Pangutana

◼ Giuyonan ba sa “matinumanon ug maalamong ulipon” ang independenteng mga grupo sa mga Saksi nga manukiduki o magdebate bahin sa Kasulatan?—Mat. 24:45, 47.

Wala. Bisan pa niana, diha sa daghang dapit sa kalibotan, ang pipila nato ka mga igsoon sa pagtuo nagpormag mga grupo aron mohimog kinaugalingong panukiduki bahin sa mga topiko sa Bibliya. Ang uban nagporma ug independenteng grupo sa pagtuon sa Hebreohanon ug Gregong pinulongan nga gigamit sa Bibliya aron masuta ang pagkatukma sa Bag-ong Kalibotang Hubad. Ang uban nanukiduki ug siyentipikanhong mga ulohan nga nalangkit sa Bibliya. Naghimo pa silag mga Web site ug mga chat room aron diha niana sila magbayloayg mga ideya ug magdebate. Sila naghikay usab ug mga komperensiya ug nagpatik ug mga basahon aron ipakita ang ilang mga nadukiduki ug aron dugang pamatud-an kon unsay gitudlo diha sa atong mga tigom ug diha sa atong literatura.

Sa tibuok yuta, ang katawhan ni Jehova nakadawat ug dagayang espirituwal nga instruksiyon ug pagdasig diha sa mga tigom sa kongregasyon, mga asembliya, ug mga kombensiyon, ug pinaagi usab sa mga publikasyon sa organisasyon ni Jehova. Ilalom sa paggiya sa iyang balaang espiritu ug pinasukad sa iyang Pulong sa kamatuoran, gitagana ni Jehova kon unsay gikinahanglan sa iyang katawhan aron silang tanan “bug-os nga magkahiusa sa samang kaisipan ug sa samang panghunahuna” ug padayong ‘magmalig-on sa pagtuo.’ (1 Cor. 1:10; Col. 2:6, 7) Mapasalamaton gayod kita sa espirituwal nga mga tagana ni Jehova niining kataposang mga adlaw. Busa, wala gayod uyoni sa “matinumanon ug maalamong ulipon” ang bisan unsang literatura, mga tigom, o mga Web site nga wala hikaya o organisaha niini.—Mat. 24:45-47.

Dalayegon ang mga indibiduwal nga gustong mogamit sa ilang katakos sa panghunahuna sa pagpaluyo sa maayong balita. Apan ang personal nga mga paningkamot kinahanglang dili makabalda sa kalihokan nga ginapalampos ni Jesu-Kristo pinaagi sa iyang kongregasyon sa yuta karon. Sa unang siglo, si apostol Pablo nagpasidaan bahin sa pag-apil-apil sa makahago, usik-ug-panahon nga mga ulohan, sama sa “mga talaan sa kagikan, nga walay sangkoan, hinunoa nagpatunghag mga pangutana nga tukionon inay kay sa pagpang-apod-apod sa bisan unsang butang sa Diyos maylabot sa pagtuo.” (1 Tim. 1:3-7) Ang tanang Kristohanon kinahanglang maningkamot sa ‘paglikay sa binuang nga mga pagpangutana ug pagtuki sa mga talaan sa kagikan ug panagbangi ug mga panaglalis bahin sa Balaod, kay kini walay kapuslanan ug kawang.’—Tito 3:9.

Alang niadtong gustong mohimog dugang pagtuon ug panukiduki sa Bibliya, among isugyot nga ilang susihon ang Insight on the Scriptures, “Ang Tibuok Kasulatan Dinasig sa Diyos ug Mapuslanon,” ug ang uban pa natong mga publikasyon, sama niadtong naghisgot sa mga tagna nga makita diha sa mga basahon sa Bibliya sa Daniel, Isaias, ug Pinadayag. Kini adunay daghang impormasyon alang sa pagtuon ug pagpamalandong sa Bibliya, ug sa ingon kita ‘mapuno sa tukmang kahibalo sa kabubut-on sa Diyos diha sa tanang kaalam ug espirituwal nga pagsabot, aron kita magalakaw nga takos kang Jehova aron bug-os nga makapahimuot kaniya samtang padayon kitang magapamunga sa tanang maayong buhat ug molambo sa tukmang kahibalo sa Diyos.’—Col. 1:9, 10.