Pagtudlo sa Yanong Paagi
1. Unsa ang usa ka hinungdanong hiyas sa tin-aw ug epektibong pagtudlo?
1 Ang pagkayano maoy usa ka hiyas sa epektibong pagtudlo. Ang pagtagad sa paagi sa Dakong Magtutudlo, si Jesus, makatabang sa pagpauswag sa atong “arte sa pagpanudlo.”—2 Tim. 4:2; Juan 13:13.
2. Unsay nalangkit sa pagpanudlo sa yanong paagi, ug unsay mga epekto niana?
2 Gamita ang Yanong mga Pulong: Ang Wali sa Bukid naundan ug pipila ka hinungdanon kaayong kamatuoran nga gipamulong sukad, nga gipahayag sa yanong paagi. (Mat., kap. 5-7) Ang mga tawo nga naminaw kang Jesus “nahingangha sa iyang paagi sa pagpanudlo.” Bisag ang mga polis nga gisugo sa pagdakop kaniya nakaingon: “Wala pa gayoy laing tawo nga nakasulti ug sama niini.” (Mat. 7:28, 29; Juan 7:46) Dili kinahanglang mogamit kitag laglom ug lisod sabtong mga termino, o detalyadong mga ilustrasyon aron madani ang uban sa kamatuoran. Ang kamatuoran mahimong ikapatin-aw gamit ang mga termino nga daling masabtan.
3. Nganong ang pipila may tendensiya nga motudlo ug daghang impormasyon sa ilang mamiminaw, ug sa unsang paagi malikayan kana?
3 Gidaghanon sa Impormasyon: Gikonsiderar ni Jesus ang iyang mamiminaw sa pagtino kon unsa ka daghang impormasyon ang itudlo kanila. (Juan 16:12) Kinahanglan nga kita mapaniiron ug mapailin-ilinon ilabina dihang magsangyaw sa mga paryente, bag-ong interesado, o sa mga bata. Bisan pag sila maminaw pag-ayo, dili angay nga daghang impormasyon ang atong itudlo. Kadtong dunay matarong nga kasingkasing mopadayon sa pagkuhag kahibalo bahin sa matuod nga Diyos, si Jehova.—Juan 17:3; 1 Cor. 3:6.
4. Nganong angay tang magpokus sa mga pangunang punto inay sa mga detalye?
4 Pagpokus sa mga Pangunang Punto: Si Jesus wala maghisgot ug daghang detalye sa iyang pagpanudlo. Dihang siya miingon: “Ang tanan nga anaa sa handomanang mga lubnganan . . . manggula,” kadto dili maoy panahon nga magpatin-aw siya bahin sa duha ka dulnganan niadtong pagabanhawon. (Juan 5:28, 29) Dihang magdumalag pagtuon sa Bibliya, angay tang magpokus sa mga pangunang punto ug dili hisgotan ang way labot nga impormasyon.
5. Unsang panalangin ang atong matagamtam kon magtudlo kita sa yanong paagi?
5 Mapasalamaton gayod kita nga sa yanong paagi si Jehova nagtudlo kanato sa tanang butang nga angay natong mahibaloan! (Mat. 11:25) Hinaot nga magtudlo usab kita sa yanong paagi ug tagamtamon ang kalipay sa mabungahong ministeryo.