“Umari Ka, Mahimong Akong Sumusunod”
1. Unsay sunod natong tun-an diha sa Pagtuon sa Kongregasyon sa Bibliya?
1 Ang mga asoy sa Ebanghelyo detalyadong naghisgot bahin kang Jesus. Sanglit gisugo ang mga Kristohanon sa pagsundog gayod sa iyang panig-ingnan, kita mangandam ug maminaw pag-ayo sa dihang atong tun-an ang librong “Umari Ka, Mahimong Akong Sumusunod” diha sa atong Pagtuon sa Kongregasyon sa Bibliya sugod sa semana sa Marso 1. (1 Ped. 2:21; Mar. 10:21) Ato gayong tun-an ang mga bahin sa kinabuhi ni Jesus nga makadasig kanato diha sa ministeryo.
2. Sa unsang paagi makatabang kanato ang panig-ingnan ni Jesus sa pagkamalahutayon?
2 Panig-ingnan ni Jesus: May misupak ba o wala modawat kanimo sa dihang namalaybalay ka? Kon mao, makaingon gayod kita nga husto ang giingon ni Jesus: “Kon sila naglutos kanako, sila magalutos usab kaninyo.” (Juan 15:20) Hinuon, dili tanang pagsupak ikaingon nga paglutos. Bisan pa niana, ang kalipay nakatabang kang Jesus sa paglahutay sa tanang matang sa pagsulay. Kita usab maningkamot sa pagbaton sa pag-uyon ni Jehova ug sa ganti sa atong pagkamaunongon. Kini makatabang kanato aron kita ‘dili kapoyon ug maluya.’ (Heb. 12:2, 3; Prov. 27:11) Samtang magmalahutayon kita diha sa ministeryo, makalaom usab kita nga tabangan kita ni Kristo Jesus.—Mat. 28:20.
3. Unsaon nato pagsundog ang panghunahuna ni Jesus bahin sa ministeryo?
3 “Kay Alang Niini Gipadala Ako”: Giuna gayod ni Jesus ang pagsangyaw sa Gingharian. (Luc. 4:43) Siya nagkugi pag-ayo diha sa ministeryo. Iyang giisip kini nga dinalian, nga kanunayng nangitag mga higayon sa pagsangyaw bahin sa Gingharian. Kay mga sumusunod man kita ni Jesus, ato bang gisunod ang iyang panig-ingnan? Diha sa atong adlaw-adlawng mga kalihokan, may mga tawo bang atong kasangyawan sa maayong balita? Tungod sa atong gugma kang Kristo, hinaot madasig kita sa pagwali sa maayong balita!—2 Cor. 5:14.
4. Sa unsang mga paagi atong mapauswag ang kalidad sa atong ministeryo?
4 “Wala pa Gayoy Laing Tawo nga Nakasulti ug Sama Niini”: Nakadayeg gayod ang mamiminaw ni Jesus sa iyang paagi sa pagpanudlo. (Juan 7:46; Mat. 7:28, 29) Nganong lahi siya sa ubang magtutudlo? Kay iyang gihigugma ang kamatuoran nga iyang gisangyaw ug ang mga tawo nga iyang gitudloan, ug siya naggamit ug lainlaing mga paagi sa pagpanudlo. Pinaagi sa pagsundog sa Dakong Magtutudlo, atong mapauswag ang kalidad sa atong ministeryo.—Luc. 6:40.
5. Unsay atong paningkamotan dihang magtuon sa librong “Umari Ka, Mahimong Akong Sumusunod”?
5 Kini maoy pipila lang sa daghang impormasyon nga atong makat-onan bahin kang Jesus. Unsa pay imong makat-onan? Samtang magtuon ka sa kinabuhi ni Jesus diha sa Pagtuon sa Kongregasyon sa Bibliya, paningkamoti nga ‘mahibalo ka sa gugma ni Kristo’ pinaagi sa pagsundog sa iyang gisulti ug gibuhat.—Efe. 3:19.