Mga Pahibalo

◼ Tanyag nga literatura sa Enero: Mahimong itanyag ang bisan unsang 192-panid nga libro nga gipatik una pa sa 1991. Kon ang inyong kongregasyon wala niining daandaang mga libro, itanyag ang librong Kahibalo o ang brosyur nga Padayon sa Pagbantay! Pebrero: Itanyag ang librong Pakigsuod Kang Jehova. Kon wala kamoy estak niining libroha, mahimo ninyong itanyag ang librong Kahibalo o ang bisan unsang daandaang publikasyon. Marso: Itanyag ang librong Gitudlo sa Bibliya ug paningkamoting makasugod ug mga pagtuon sa Bibliya. Abril ug Mayo: Itanyag ang tagsatagsa ka kopya sa Ang Bantayanang Torre ug Pagmata! Sa dihang magbalikduaw sa interesadong mga tawo, lakip niadtong nakatambong sa Memoryal apan dili aktibong nakig-uban sa kongregasyon, paningkamoting mapahimutang ang librong Gitudlo sa Bibliya uban ang tumong nga makasugod ug pagtuon sa Bibliya.

◼ Ang mga kongregasyon angayng mohimog mga kahikayan sa pagsaulog sa Memoryal niining tuiga sa Lunes, Abril 2, 2007, human sa pagsalop sa adlaw. Bisan tuod ang pakigpulong mahimong sugdan ug sayosayo, ang mga emblema sa Memoryal kinahanglang ipasa human sa pagsalop sa adlaw. Bisan pag maayo nga ang matag kongregasyon maghimog kaugalingong pagsaulog sa Memoryal, basin kini dili posible sa tanang panahon. Kon daghang kongregasyon ang naandang naggamit sa samang Kingdom Hall, ang usa o mas daghang kongregasyon mahimong mogamit ug laing pasilidad alang nianang gabhiona. Kon posible, isugyot namo ang labing menos 40 minutos nga kal-ang sa mga programa aron ang tanan bug-os makabenepisyo sa maong okasyon.

◼ Ang espesyal nga pakigpulong publiko sa 2007 ihatag sa Dominggo, Abril 15, 2007. Ang ulohan sa pakigpulong ipahibalo ra unya. Ang mga kongregasyon nga may duaw sa magtatan-aw sa sirkito o asembliya sa hinapos sa semana maghimo sa espesyal nga pakigpulong pagkasunod semana. Kinahanglang walay kongregasyon nga maghatag sa espesyal nga pakigpulong antes sa Abril 15.

◼ Sugod sa Marso 2007, ang bag-ong pakigpulong publiko sa mga magtatan-aw sa sirkito maoy “Unsay Imong Baroganan Atubangan sa Diyos?”

◼ Ang video nga Young People Ask—What Will I Do With My Life? pagahisgotan sa Tigom sa Pag-alagad sa Abril. Kon dunay manginahanglan, ang mga kopya kinahanglang orderon pinaagi sa kongregasyon.

◼ Kinahanglang paneguroon sa mga sekretaryo sa kongregasyon nga aduna silay appointment letter (S-202) alang sa matag regular payunir diha sa kongregasyon. Kon wala sila niini, sila angayng magsulat sa sangang buhatan.

◼ Bag-ong Publikasyon nga Mabatonan:

Humok-ug-Hapin nga Gamayng Edisyon sa New World Translation of the Holy Scriptures—Iningles (Kini mabatonan sa itom ug maron nga hapin.)