Pagpabili sa Atong mga Dapit sa Pagsimba
1-3. Unsay nakapalihok sa mga magsisimba ni Jehova sa pag-amot para sa mga dapit sa pagsimba? Paghatag ug mga pananglitan.
1 Siya madasigong nag-alagad ug mga 50 ka tuig. Bisag luya kay tigulang na, gusto gyod niyang moadto sa bag-ong tukod nga Kingdom Hall. Giagak siyag brader pasulod sa tigomanan ug hinayhinayng mipaingon sa donation box. Dayon iyang gihulog ang gamayng kantidad nga iyang gitigom para idonar sa pagtukod ug Kingdom Hall. Bisag dili na siya makaboluntaryo sa pagtukod sa tigomanan, apan gusto siyang motabang.
2 Nakapahinumdom kini kanato sa “kabos nga babayeng balo” nga nakita ni Jesus nga naghulog ug duha ka gagmayng sensilyo diha sa panudlanan sa templo. Siya miingon nga ang balo naghatag sa “tanan niyang nabatonan, ang iyang tibuok nga panginabuhian.”—Mar. 12:41-44.
3 Unsay nakapalihok niining duha ka babaye? Ang ilang pagpabili sa dapit sa pagsimba ni Jehova. Tinuod, gamay ra ang ilang gihatag, apan kang Jehova kini maoy pagpakitag dakong apresasyon sa iyang dapit sa pagsimba. Si Haring David nagpakitag samang apresasyon. Sa Salmo 27:4 siya miingon: “Usa ka butang ang gipangayo ko kang Jehova—kini ang akong pagapangitaon, nga makapuyo ako sa balay ni Jehova sa tanang adlaw sa akong kinabuhi, . . . ug sa pagtan-aw nga mapabilhon sa iyang templo.” Siya nagpakita niini nga apresasyon pinaagi sa pag-amot ug dako para sa pagtukod sa templo.
4. Sa unsang mga paagi kita makapakitag apresasyon sa atong Kingdom Hall?
4 Pagpakitag Apresasyon Karon: Dunay daghang paagi sa pagpakitag apresasyon sa atong mga Kingdom Hall. Ato kining ikapakita pinaagi sa atong pagpamesti ug ligdong nga paggawi panahon sa tigom, ug sa pagpanghinlo ug pagmentinar niini. Ang laing paagi sa pagpakitag dakong apresasyon sa gasa ni Jehova kanato mao ang pag-amot ug kuwarta, kay kini bahin gayod sa matuod nga pagsimba. Ang paghatag niining paagiha makapalipay gayod.—1 Cron. 29:9.
5. Unsang mga kahikayan ang gihimo sa Nagamandong Lawas sa pagtaganag presentableng mga tigomanan?
5 Agig pagsunod sa prinsipyo sa Kasulatan bahin sa boluntaryong paghatag, sa katuigan sa 1980 ang mga kongregasyon sa Pilipinas gitanyagan sa paghulam nga walay interes aron makatukod ug bag-ong Kingdom Hall. Daghang bag-ong tigomanan ang natukod ilalom niini nga kahikayan. Dayon sa 1999, ang Nagamandong Lawas naghimog programa sa paggamit sa pondo sa adunahang mga nasod aron madugangan ang pondo sa mga igsoon sa kabos nga mga nasod alang sa pagtukod ug mga Kingdom Hall. Sukad sa 2001, ang Sanga sa Pilipinas nakapahimulos niini nga programa ug sa pagkakaron, 656 na ka Kingdom Hall ang natukod ug 885 ka kongregasyon ang nakabenepisyo. Gusto namong ipahibalo kaninyo kon unsa nay lakat niining duha ka kahikayan.
6. Unsay kinahanglang himoon sa mga kongregasyon nga wala magpadala sa eksaktong gisaad nga kantidad para sa ilang Kingdom Hall loan? Komosta kon daghang kongregasyon ang nalangkit?
6 Kadtong Duna pay Bayranan nga Kingdom Hall Loan: Sa katuigan sa 1980 ug 1990, kapin sa 1,000 ka loan ang giaprobahan para sa pagtukod ug mga Kingdom Hall. Daghan niini nabayran na. Apan duna pay 538 ka loan nga wala pa bug-os mabayri, diin 699 ka kongregasyon ang nalangkit. Ang matag usa niining mga kongregasyona naghimog resolusyon nga nanaad sa paghatag ug tinong kantidad matag bulan. Gipakita sa mga rekord nga mga 40% lang sa total nga gisaad nga kantidad ang gipadala ngadto sa sangang opisina kada bulan. Kon kini ang kahimtang sa inyong kongregasyon, pahinumdoman gayod mga ansiyano ang mga magmamantala aron sila mahibalo sa panginahanglan ug makapribilehiyo sa pag-amot. (2 Cor. 8:4) Kon daghang kongregasyon ang nagbayad sa loan, ang tanang ansiyano magmiting aron sabotan kon sa unsang paagi mapauswag ang ilang amotan aron mapadala ang eksaktong gisaad nga kantidad ngadto sa sangang opisina. Kini nga mga amot magamit sa pagtukod ug dugang mga Kingdom Hall diin kini gikinahanglan.
7, 8. Sa unsang paagi ang mga kongregasyon nagpakitag dakong apresasyon panahon sa pagtukod sa ilang Kingdom Hall? (b) Unsa ang duha ka paagi nga padayon nilang mapakita ang ilang apresasyon human matukod ang Kingdom Hall?
7 Kadtong Naggamit ug mga Kingdom Hall nga Gipanag-iya sa Sanga: Dalayegon nga libolibong boluntaryo ang naggamit sa ilang panahon ug kahanas, nga sagad nagtukod ug mga Kingdom Hall sa lagyong mga lugar. Panahon sa pagtukod, ang lokal nga mga kongregasyon nagpakitag apresasyon pinaagi sa pagboluntaryo ug pagdonar ug pagkaon para sa mga boluntaryo, nga nakamenos sa gasto sa sangang opisina. Dihang matukod na ang Kingdom Hall, sa unsang paagi padayong ikapakita sa mga kongregasyon ang ilang apresasyon niining dakong panalangin ni Jehova?
8 Ilang mapakita kini sa duha ka paagi: Una, pinaagi sa regular nga pag-amot alang sa pagmentinar sa Kingdom Hall, aron kanunay kining hinlo ug makahatag ug kadayeganan kang Jehova. Kinahanglang maggahin ug pondo sa pagmentinar sa Kingdom Hall aron dunay magamit ang operating committee ug kinahanglang may eskedyul usab sa pagpanglimpiyo. Ikaduha, sila maghimog resolusyon sa paghatag ug tinong kantidad matag bulan ngadto sa sangang opisina. Para sa unsa man kining kuwartaha? Kini maoy para sa Kingdom Hall Fund ug gamiton kini sa pagtukod ug dugang mga Kingdom Hall. Pagkamahigugmaon nga kahikayan! Kadtong may bag-o nang Kingdom Hall makapakita sa ilang apresasyon pinaagi sa pag-amot aron matukoran usab ug tigoman ang uban.
9. Unsang sugo ni Jesus ang angayng tumanon sa mga kongregasyon nga wala magpadalag eksaktong kantidad nga ilang gisaad para sa ilang Kingdom Hall? Nganong importante kini?
9 Gipakita sa among rekord nga daghan niining mga kongregasyona walay palta nga nagpadala sa ilang gisaad nga kantidad matag bulan. Apan sa katibuk-an, 70% lang sa total nga kantidad nga gisaad sa 885 ka kongregasyon ang napadala matag bulan ngadto sa sangang opisina. Kon ang tanan regular nga magpadala sa kantidad nga ilang gisaad, mas dako unta ang pondo nga magamit sa pagtukod ug bag-ong mga Kingdom Hall. Kay nanaad man ang matag kongregasyon sa paghatag ug tinong kantidad, angay nilang tumanon ang sugo ni Jesus: “Himoa lang ang inyong pulong nga Oo magkahulogan ug Oo.”—Mat. 5:37.
10. Nganong angayng padak-an ang amot sa dihang modako ang kongregasyon?
10 Sumala sa daghang kongregasyon nga natukorag bag-ong Kingdom Hall, midaghan ang nanambong ug midako ang kongregasyon. Busa mahimong padak-an sa uban ang kantidad nga ilang ipadala sa sangang opisina matag bulan. Kon mao, maghimo silag bag-ong resolusyon ug ipresentar kini sa kongregasyon aron makadesisyon sila sa pagpadako sa ilang binulan nga amot.
11. Nganong ang matag usa angayng moamot para sa Kingdom Hall?
11 Ang Matag Usa Angayng Moamot: Sa gipahinungod nato ang atong kinabuhi sa Diyos, kita nag-isip nga ang tanan natong nabatonan ug kahinguhaan, iya na ni Jehova. Si Brader C. T. Russell misulat: “Angay isipon sa matag usa ang iyang kaugalingon ingong tinudlo sa Ginoo, nga piniyalan sa iyang kaugalingong panahon, awtoridad, salapi, ug uban pa, ug maningkamot sa paggamit niini kutob sa maarangan, alang sa kahimayaan sa Agalon.” Busa, dato man o kabos, kita ba naghatag ug amot? Ang ato bang paggamit sa atong salapi nagpakita nga ang pag-alagad kang Jehova maoy labing bililhon kanato?
12, 13. Unsay angayng batasanon sa matag usa ug sa mga pamilya? Unsay panglantaw ni Jehova sa atong malipayong paghatag?
12 Among gidasig ang matag pamilya sa pagpadapat sa gisulat ni Pablo sa 1 Corinto 16:2: ‘Matag unang adlaw sa semana ang matag usa kaninyo kinahanglang dunay igahin agig pagtigom sumala sa iyang pag-uswag.’ Matikdi nga nag-awhag kini nga batasanon ang paghatag. Kon regular nga moamot ang mga ginikanan, magsilbi kining panig-ingnan sa mga anak. Dili na kini ipahinumdom pa kanunay, kay ang matag usa nagbuhat ‘sumala sa gihukom sa iyang kasingkasing, dili kontragusto o pinugos.’—2 Cor. 9:7.
13 Kon ang matag usa, matag pamilya, ug matag kongregasyon moamot ‘sumala sa gihukom sa ilang kasingkasing’ agig pasalamat sa mga panalangin nga nadawat, malipay gayod si Jehova kay iyang “gihigugma ang malipayong maghahatag.”