Isul-ob Ninyo ang Pagkamapainubsanon
1 Ang usa ka batang lalaki nga magbalantay sa karnero misalig kang Jehova ug mipildi sa usa ka gamhanang manggugubat. (1 Sam. 17:45-47) Usa ka datong tawo mapailobong nag-antos sa kalamidad. (Job 1:20-22; 2:9, 10) Ang Anak sa Diyos naghatag sa tanang dungog sa iyang gipanudlo ngadto sa iyang Amahan. (Juan 7:15-18; 8:28) Diha sa matag usa niining maong mga pananglitan, ang pagkamapainubsanon mao ang hinungdanong butang. Sa samang paagi karong adlawa, ang pagkamapainubsanon hinungdanon sa pagsagubang sa nagkalainlaing mga kahimtang nga atong atubangon.—Col. 3:12.
2 Sa Dihang Magsangyaw: Ingong Kristohanong mga ministro, kita mapainubsanong magpaambit sa maayong balita ngadto sa tanang matang sa mga tawo, nga dili maghukom daan kanila pinasukad sa ilang rasa, kultura, o kagikan. (1 Cor. 9:22, 23) Kon ang uban di-matinahoron o mapasigarbohon nga mosalikway sa mensahe sa Gingharian, kita dili mobalos sa samang paagi kondili mapailobong mopadayon sa pagpangita sa mga takos. (Mat. 10:11, 14) Inay sulayan nga madayeg sa uban pinaagi sa atong kahibalo o edukasyon, atong itumong ang pagtagad ngadto sa Pulong sa Diyos, nga nag-ila nga kini mas makapakombinsir kay sa bisan unsa nga atong ikasulti. (1 Cor. 2:1-5; Heb. 4:12) Agig pagsunod kang Jesus, atong ihatag ang tanang pagdayeg ngadto kang Jehova.—Mar. 10:17, 18.
3 Diha sa Kongregasyon: Ang mga Kristohanon kinahanglang ‘magsul-ob usab sa ilang kaugalingon sa pagkamapainubsanon sa hunahuna ngadto sa usag usa.’ (1 Ped. 5:5) Kon atong isipon ang uban nga labaw kay kanato, mangita kitag mga paagi sa pag-alagad sa atong mga igsoon inay magdahom nga sila maoy moalagad kanato. (Juan 13:12-17; Filip. 2:3, 4) Dili kita angayng mobati nga importante nga dili na motrabaho sa mga buluhatong sama sa paghinlo sa Kingdom Hall.
4 Ang pagkamapainubsanon motabang kanato nga “mag-inantosay sa usag usa diha sa gugma” ug sa ingon magpalambo sa kalinaw ug panaghiusa diha sa kongregasyon. (Efe. 4:1-3) Kini motabang kanato nga magmapinasakopon niadtong gitudlo nga maoy manguna. (Heb. 13:17) Kini motukmod kanato sa pagdawat sa bisan unsang tambag o disiplina nga mahimong ihatag kanato. (Sal. 141:5) Ug ang pagkamapainubsanon mag-aghat kanato sa pagsalig kang Jehova sa dihang atimanon nato ang bisan unsang mga pribilehiyo nga atong madawat diha sa kongregasyon. (1 Ped. 4:11) Sama kang David, atong amgohon nga ang kalamposan magdepende dili sa tawhanong katakos kondili sa panalangin sa Diyos.—1 Sam. 17:37.
5 Atubangan sa Atong Diyos: Labaw sa tanan, kinahanglang ‘ipaubos nato ang atong kaugalingon ilalom sa gamhanang kamot sa Diyos.’ (1 Ped. 5:6) Kon kita kinahanglang makigbisog sa masulayong mga kahimtang, pangandoyon tingali nato ang kahupayan nga dad-on sa Gingharian. Apan kita mapainubsanong magpasundayag ug pailob, nga maghulat kang Jehova sa pagtuman sa iyang mga saad sa iyang tinudlong panahon. (Sant. 5:7-11) Sama sa maghuhupot-sa-integridad nga si Job, ang atong pangunang kabalak-an mao nga “padayong dayegon ang ngalan ni Jehova.”—Job 1:21.
6 Ang manalagnang si Daniel ‘nagpaubos atubangan sa iyang Diyos’ ug gipanalanginan tungod kay siya gipakitaag pabor ni Jehova ug gihatagag daghang maayong mga pribilehiyo. (Dan. 10:11, 12) Hinaot nga isul-ob usab nato ang pagkamapainubsanon, nga nahibalo nga “ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Prov. 22:4.