Mga Pahibalo

◼ Tanyag nga literatura sa Enero: Ikatanyag ang bisan unsang daandaang libro nga napatik sa wala pay 1991 nga anaa sa estak sa kongregasyon. Ang mga kongregasyon nga walay daandaang mga libro makatanyag sa brosyur nga Padayon sa Pagbantay!, nga maorder gikan sa sangang buhatan. Pebrero: Ang librong Pakigsuod Kang Jehova mao ang itanyag. Marso: Itanyag nato ang bag-ong libro, Unsay Tinuod nga Gitudlo sa Bibliya? Abril ug Mayo: Tagsatagsa ka kopya sa Bantayanang Torre ug Pagmata!

◼ Sugod sa Marso, 2006, ang bag-ong pakigpulong publiko alang sa mga magtatan-aw sa sirkito maoy “Nganong Magpagiya sa Bibliya?”

◼ Ang mga kongregasyon angayng mohimog mga kahikayan sa pagsaulog sa Memoryal niining tuiga sa Miyerkoles, Abril 12, human sa pagsalop sa adlaw. Ang mga tigom nga kasagarang gihimo sa Miyerkoles angayng himoon sa laing adlaw. Bisan pag ang pakigpulong mahimong mosugod ug sayosayo pa, ang pagpasa sa mga emblema sa Memoryal kinahanglang dili sugdan hangtod human sa pagsalop sa adlaw. Kinahanglang ipasibo sa mga magtatan-aw sa sirkito ang ilang eskedyul sa tigom alang sa semana sumala sa lokal nga mga kahimtang. Bisan pag maayo nga ang matag kongregasyon maghimog kaugalingong pagsaulog sa Memoryal, basin dili kini posible sa tanang panahon. Sa dapit nga daghang kongregasyon ang nagagamit ug samang Kingdom Hall, ang usa o mas daghang kongregasyon mahimong mogamit ug laing pasilidad alang nianang gabhiona. Kon posible, isugyot namo ang labing menos 40 minutos nga kal-ang sa mga programa aron ang tanan bug-os makabenepisyo sa maong okasyon.

◼ Tungod sa kahinungdanon sa Memoryal, angayng pilion sa lawas sa mga ansiyano ang usa sa mas kuwalipikadong mga ansiyano nga mahimong mamumulong imbes magturnohay lamang sila o itudlong mamumulong ang mao gihapong ansiyano sa kada tuig. Kon adunay usa ka ansiyano nga dinihogan nga kuwalipikadong mohatag sa pakigpulong, siya ang angayng pilion.