Himoang Makapalig-on

¹ Tungod kay kita nagkinabuhi niining “makuyaw nga mga panahong lisod sagubangon,” kitang tanan nagkinahanglag pagdasig. (2 Tim. 3:1) Bisan sa unang siglo, si apostol Pablo nag-awhag sa iyang mga igsoon nga “tinguhaon ang mga butang . . . nga makapalig-on sa usag usa.” (Roma 14:19) Giduaw niya pag-usab ang ubay-ubayng mga kongregasyon, “nga nagpalig-on sa mga kalag sa mga tinun-an, nga nagdasig kanila nga magpabilin sa pagtuo.” (Buh. 14:22) Gikinahanglan gayod nato ang maong matang sa pagdasig karong adlawa.

² Makapalig-on kita sa uban pinaagi sa atong isulti. Pinaagi sa pagpakig-ambit sa mga tigom, kita “magdinasigay sa usag usa.” Ang atong dila magamit sa positibong paagi sa dihang ipaambit nato ang mga eksperyensiya, paghatag ug komendasyon, o maghisgot ug espirituwal nga mga butang. Ang maong paggamit sa dila ‘maayo alang sa pagpalig-on, nga makahatag ug kaayohan sa mga magapatalinghog.’​—Efe. 4:29.

³ Paghisgot ug Makapalig-ong mga Butang: Sa Filipos 4:​8, si Pablo nag-ingon nga angay natong palandongon ang matuod, maugdang, matarong, maputli, hiligugmaon, dungganon, hamili, ug dalayegon nga mga butang. Ang atong panaghisgot kanunayng tinuod kon kini gipasukad sa Pulong sa Diyos. (Juan 17:17) Ang atong Kristohanong pahinungod, kon unsay atong nakat-onan diha sa mga tigom, ug ang atong ministeryo sa kanataran, maoy maugdang nga mga butang. Ang makapalig-ong mga panaghisgot bahin sa mga prinsipyo sa Pulong sa Diyos motabang kanato nga mahimong “maalamon alang sa kaluwasan.”​—2 Tim. 3:15.

⁴ Mahimo natong ipahayag ang atong pagpabili sa putli nga panggawi niadtong anaa sa atong kongregasyon. Atong madayeg ang mahigugmaong mga buhat sa kalulot nga gihimo sa atong mga igsoon. (Juan 13:​34, 35) Ang mga butang nga dungganon naglakip sa maayong mga hiyas sa pagtuo, kalipay, pakigdait, ug hataas-nga-pailob nga atong mamatikdan sa atong mga igsoon. Ang paghisgot ug hamili ug dalayegon nga mga butang maoy ‘maayo aron malig-on’ ang uban.​—Roma 15:2.

⁵ Matag adlaw giatubang nato ang mga kabalaka sa kalibotan. Pagkamakapadasig ang paghiklin niini ug makig-ambit sa mahigugmaong panag-ubanay sa atong mga igsoon! Kon kanunay kitang makapadasig ug makapalig-on, ang uban matinud-anong mosulti bahin kanato: “Ilang napalig-on ang akong espiritu.”​—1 Cor. 16:18.