Dayega si Jehova sa Matag Adlaw
1. Unsay determinadong buhaton sa mga alagad sa Diyos, ug ngano?
1 Gipahayag ni Haring David ang iyang determinasyon nga dayegon si Jehova “sa tibuok nga adlaw,” bisan hangtod sa panahong walay tino. (Sal. 145:2, 7, 21) Kita usab adunay maayong rason aron dayegon si Jehova sa matag adlaw.—Sal. 37:10; 145:14, 18; 2 Ped. 3:13.
2. Sa unsang paagi ang mga pamilya makadayeg kang Jehova sa matag adlaw?
2 Diha sa Atong Panimalay: Kita adunay makapalig-ong mga basahon nga makatabang kanato sa espirituwal nga mga panaghisgot sa dihang magtagad sa inadlawng teksto, sa Pamilyahanong Pagsimba, ug sa dihang mangandam alang sa mga tigom sa kongregasyon. Naandan na sa daghang pamilya nga mag-uban sa pagpangaon bisan makausa lang sa matag adlaw. Kini maghatag kanilag kahigayonan sa pag-estoryahay nga dili magdalidali ug sa pagdayeg kang Jehova. Ang maong mga panaghisgot nga hikayon sa mga ginikanan mapuslanon gayod sa pagmatuto sa ilang mga anak diha sa “disiplina ug sa pagdumala-sa-kaisipan ni Jehova.”—Efe. 6:4; Deut. 6:5-7.
3. Sa unsa paagi atong madayeg si Jehova sa dihang kita makig-uban sa atong mga igsoon?
3 Uban sa Atong mga Igsoon: Sa dihang kita magsangyaw o anaa sa panagkatigom, kita adunay maayo kaayong kahigayonan sa pagdayeg kang Jehova uban sa atong mga isigkamagtutuo. (Prov. 15:30; Filip. 4:8; Heb. 13:15) Sanglit kitang tanan nahigugma man kang Jehova, angay natong iapil sa atong panaghisgot uban sa atong mga igsoon ang atong kinasingkasing nga pagpabili sa pagkamaayo ni Jehova.—Sal. 106:1.
4. Sa unsa nga mga kahimtang nga ikaw makadayeg kang Jehova?
4 Sa Dihang Makig-estorya sa mga Dili-Magtutuo: Bisan tuod dili tingali kita makasangyaw sa kanataran sa matag adlaw tungod sa atong mga kahimtang, ang pagpakighisgot sa atong mga kauban sa trabaho, mga eskolmet, ug sa atong mga silingan bahin kang Jehova ug sa iyang mga katuyoan makahatag ug paglaom sa mga tawong matinud-anog kasingkasing. (Sal. 27:14; 1 Ped. 3:15) Samtang nagbiyahe diha sa ayroplano, gisangyawan sa usa ka sister ang usa ka babaye nga pasahero usab. Ang maong babaye nahupayan ug napalig-on gayod sa iyang nadunggan, mao nga iyang gihatag sa sister ang iyang adres ug numero sa telepono aron makakomunikar gihapon sila sa usag usa. Samtang nagkagrabe ug nagkadaot ang kahimtang sa kalibotan, ang mga alagad ni Jehova padayong nagsangyaw sa “maayong balita sa butang nga mas maayo” ngadto sa mga tawo nga andam maminaw. Kini makahatag sa uban ug paglaom ug hinungdan sa pagdayeg kang Jehova.—Isa. 52:7; Roma 15:11.
5. Nganong buot man natong dayegon si Jehova, ug unsay mahimong mapalampos niini?
5 Malipay gayod si Jehova sa pagkadungog sa iyang mga alagad nga nagdayeg kaniya sa matag adlaw! Sama sa makitang kalalangan ni Jehova sa atong palibot, kita usab makapahayag ug mga pagdayeg kaniya sa matag adlaw diha sa atong panimalay, sa kongregasyon, ug sa dihang makig-estorya sa mga dili-magtutuo.—Sal. 19:1-4.