikong Hari sa paghatag sa mga tawo ug (espirituwal nga kabaskog; dili-mamatay nga kinabuhi sa langit; paglaom nga kinabuhing dayon dinhi sa yuta). (Isa. 9:6; Juan 11:25, 26) [Senemanang pagbasa sa Bibliya; tan-awa ang ip-1 p. 131 par. 26.]
28. Sa modernong katumanan sa Isaias 66:7, ang “batang lalaki” nga natawo naghawas (kang Jesu-Kristo; sa Mesiyanikong Gingharian; sa bag-ong espirituwal nga nasod sa 1919). [Senemanang pagbasa sa Bibliya; tan-awa ang w95 1/1 p. 11 par. 3.]
29. Ang maampingong pagbasa sa Mateo 10:28 motabang kanato sa pagsabot nga ang kalayonhong Gehenna (maoy usa ka dapit sa may-panimuot nga pagsakit; naghawas sa walay-kataposang kalaglagan; nagpasabot sa pagkanahimulag gikan sa Diyos). [rs p. 206 par. 3]
30. Sa modernong-adlaw nga katumanan, “ang nasod kansang katawhan wala motuman sa tingog ni Jehova,” nga gihisgotan diha sa Jeremias 7:28, nagtumong sa (Dakong Babilonya; Kakristiyanohan; ikapitong gahom sa kalibotan). [Senemanang pagbasa sa Bibliya; tan-awa ang w88 4/1 p. 18 par. 10.]
Ipatukma ang mosunod nga mga kasulatan sa mga pahayag nga gitala sa ubos:
Prov. 24:16; Eccl. 3:11; Isa. 40:8; Roma 10:15; 1 Ped. 4:6
31. Sa tinudlong panahon niini, ang hustong dapit diin ang matag buhat sa Diyos mosibo sa iyang katuyoan igapadayag ra unya. [Eccl. 3:11] [Senemanang pagbasa sa Bibliya; tan-awa ang w87 9/15 p. 24 par. 8.]
32. Ang pagwali sa maayong balita ngadto niadtong patay sa espirituwal nagtanyag ug kahigayonan aron sila maghinulsol. [1 Ped. 4:6] [rs p. 234 par. 1]
33. Bisag ang mga kapakyasan sa kinabuhi dili kalikayan, ang diyosnong indibiduwal dili molunga sa pagpaningkamot sa pagbuhat kon unsay maayo. [Prov. 24:16] [w00 2/1 p. 5 par. 1]
34. Ang pulong sa Diyos, o gipahayag nga katuyoan, dili mahimong walay-pulos o mapugngan sa pagkatuman. [Isa. 40:8] [Senemanang pagbasa sa Bibliya; tan-awa ang ip-1 p. 401-2 par. 10.]
35. Ang mga apostoles ni Jesus kanunayng naggamit sa tagna ni Isaias, nga nagpadapat niini diha sa ministeryo. [Roma 10:15] [si p. 123 par. 37]