Ang Tanang Matang sa mga Tawo Maluwas
1. Nagdepende sa unsa ang atong baroganan sa Diyos?
1 Tungod sa dili-takos nga kalulot sa Diyos, nabuksan ang dalan sa kaluwasan. Kabubut-on ni Jehova nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:3, 4) Ang atong baroganan sa Diyos wala magdepende sa atong rasa, kahimtang diha sa katilingban, mga katakos, o panagway, kondili sa atong pagpasundayag ug pagtuo sa halad lukat ni Jesus. (Juan 3:16, 36) Ingong mga isigkamagbubuhat sa Diyos, kinahanglang langkaton nato sa atong kaugalingon ang bisan unsang pagpihigpihig, nga makaimpluwensiya sa atong kasingkasing sa pagsalikway sa mga tawo nga andam dawaton ni Jehova.
2, 3. Unsay makatabang kanato nga dili hukman ang mga tawo tungod sa ilang panagway?
2 Ayaw Paghukom: Si Jehova nagtan-aw sa kasingkasing sa mga tawo sa walay pagpihigpihig. (1 Sam. 16:7) Siya nagtan-aw usab kon unsay posible nilang mahimo. Busa iyang giisip nga tilinguhaon kadtong buot mopahimuot kaniya. (Hag. 2:7) Ato bang gilantaw ang uban sama sa paglantaw sa Diyos kanila?
3 Ang pipila ka tawo nga atong mahibalag sa ministeryo mahimong makapakurat kanato tungod sa ilang panagway. Tingali dili hapsay ang ilang sinina o lago tan-awon, way pamarbas, o may mga singsing sa ilong o wait. Ang pipila lagmit naglatagaw nga walay pinuy-anan. Ang uban lagmit dili mahigalaon kanato. Imbes hukman sila nga dili gayod mahimong mga magsisimba ni Jehova, angay kitang magmapositibo, “kay bisan gani kita kanhi mga walay salabotan, dili-masinugtanon, [ug] gipahisalaag.” (Tito 3:3) Tungod niini, angay kitang magmaikagon sa pagsangyaw sa tanan, bisan niadtong morag dili-takos tungod sa ilang panagway.
4, 5. Unsay atong makat-onan sa mga panig-ingnan ni Jesus ug ni Pablo?
4 Mga Panig-ingnan sa Unang Siglo: Si Jesu-Kristo andam sa pagtabang bisan niadtong morag wala nay paglaom nga mahimong magsisimba ni Jehova. (Luc. 8:26-39) Bisan tuod wala niya uyoni ang sayop nga mga binuhatan, siya nahibalo nga ang mga tawo mahimong mahisubay sa sayop nga dalan sa kinabuhi. (Luc. 7:37, 38, 44-48) Busa, siya nagmasinaboton, nga “giabot ug kaluoy kanila, tungod kay sila nahisama sa mga karnero nga walay magbalantay.” (Mar. 6:34) Ato bang masundog ang iyang panig-ingnan?
5 Si apostol Pablo gibato, gikulata, ug gibilanggo. (Buh. 14:19; 16:22, 23) Nayugot ba siya tungod sa maong mga kasinatian ug miingon nga nag-usik-usik lang siya sa iyang panahon uban sa maong mga tawo? Wala gayod. Siya nahibalo nga mahimong makaplagan ang matinud-anog-kasingkasing nga mga tawo taliwala sa tanang rasa, ug determinado siya sa pagpangita kanila. Ingon ba usab niana ang atong panglantaw sa mga tawo sa atong teritoryo nga lainlaig kagikan ug kultura?
6. Unsay mahimong epekto sa atong tinamdan nganha sa mga bag-ong nanambong sa mga tigom sa kongregasyon?
6 Pag-abiabi sa Uban Karon: Daghan sa katawhan sa Diyos ang nalipay nga giabiabi sa kongregasyon pinaagi sa mga igsoong lalaki ug babaye nga wala maglantaw sa panagway. May lalaki nga way pamarbas nga ang buhok abot sa abaga ug hugawg sinina mitambong sa usa ka Kingdom Hall sa Alemanya. Ilado siya nga daotag dungog. Bisan pa niana, siya mainitong giabiabi sa tigom. Nakadayeg kaayo siya nga siya mibalik pagkasunod semana. Sa wala madugay, iyang giareglar ang iyang panagway, mihunong sa pagpanabako ug gipakaslan ang iyang puyopuyo. Wala madugay, sila ug ang ilang mga anak nagkahiusa na sa pag-alagad kang Jehova ingong pamilya.
7. Sa unsang paagi atong masundog ang atong dili-mapihigong Diyos?
7 Agig pagsundog sa atong dili-mapihigong Diyos, ipaabot unta nato sa tanan ang pagdapit nga pahimuslan ang dili-takos nga kalulot sa Diyos.
[Blurb sa panid 6]
“Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buh. 10:34, 35.