Pagdasdas sa mga Mangangabayo nga Naglangkit Kanimo
1, 2. Sa unsang paagi nalangkit ang mga alagad sa Diyos karon sa katumanan sa matagnaong panan-awon nga narekord sa Pinadayag 9:13-19?
1 “Ang ikaunom nga manulonda mihuyop sa iyang trompeta.” Human niana, ang “kasundalohang mga mangangabayo” nga may gidaghanong “duha ka tinagpulo ka libo ka tinagpulo ka libo” ang midahunog. Kini dili ordinaryong kasundalohan. “Ang ulo sa mga kabayo morag mga ulo sa mga leyon.” Ang kalayo, aso, ug asupre nanggula gikan sa ilang mga baba, ug ang ilang “mga ikog samag mga halas.” Gipayhag niining simbolikong nagdasdas nga mga mangangabayo ang ilang giagian. (Pin. 9:13-19) Nahibalo ka ba kon sa unsang paagi ikaw nalangkit sa katumanan niining talagsaon nga matagnaong panan-awon?
2 Ang dinihogang nanghibilin ug ang ilang mga kauban, ang ubang mga karnero, nagkahiusa sa pagpaila sa mga paghukom sa Diyos. Kini miresulta sa bug-os nga pagyagyag sa patay nga kahimtang sa Kakristiyanohan sa espirituwal nga paagi. Atong susihon ang duha ka bahin sa matagnaong panan-awon nga nagpasiugda kon nganong ang ministeryo sa mga alagad sa Diyos epektibo kaayo.
3. Unsang pagbansay ang imong nadawat aron mapahayag ang mensahe sa Diyos sa epektibong paagi?
3 Nabansay ug Nasangkapan sa Pagpahayag sa Mensahe sa Diyos: Pinaagi sa Teokratikanhong Tunghaan sa Ministeryo ug uban pang mga tigom sa kongregasyon, ang mga ministro sa Diyos nabansay sa pagpahayag sa mensahe sa Diyos nga may awtoridad. Agig pagsundog kang Jesus ug sa iyang mga tinun-an, sila nanglakaw aron sa pagpangita sa mga takos, nga nagwali bisan diin makaplagan ang mga tawo. (Mat. 10:11; Mar. 1:16; Luc. 4:15; Buh. 20:18-20) Pagkaepektibo gayod kining Biblikanhong pamaagi sa pagwali!
4. Unsang himan ang mabatonan sa daghang magmamantala nga magpaarang kanila sa pagtuman sa ilang buluhaton?
4 Bilyonbilyong Bibliya, libro, brosyur, ug mga magasin ang gipanagtag sa Kristohanong mga ministro sa pagtuman sa sugo sa Diyos nga pagwali. Kining mga basahona giapod-apod diha sa duolag 400 ka pinulongan, nga nagkobre ug daghang nagkalainlaing mga ulohan ug naggamit sa mga paagi nga makapadani sa nagkalainlaing matang sa mga tawo. Epektibo ba nimong gigamit kining mga basahona?
5, 6. Unsay nagpaila nga ang katawhan ni Jehova dunay langitnong pagpaluyo?
5 Langitnong Pagtultol ug Pagpaluyo: Ang matagnaong panan-awon nagpatin-aw usab nga ang kalihokan nga gihawasan sa pagdasdas sa simbolikong mga mangangabayo adunay pagpaluyo sa Diyos. (Pin. 9:13-15) Ang tibuok-globong buluhatong pagwali napalampos, dili pinaagi sa tawhanong kaalam o kusog, kondili pinaagi sa espiritu sa Diyos. (Zac. 4:6) Si Jehova naggamit sa mga manulonda sa pagtultol niining buluhatona. (Pin. 14:6) Busa, uban sa mga paningkamot sa iyang tawhanong mga Saksi, si Jehova naghatag ug langitnong pagpaluyo aron kabigon ang mga maaghop ngadto kaniya.—Juan 6:45, 65.
6 Kay nabansay, nasangkapan pag-ayo sa pagpahayag sa mensahe sa Diyos, ug nagbuhat ilalom sa pagtultol sa mga manulonda, ang katawhan ni Jehova dili mapugngan. Padayon natong himoon ang atong bahin diha sa katumanan niining makapaukyab nga matagnaong panan-awon.