Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon panahon sa Teokratikanhong Tunghaan sa Ministeryo sa semana nga magsugod sa Oktubre 29, 2007. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Septiyembre 3 hangtod sa Oktubre 29, 2007.
MGA HIYAS SA PAGPANULTI
1. Nganong ang pagsublisubli hinungdanon nga paagi sa pagtudlo? [be p. 206 par. 1-2, kahon] Ang pagsublisubli maoy usa ka tabang sa paghinumdom nga magamit sa pagpatugbaw sa mga pangunang ideya ug motabang sa atong mga mamiminaw nga makasabot niana sa tin-aw nga paagi. Ang atong tumong mao ang paghatag ug impormasyon nga magamit sa atong mga mamiminaw. Kon ang atong mga tigpatalinghog dili makahinumdom sa atong gisulti, ang atong mga pulong dili makaapektar sa ilang pagtuo o sa ilang pagkinabuhi.
2. Sa unsang mga paagi atong mapasiugda ang tema sa atong pakigpulong? [be p. 210, kahon] Una, pilia ang mga pangunang punto nga makatabang sa paghan-ay sa tema. Dayon, palandonga kon asa ug kon unsaon nimo pagpasiugda ang tema, ug paneguroa nga kanunay kining mahisgotan sa tibuok pakigpulong. Samtang ihatag ang pakigpulong, sublia paghisgot ang hinungdanong mga pulong o mga ideya gikan sa imong tema.
3. Unsa ang mga pangunang punto sa usa ka pakigpulong, ug unsay makatabang kanato sa pagpili niana? [be p. 212 par. 1-3] Ang mga pangunang punto maoy hinungdanong mga ideya nga gikinahanglan aron makab-ot ang tumong sa pakigpulong. Ang pagpili ug paggamit sa mga pangunang punto magdepende sa mamiminaw ug sa tumong sa pakigpulong. Kinahanglang tinoon nato nga tin-aw sa atong hunahuna ang atong tumong sa pakigpulong alang sa partikular nga mamiminaw ug pilion lamang ang haom nga materyal.
4. Nganong dili kita angayng mogamit ug daghan kaayong pangunang punto sa atong pakigpulong? [be p. 213 par. 2-4] Pipila ra ang gikinahanglan aron mahan-ay ang bisan unsang tema. Kon daghan kaayong punto ang atong hisgotan, dili kaayo nato mahan-ay ang matag usa niini. Ang paghisgot ug pipila ra ka punto mohatag ug panahon sa atong mga mamiminaw sa pagsusi sa matag usa niini aron masilsil kinig maayo sa ilang hunahuna.
5. Nganong hinungdanon nga ang atong introduksiyon makapukaw sa interes, ug unsaon nato kini paghimo? [be p. 215 par. 1; p. 216 par. 1-3, kahon] Ang atong introduksiyon makatino kon magpatalinghog ba kanato ang mga tawo ug kon unsa sila ka atentibo. Ang mga pangutanang makapalihok sa hunahuna sa mga mamiminaw makapukaw sa ilang interes. Ang paggamit ug tinuod-kinabuhing kasinatian makadanig atensiyon, apan angay usab kining magpahiluna ug patukoranan alang sa pipila ka hinungdanong bahin sa pakigpulong. Ang usa ka bag-ong balita o pangutlo mahimong epektibo kon kini haom sa ulohan.
ASAYNMENT NUM. 1
6. Sa unsang paagi ang Salmo 119:89, 90 motabang kanato sa pagsabot nga kita makasalig sa pulong sa Diyos? [w05 4/15 p. 15 par. 3] Pinaagi sa pulong sa Diyos—ang iyang “mga lagda sa kalangitan”—ang mga butang sa langit hapsay nga nagbiyo diha sa ilang mga orbito ug ang yuta lig-ong gipahimutang hangtod sa hangtod. (Job 38:31-33; Sal. 104:5) Makasalig kita sa matag pulong nga magagula sa baba ni Jehova; ang iyang gisulti ‘tinong molampos’ sa pagtuman sa iyang katuyoan. (Isa. 55:8-11)
7. Unsay gipasiugda sa basahon ni Ezequiel, ug unsang kaayohan ang mabatonan niadtong nagkinabuhi ug nagsimba karon sa paaging makapahimuot kang Jehova? [si p. 137 par. 33] Ang tagna ni Ezequiel nagpahibalo nga ang pagbalaan sa ngalan ni Jehova mao ang labing hinungdanon. (Ezeq. 36:23) Si Jehova magbalaan sa iyang ngalan pinaagi sa paglaglag sa tanang nanamastamas niana. Ang tanan karon nga nagbalaan kang Jehova diha sa ilang kinabuhi pinaagi sa pagkab-ot sa iyang mga kinahanglanon alang sa pagsimba makabatog kaayohan ug kinabuhing walay kataposan pinaagi sa suba nga midagayday gikan sa iyang templo.
8. Sa unsang paagi “ang pulong ni Jehova” manalipod sa atong kasingkasing? (Sal. 18:30) [w05 9/1 p. 30 par. 2] Sa dihang nakiglantugi si Jesus kang Satanas didto sa kamingawan, wala siya makigsulti sa Yawa aron ipakita kon kinsay mas maalamon nila. Pinaagi sa paggamit sa Kasulatan ingong basehanan sa iyang pangatarongan, gisulti ni Jesus kon unsay anaa sa iyang kasingkasing, nga maoy hinungdan nga ang estratehiya sa Yawa, nga misaler didto sa Eden, wala mosaler kang Jesus. (Luc. 4:1-13) Kon pun-on nato ang atong kasingkasing sa mga pulong ni Jehova, dili usab mosaler kanato ang mga malipatlipatong kaugdahan ni Satanas.
9. Sa unsang paagi gipasiugda sa tibuok basahon ni Daniel ang paglaom sa Gingharian? [si p. 142 par. 23] Si Jehova nga Diyos gipaila ingong Supremong Soberano nga nagtukod ug usa ka Gingharian nga dili gayod malumpag. (Dan. 2:19-23, 44; 4:25) Gituboy ug gihimaya si Jehova ingong Karaan sa mga Adlaw, kinsa naghukom sa katawhan ug kanasoran pinasukad sa ilang pagbarog bahin sa isyu sa Gingharian. Iyang gihatag ang “pagmando ug dignidad ug gingharian” ngadto sa usa nga “sama sa anak sa tawo.” “Ang mga balaan sa Supremong Usa” nagmando uban kang Kristo, ang “Anak sa tawo,” sa Gingharian. (Dan. 7:13, 14, 18, 22; Mat. 24:30; Pin. 14:14) Si Miguel, ang Dakong Prinsipe, mogamit sa iyang gahom ingong Magmamando sa Gingharian sa pagdugmok ug pagtapos sa tanang gingharian niining daang kalibotan. (Dan. 2:44; 12:1; Pin. 12:7-10)
10. Sa unsang paagi ang basahon ni Oseas naglig-on sa atong pagtuo sa mga tagna ni Jehova? [si p. 145 par. 14] Ang tanang gitagna ni Oseas maylabot sa Israel ug Juda natuman gayod. Ang Israel gibiyaan sa idolatrosong mga nasod nga nagpaluyo niini kanhi, ug kini bug-os nga gilaglag sa Asirya niadtong 740 W.K.P. (2 Hari 15:20; 17:3-6, 18; Os. 8:7-10) Si Jehova naluoy sa Juda ug nagluwas niini, dili pinaagig militaryong gahom, kondili pinaagi sa iyang manulonda nga mipatay ug 185,000 ka Asiryanhon. (2 Hari 19:34, 35; Os. 1:7) Ang mga tagna ni Oseas bahin sa pagpasig-uli natuman sa dihang gitigom ni Jehova ang Juda ug Israel gikan sa ilang pagkadestiyero sa 537 W.K.P. (Esd. 2:1; 3:1-3; Os. 1:10, 11; 2:14-23; 3:5; 11:8-11; 13:14; 14:1-9)
SENEMANANG PAGBASA SA BIBLIYA
11. Diha sa panan-awon ni Ezequiel, unsay gipasabot sa pagsukod sa templo, ug unsay gipasalig niini alang kanato karon? (Ezeq. 40:2-5) [w99 3/1 p. 9 par. 6; p. 14 par. 7] Ang panan-awon nagpasalig sa mga binihag nga mga Hudiyo nga ang putling pagsimba bug-os nga mapasig-uli sa templo sa Diyos. Ang pagsukod sa templo nagpasabot nga ang Diyos nagpasalig nga ang panan-awon matuman gayod. Karong adlawa, kita makasalig nga walay bisan unsa—bisan ang mabangis nga pagsupak sa gamhanang mga gobyerno—ang makapugong sa pagpasig-uli sa putli nga pagsimba.
12. Kinsa ang “pangulo” diha sa kataposang katumanan sa panan-awon ni Ezequiel? (Ezeq. 48:21) [w99 3/1 p. 16 par. 13-15; p. 22-3 par. 19-20] Ang “pangulo” nagtumong sa usa ka grupo sa mga lalaki nga may yutan-ong paglaom nga motabang sa pagdumala sa mga kahikayan diha sa bag-ong kalibotan. (Ezeq. 45:8, 9) Sa daghan nang katuigan, ang matinumanong dinihogang mga ansiyano nagbansay sa nagkadaghan nga pangulong matang alang sa maong buluhaton. Samtang ang 144,000 magmando uban kang Kristo sa langit, ang pangulong matang maoy mogiya sa katawhan ilalom sa pagtultol sa Mesiyanikong Gingharian.
13. Unsay kahulogan sa Daniel 2:21? [w98 9/15 p. 12 par. 9] Bisan pag dili si Jehova ang responsable sa politikanhong pagpangdaog o kausaban diha sa gobyerno, siya makahimo sa pagpahiluna ug pagtangtang sa mga magmamando. Siya maghimo niini sa iyang tinudlong panahon ug sumala sa iyang kabubut-on.
14. Nganong gitawag si Daniel nga “tilinguhaon kaayo” sa mga mata ni Jehova? (Dan. 9:23) [dp p. 185 par. 12; w04 8/1 p. 12 par. 17] Si Daniel determinado sa pagtuboy sa matuod nga pagsimba bisan pag adunay mga pagsulay nga nagpameligro sa iyang kinabuhi. (Dan. 1:8; 2:12, 13; 6:8-11) Siya kanunayng nag-ampo kang Jehova. Siya nagtuon ug namalandong sa Pulong sa Diyos ug sa iyang mga katuyoan. (Dan. 9:1, 2) Iyang gipasiugda ang pagkamatarong sa Diyos, ug mapaubsanon niyang giangkon ang iyang mga kasaypanan. (Dan. 9:7, 14, 16, 20)
15. Sa unsang diwa walay “kahibalo sa Diyos diha sa yuta” sa Israel, ug sa unsang paagi kining mga pulonga makaapektar kanato? (Os. 4:1, 2, 6) [w05 11/15 p. 21 par. 21; jd p. 57-8 par. 5; p. 61 par. 10] Ang mga Israelinhon dili kay wala gayoy hibangkaagan bahin sa Pulong sa Diyos, kondili “sila nangabusog ug ang ilang kasingkasing nabayaw.” (Os. 13:6) Kay nabuhong sa materyal nga mga butang, sila wala magbuhat sa mga butang sumala sa “kahibalo sa Diyos.” (Os. 4:1, 2) Angay natong lantawon kining mga pulonga ingong pasidaan aron dili mobugnaw ang atong gugma sa Diyos, nga mahimong moresulta sa atong paglapas sa mga sukdanan sa Diyos.